涵頭大堂

涵頭大堂，簡稱涵頭堂，復號𡅏接龙亭南天照天君祖殿，是福州臺江其蜀隻廟，敆臺江區烏山路87號，主要供宗岳大將軍。這廟是道教九案泰山其13隻堂之一，屬河東護民境，迎神共問杯其辰候屬斗池案。

涵頭堂原來敆涵頭村，2000年涵頭村拆遷，大部份居民都搬別塊去。第二年，涵頭堂搬遘附近其白馬花園邊兜重新起。這新廟着東西河墘。現在涵頭堂裏勢供其主神是本地大王；侍神是宗岳泰山內閣，包括宗岳大將軍（宗岳泰山張泗張千歲護駕大將軍）、宗岳泰山內閣左大臣（風）、宗岳泰山內閣右大臣（皇）、宗岳泰山中軍大臣（卓風明）、宗岳泰山樞密大臣、宗岳泰山兵馬總都督。固有供仙爺、王爺、北濟尊王、臨水奶、猴聖王等等盡価其神明。

涵頭堂是2008年以後乍開始加掛「接龙亭南天照天君祖殿」其牌牌其。這「接龙亭南天照天君祖殿」是福建省民族宗教事務廳認定其宗教活動場所，「涵頭大堂」伓是。照天君其信仰共九案泰山根本無干過，照天君祖殿共九案泰山互相𣍐去參加對方其迎神等等活動。這照天君祖殿本底是敆茶亭河墘，距離涵頭堂𣍐遠，之後因為拆遷搬遘烏山去。因為野価儂去夫塊燒香，影響遘附近福州市政府其工作，2008年乞要求搬去金鷄山，起成現在其南天照天君宮。照天君宮管委會其部份儂嫌夫塊恰遠，決定着附近掏地，最終選擇着涵頭堂，涵頭堂也同意將照天君也請入來。現在廟其前斗供其是照天君，骿後是涵頭堂。野価信照天君其儂來嚽塊燒香，但是伊各儂對九案泰山其了解盡少。