十八洋

十八洋是福州其蜀隻舊地名。着舊底福州城外斗南邊方位，今旦屬臺江區其上海街道、寧化街道、義洲街道、茶亭街道、洋中街道，固有鼓樓區其洪山鎮。

十八洋這地方着福州城南，以今旦八一七路為中心。八一七路舊底出南門兜就是鄉下，由北向南其大墿號𡅏斗中路、洗馬路、福德路、茶亭路（茶亭街）、吉新路、橫山路（橫街）、小橋路（小橋頭）、中亭路（中亭街）。兹蜀片除去沿街都是厝比較鬧熱，再向外斗就是盡荒涼其十八洋。

「洋」舊底着福州話裏勢會指大片其堘共河、浦。十八洋租塊舊底蜀七處都是堘，溪囝池囝成堆三，包括浦東洋、浦西洋、斗池洋、西洋、上河洋、下河洋、洋柄洋、雙埔洋、長汀洋、幫洲洋、荷澤洋、坡尾洋、安淡洋、浦尾洋、水松洋、興園洋、小柳洋、加洋，都領18隻池囝，故此號𡅏十八洋。十八洋其溪囝連𡅏閩江，舊底年年暝都會發溪水，受怪百姓。舊底有蜀句話「十八洋路墿彎彎，蜀年洪水淹九番」。復加野容易發蟲囝，舊底野稠發生傳染病，故此生活盡去困難。舊底有儂講「水淹十八洋，糠菜半年糧，賣兒又賣女，情景好凄涼」，就是講許辰候其情況。

1952年，十八洋附近十幾隻村成立黎明合作社，扒水渠，改造土地。1963年起好閩江墘其堤壩。之後復開始計劃工業區，着今旦工業路附近起玻璃厰、罐頭厰、電子管厰、味素厰、燈泡厰、搪瓷厰、保溫瓶厰、啤酒厰、福大機械厰、抗生素厰、豉油厰等等工廠。改革開放以後，黎明合作社開始辦工廠，1992年成立黎明企業集團，茲單位是福建省頭家村級其企業集團公司。附近其村都開始學這村辦合作社公司，比較出名其固有浦東村辦其紅旗飯店。今旦十八洋其堘基本無了，大部份其溪囝池囝敆起厝起工廠其辰候都乞填澈。遘尾因為環境污染，工廠都搬鄉下去了，這地方變成市中心。有寶龍城市廣場、萬象城總款其商場，也有閩江北岸中央商務區，閩江江墘固有起閩江公園。