九案泰山
 | 兹篇文章有平話字版本。 參考伊其平話字版本。 Chăng-kō̤ ĭ gì Bàng-uâ-cê bēng-buōng. |
九案泰山是福州臺江區附近其蜀隻村廟信仰聯合體。供九案泰山其廟都領有蜀隻府共十三隻堂，統稱「九案十三堂」。九案泰山府總堂着臺江區太平二弄邊兜，共太平堂敆蜀隻地方。
九案泰山府供東嶽大帝其部下溫都統共康都統，號𡅏溫泰山、康泰山。雖然無供東嶽大帝，但是也告囉「泰山府」。九案泰山府敆南臺十三鄉有自家其分堂，分堂裏勢坐其是兩隻都統其部下。每蜀年其九月初一遘十四，十三堂分成九組參加迎神活動，號𡅏「迎泰山」。這九組乞當地儂號𡅏「九案」，「九案泰山」其名字就是總款來其。十二問杯，決定下蜀年兩隻都統着坐底隻堂𡅏。十三堂有其蜀鄉蜀案，有其兩、三鄉蜀案，都領有九案。敆東門外斗其岳峰固有蜀隻供東嶽大帝其泰山府，為共伊區別，就將供溫、康二都統其廟告做九案泰山府。實際道教裏勢正式其稱呼是東嶽泰山都統府。
歷史
[Siŭ-gāi | Gāi nguòng-mā]九案泰山其十三鄉是指太平山、山仔裏、涵頭、教場坂、浦東、浦西、西洋、斗池、西營裏、洋炳、雙浦頭、河上、河下十三隻村，這地方有3420平方許罔大，相當今旦臺江西北共鼓樓西南，東遘八一七路共洋中路，西遘二環路共長汀路，北遘環城路共黎明路，南遘寧化路義州境。九案泰山其信仰有四五百年其歷史，供溫都統共康都統。溫都統名瓊，官封「東岱嶽宗御前忠靖王」；康都統名席，官封「東岱嶽宗御前英烈王」；伊兩隻將軍都是因為治好真価百姓其瘟病乞玉皇上帝封官，屬東嶽大帝管，都是東嶽十太保之一。最早儷着太平山村有供兩隻將軍，就是敆太平山堂，太平山堂其香火是趁福州城北其東嶽廟請來其。差不多明朝、清朝時期，南臺十三鄉發生瘟病，真価儂感染，儷有供兩隻將軍其太平山村受災最輕，故此附近其村都聯合起來供兩隻將軍，以求保佑。別隻村供兩隻將軍其村廟陸陸續續起起來，都領十三堂，都是敆明朝、清朝其辰候起其。
九案泰山其信仰敆福建比較特殊：十三隻村共同供一隻神，信仰聯合體比較大；每蜀隻村都有自家其村廟，但是供其主神是按問杯其結果輪𡅏坐十三隻堂𡅏，伓是長期坐蜀隻廟𡅏；另外，迎神是以接送主神其方式開始，嚽也是比較特別。
最早，東門其東嶽泰山廟迎神活動是最大最隆重其。文革以後，迎神活動乞禁止，仱夫塊其迎神無了。九案泰山其迎神許辰候也停唻，但是遘1990年代，九案泰山其迎神活動復恢復了，固有真価青年哥加入來。雖然講十三村都拆遷差不多了，九案泰山其迎神固留𡅏，固做𡅏真鬧熱，每年差不多有千幾人參加，是今旦福州城區最大其迎神活動。
2016年3月，臺江區政府將「九案泰山信俗」列入臺江區第二批非物質文化遺產名錄。2017年11月3號，海峽兩岸（福州）九案十三鄉泰山文化節開幕，有請台灣其宜蘭東嶽廟其儂來參加。
迎神過程
[Siŭ-gāi | Gāi nguòng-mā]每蜀年九月初一其午時是溫、康兩隻將軍開堂辦公其時間，最近幾年因為時間趕，經常提早遘八月三十暝晡就開堂了。開堂之前，供着西營裏長生堂其兩隻「泰山護駕大將軍」大伯、二伯出發去舊案溫、康兩隻將軍夫塊護駕。十三堂做簡單其儀式，將廟裏勢其溫、康兩隻將軍換上新其衣裳，換衣裳由山仔裏堂負責。儀式結束以後，將五營罐其封條扯唻，蓋蓋翻開，寓意將五營兵馬司其兵囝放出去巡，為迎神做準備。接下來其初二遘初八就是十三堂自家其迎神活動。其他十二隻堂供其神遘舊案，向康將軍拜壽。初九是康將軍其生日（溫將軍生日是五月初五），按傳統着做儀式、擺供品、放炮仗、聚餐等等。十一暝晡遊馬爐，派儂扛𡅏馬爐巡十三鄉。馬爐是有馬頭其香爐，懸頂插𡅏兩隻將軍其令旗，扛馬爐其儂號𡅏馬夫。舊底十三鄉有其墿盡窄，轎無能耐入去，馬爐遘其地方就相當溫、康兩隻將軍行過蜀樣。
九月十二未時（差不多下晝蜀點遘三點）問杯，通過gĕ̤h杯其方式決定下蜀年溫、康兩隻將軍坐底隻堂𡅏。問杯其先後順序也是固定其。問杯其辰候，各堂堂主跪兩隻將軍面前，道士將兩片杯向天𡅏gĕ̤h。兩片杯儷是蜀正蜀反號𡅏「聖杯」，代表將軍贊同。每回問杯結束，按傳統都有「奪馬牌」其儀式。馬牌是蜀隻柴牌，得遘馬牌其案就代表下蜀年將軍坐嘻案其堂𡅏。儷是得遘坐案資格其案是幾隻堂合蜀堆其，就按許隻案內部其規定，決定兩隻將軍到底着坐底隻堂𡅏。聽講自家其堂得遘「一聖」（蜀隻聖杯），贏其許堂其青年哥此刻kĕk最快速度將馬牌奪去，罔躃罔聼自家其堂有無得遘「二聖」（兩隻聖杯）。儷是無，就將馬牌還轉去，由下蜀案其青年哥接上。就總款連𡅏gĕ̤h，儷是都是蜀正蜀反號𡅏「三聖杯」或者「三聖」，三聖杯定案，決定明年坐其堂。儷是gĕ̤h蜀輪下來九隻案都未中，就按固定順序再gĕ̤h蜀輪，gĕ̤h遘有案是「三聖杯」為止。明年暝坐其固是今年其案號𡅏「復案」。
十三許日敆舊案迎神，之後將神請遘行台暫時歇骹，按習慣行台一般設着西洋積善堂。十三暝晡會使敆西洋附近迎神。十四暝晡八點趁行台出發，巡過十三鄉。兹工也是最隆重其蜀工，每隻鄉都會做儀式，神經過其地方儂都着擺供桌接神。迎神其辰候，溫、康兩隻將軍每經過蜀隻堂，許隻堂都着將伊廮供桌𡅏供，做蜀隻名號𡅏「食宴」其儀式，堂𡅏也會提供粉乾、甜粥、鹹粥請參加其儂食。最後遘下蜀年其新案設香案安厝，號𡅏轉宮。
九案十三堂
[Siŭ-gāi | Gāi nguòng-mā]歷年問杯結果
[Siŭ-gāi | Gāi nguòng-mā]| 公曆年份 | 干支年份 | 坐案其堂 | 備註 |
|---|---|---|---|
| 1944年 | 民國三十三年甲申 | 西洋積善堂 | 西洋做半段。 |
| 1945年 | 民國三十四年乙酉 | ||
| 1946年 | 民國三十五年丙戌 | 洋炳同心堂 | |
| 1947年 | 民國三十六年丁亥 | 河上救生堂 | |
| 1948年 | 民國三十七年戊子 | 涵頭大堂 | |
| 1949年 | 民國三十八年己丑 | 教場坂堂 | |
| 1950年 | 庚寅年 | 斗池社 | |
| 1951年 | 辛卯年 | 浦東大堂 | |
| 1952年 | 壬辰年 | 斗池社 | |
| 1953年 | 癸巳年 | 浦西福壽堂 | |
| 1954年 | 甲午年 | 太平山堂 | |
| 1955年 | 乙未年 | 河上救生堂 | |
| 1956年 | 丙申年 | 太平山堂 | |
| 1957年 | 丁酉年 | ||
| 1958年 | 戊戌年 | 斗池社 | |
| 1959年 | 己亥年 | ||
