Mā-cū (Dō̤)

Lài-nguòng: Wikipedia
Tiéu gáu: īng-dô̤sìng-tō̤
Mā-cū gì ôi-dé

Mā-cū (馬祖) sê Hók-gióng-sēng Hók-ciŭ-chê Lièng-gŏng-gâing dĕ̤ng-buô 19 bĭk dō̤-sê̤ṳ gì tūng-chĭng, sê Dṳ̆ng-huà Mìng-guók găk Hók-gióng dê-kṳ̆ gì liāng-tū. Mā-cū gì miàng-chĭng sê téng Hók-gióng buōng-iòng gì sìng-siĕng Mā-cū Bò̤-bò̤ lì gì.

Mā-cū dê-kṳ̆ gì iè-mìng ciō-iéu sê téng Diòng-lŏ̤h (長樂) lì gì. Gó-chṳ̄ gĭng-dáng gì Mā-cū ngṳ̄-ngiòng ùng-huá dŭ cêng chiông Diòng-lŏ̤h.

Hèng-céng dăng-ôi[Siŭ-gāi]

Găk Dṳ̆ng-huà Mìng-guók gì hèng-céng dăng-ôi tā̤-hiê diē-sié, Mā-cṳ̄ dê-kṳ̆ ciáng-sék miàng-chĭng sê Lièng-gŏng-gâing (連江縣), â-dā̤ guāng-hăk 4 bĭk hiŏng:

  • Nàng-găng-hiŏng (南竿鄉), cêu sê Nàng-găng-dō̤ (南竿島), gó-dā̤ iâ giéu lō̤ Nàng-găng-dòng (南竿塘) hĕ̤k Mā-cū-dō̤ (馬祖島), sê Mā-cū dê-kṳ̆ dék duâi gì dō̤.
  • Báe̤k-găng-hiŏng (北竿鄉), găk Mā-cū liĕk-dō̤ dṳ̆ng-báe̤k-buô.
  • Gṳ̄-guŏng-hiŏng (莒光鄉), bău-guák Dĕ̤ng-gṳ̄ (東莒) gâe̤ng Să̤-gṳ̄ (西莒). Cī 2 bĭk dō̤-sê̤ṳ buōng-miàng Dĕ̤ng-kēng (東犬) gâe̤ng Să̤-kēng (西犬), biáng lā̤ miàng Băh-kēng-dō̤ (白犬島). "Băh-kēng" gāi miàng có̤ "Gṳ̄-guŏng", sê ôi lāu gé-niêng Ciōng Gái-sĭk sū huák-dông gì "Ù uông câi Gṳ̄" (毋忘在莒[1]) ông-dông.
  • Dĕ̤ng-īng-hiŏng (東引鄉, hĕ̤k 東湧鄉), iù Dĕ̤ng-īng gâe̤ng Să̤-īng 2 bĭk dō̤ cū-siàng. Ī-sèng sṳ̆k Lò̤-nguòng-gâing (羅源縣) guāng-hăk, ké̤ṳk Dṳ̆ng-huà Mìng-guók siŭ có̤ Lièng-gŏng gì dê-buàng. Dĕ̤ng-īng-hiŏng găk Mā-cū dê-kṳ̆ có̤i dĕ̤ng-báe̤k-buô, iâ sê Dṳ̆ng-huà Mìng-guók liāng-tū dék báe̤k gì sū-câi.

Cé̤ṳ-gāi[Siŭ-gāi]

  1. "Gṳ̄" (莒) sê Cà̤-guók (齊國) gì siŏh bĭk siàng-chê. "Ù uông câi Gṳ̄" gì diēng-gó chók cê̤ṳ «Lṳ̄-sê Chŭng-chiŭ» (呂氏春秋): Găk Sèng 284 nièng gì Ciéng-guók (戰國) sì-dô̤i, Iĕng-guók (燕國) ciŏng-gŭng Ngŏk Ngiê (樂毅) chĭng-huâng Cà̤-guók, 5 nièng cĭ-nô̤i Cà̤-guók 70-gūi bĭk siàng dŭ ké̤ṳk Iĕng-guók ciéng-liāng, nâ tiông Gṳ̄ gâe̤ng Cék-mĕ̤k (即墨) 2 bĭk siàng. Cà̤-uòng cāu-huāng gáu Gṳ̄, có-chói bó̤-siù, ī-hâiu ciáh iù Cà̤-guók ciŏng-gŭng Dièng Dăng (田單) găk Cék-mĕ̤k sāi "Huōi-ngù-dêng" (火牛陣) páh iàng Cà̤-guók, dŏk diōng liāng-tū. 1949 nièng Guók-mìng-dōng sék-bâi hâiu, Ciōng Gái-sĭk cāu kó̤ Dài-uăng. Ĭ huák-dông lāu "Ù uông câi Gṳ̄" gì ông-dông, hô̤-diêu Dài-uăng-nè̤ng huāng-gŭng Dâi-lṳ̆k.