洋柄同心堂

洋柄同心堂，簡稱同心堂，是福州臺江其蜀隻廟，敆交通路40號，距離福建醫科大學大門𣍐遠。這廟是道教九案泰山其13隻堂之一，屬靈通境，迎神共問杯其辰候屬洋柄案。主要供康大世子，也有供猴聖王三尊神、本地大王、臨水奶等等其神明。

洋柄同心堂敆1992年重修，是蜀落兩層樓其厝，樓下是居民會辦公室。2007年洋柄拆遷，因為伓是登記其宗教場所，乞當平常其厝拆唻，儷掏錢無塊掏地。洋柄同心堂其管委會將這錢掏來買現在交通路40號其兩層樓店面，樓頂廮菩薩，樓下分兩半，前斗租乞儂做店，租金收去補充堂其活動經費；後斗是管委會其辦公室。平常骿後共前斗隔開，每個月日其初一、十五有伊伯伊姆來燒香，一般都是趁骿後其門囝入去。九月迎神其辰候，前斗關店半個月日，囫圇隻廟掏來做活動。