Hók-ăng-uâ

Hók-ăng-uâ (福安話) sê Mìng-dĕ̤ng-ngṳ̄ báe̤k buô huŏng-ngiòng gì dô̤i-biēu ngṳ̄-ngiòng, ciō-iéu tŭng-hèng diŏh Hók-gióng-sēng Mìng-dĕ̤ng gì Nìng-dáik dê-kṳ̆. Ĭng-ôi gô-dā̤ Hók-ăng sê Nìng-dáik dê-kṳ̆ gì ùng-huá dṳ̆ng-sĭng, gó-chṳ̄, Hók-ăng-uâ ké̤ṳk nêng-ùi sê Mìng-dĕ̤ng-ngṳ̄ báe̤k-buô gì dô̤i-biēu.

Chĭng-dièu muăk-nièng, ô chók-sié siŏh buōng gái-siêu Hók-ăng-uâ ĭng-ông gì ông-cṳ̆, hô̤ lō̤ «Ăng-kiŏng Báik-ĭng» (安腔八音).

Gâe̤ng Hók-ciŭ-uâ gì kṳ̆-biék

Gâe̤ng Hók-ciŭ-uâ siