照天君

照天君是福州民間供其蜀隻神。這神共榕𣗬信仰有干過。

照天君本底是南門兜共茶亭附近其儂供其神，是閩越境其本境大王。阿片戰爭前後，南門兜澳尾巷附近有野価池囝溪囝。有蜀條去幫邊村其石板墿，經過池囝其地方邊兜有四株榕𣗬，夫塊墿𣍐平，行夜墿其儂野稠盪水𡅏浸死。有蜀晡，蜀隻儂行遘榕𣗬下底，生目蜀時看見火光彈𡅏墿面野光，以後晡晡都是生總款。百姓認為是神，敆𣗬下起蜀隻龕供伊，號這神號𡅏「照天君」，以神像開眼其許工七月十九做伊其生日。以後榕𣗬都生去，神像乞搬遘附近其接龍亭繼續供。這接龍亭敆今旦臺江區東西河河墘，着白馬花園這小區其骿後，伊也是九案泰山其涵頭堂。

固有蜀種講法，講這照天君本名照天柱，881年敆連江出世，16歲敆雪峰寺出家，以後乞王審知請去做東門外斗報國資聖禪院其當家。以後，王延鈞無道，伊走去別塊拯救百姓，最終敆蜀株榕𣗬下底得道。百姓感謝伊，起廟供伊，告伊「照天君」。敆倉山區高蓋山也有蜀隻照天君其祖殿，號𡅏南天照天君道場。

今旦最出名其照天君廟敆晉安區金鷄山其南天照天君宮。