太平山堂

太平山堂

太平山堂是福州臺江其蜀隻廟，敆臺江區太平二弄44號，蒼霞真人廟共這堂起着蜀堆。這廟是道教九案泰山其13隻堂之一，屬石部境，主要供康三世子、王大人，也有供注壽司、程尊王、馬夫人、許真君、方大奶等等神明。太平山堂迎神共問杯其辰候屬太平山案，也是每蜀年參加迎神儂最価其蜀隻堂。

九案泰山透底無「總堂」其概念。但是按政府規定，所有民間信仰都着有總堂，太平山堂就以「九案泰山府」其名字註冊成這信仰其總堂。

歷史

太平山堂是九案泰山裏勢最早起其蜀隻堂，有差不多千幾年歷史。唐朝貞觀二年（636年），太平山村其儂趁福州城北其東嶽廟請來溫、康兩隻將軍其香火轉來供。大概着唐朝末期遘宋朝初期其辰候，南臺十三鄉發生瘟病，真価儂感染，儷有供兩隻將軍其太平山村受災最輕，故此附近其村都聯合起來供兩隻將軍，以求保佑，遘尾發展成九案泰山其信仰。文革其辰候廟破壞去，明朝做其兩隻將軍其神像也乞燒唻。八幾年，村民集資15萬塊錢買蜀落厝，重新起這太平山堂。九幾年，宗教政策放鬆，太平山堂發動十三鄉捐款買轉太平山堂其舊地，但是沒錢起廟。正好蒼霞真人廟拆遷，掏遘90萬拆遷款，無塊討地。太平山堂就邀請伊各儂合𡅏起廟。就總款，十三鄉復捐款40萬塊，將兩隻廟都起起來，加掛「蒼霞真人廟」其牌牌，形成現在其樣式。

今旦太平山堂裏勢除去坐九案泰山其菩薩，固包括本地大王等等其他菩薩，都是附近拆遷無塊坐，也乞請入來供。間壁其蒼霞真人廟裏勢坐其是蒼霞真人，也號𡅏五穀真人、五穀真君、張真人，名張信，祖廟敆閩侯上街其溪源宮。明朝辰候，蒼霞洲陳、高、卓三姓大戶做夢這張真人來蒼霞，就着蒼霞洲也起蜀隻廟來供伊。1881年（光绪七年）福州大做旱，閩浙總督遘伊蒼霞洲其廟去拜，結果逿雨，故此封做「五穀真君」。雖然講兩隻廟起着蜀堆，蒼霞真人共九案泰山其信仰根本無干過，蒼霞真人廟共九案泰山互相𣍐去參加對方其迎神等等活動。