浦東大堂

浦東大堂也號𡅏浦東堂、浦東齊心堂，是福州臺江其蜀隻廟，敆臺江區白馬南路305-1號。這廟是道教九案泰山其13隻堂之一，屬浦東境，迎神共問杯其辰候屬浦東案。浦東大堂主要供護駕將軍、良願司岳。

原來其廟敆浦東村。文革其辰候，乞福州玻璃廠佔去，改革開放以後重新起蜀隻簡單其廟。九幾年末期白馬路擴建，浦東村原拆原遷。浦東村村民集資八十幾萬，搬遘現在其地方起廟。這廟距離老居民住其浦東新村𣍐遠，並且固大。浦東大堂敆茲辰候乞福建省民族宗教事務廳認定是合法其宗教活動場所，復請野価其他其神明入去供，包括天齊仁聖大帝、周范將軍共夫人、鎮西大元帥、陰陽按察使、注壽司、臨水奶、獲宗威烈王、護善侯、玄天上帝、張聖君、猴聖王，固有鎮海樓其金、何、柳三隻夫人。

浦東新村裏勢固有蜀隻蜀名其浦東堂，嘻堂其香火是伊自家去泰山府請其，無受浦東大堂管，也無問杯其資格。