| 1960年 | 庚子年 | 浦西福壽堂 | |
| 1961年 | 辛丑年 | 河上救生堂 | |
| 1962年 | 壬寅年 | 太平山堂 | |
| 1963年遘1990年期間停止舉辦 | |||
| 1991年 | 辛未年 | 太平山堂 | 太平山做半段。無問杯。 |
| 1992年 | 壬申年 | 太平山堂 | 無問杯 |
| 1993年 | 癸酉年 | 洋柄同心堂 | 鐵嶺做半段。恢復以後頭回十三鄉聯合迎神、問杯。 |
| 1994年 | 甲戌年 | 河上救生堂 | |
| 1995年 | 乙亥年 | 河上救生堂 | 復案 |
| 1996年 | 丙子年 | 西營長生堂 | |
| 1997年 | 丁丑年 | 西洋積善堂 | |
| 1998年 | 戊寅年 | 浦東境大堂 | |
| 1999年 | 己卯年 | 河上救生堂 | |
| 2000年 | 庚辰年 | 西洋積善堂 | |
| 2001年 | 辛巳年 | 浦東境大堂 | |
| 2002年 | 壬午年 | 西洋積善堂 | |
| 2003年 | 癸未年 | 西營長生堂 | |
| 2004年 | 甲申年 | 浦西福壽堂 | |
| 2005年 | 乙酉年 | 浦東境大堂 | |
| 2006年 | 丙戌年 | 雙浦頭協心堂 | |
| 2007年 | 丁亥年 | 河上救生堂 | |
| 2008年 | 戊子年 | 西洋積善堂 | 西洋做半段。十三鄉聯合迎神。 |
| 2009年 | 己丑年 | 下河上大堂 | |
| 2010年 | 庚寅年 | 教場坂堂 | |
| 2011年 | 辛卯年 | 斗池社 | |
| 2012年 | 壬辰年 | 雙浦頭協心堂 | |
| 2013年 | 癸巳年 | 浦東境大堂 | |
| 2014年 | 甲午年 | 教場坂堂 | |
| 2015年 | 乙未年 | 斗池社 | |
| 2016年 | 丙申年 | 洋柄同心堂 | |
| 2017年 | 丁酉年 | 太平山堂（九案泰山府總堂） | 邀請臺灣宜蘭東嶽廟聯合迎神。 |
| 2018年 | 戊戌年 | 西洋積善堂 | |
| 2019年 | 己亥年 | 山仔裏陰陽專案堂 | |
| 2020年 | 庚子年 | 西洋積善堂 | |
| 2021年 | 辛丑年 | 洋柄同心堂 | |
| 2022年 | 壬寅年 | 浦東境大堂 | 試杯：西營長生堂 |
| 2023年 | 癸卯年 | 教場坂堂 | 試杯：山仔裏陰陽專案堂 |
| 2024年 | 甲辰年 | 教場坂堂 | 復案 |
參考資料
[Siŭ-gāi | Gāi nguòng-mā]
- ↑ 1.0 1.1 1.2 福建省已换证宗教活动场所一览表(道教). 福建省民族与宗教事务厅. 2012-12-31.
- 调查与研究︱闽都游神：迷恋“塔骨”的年轻人
- 春节新年俗：福州九案泰山温康二都统的新春团拜
- 郑衡泌. 调适与重建：城市化进程中民间信仰庙宇的道教化与规范化——以福州九案十三堂为例. （原始內容存檔着2025-02-12）.
- 蒋驰. 福州九案泰山信仰及其祭祀空间研究. （原始內容存檔着2025-02-16）.
- 福州九案泰山信仰与城市“大傩”.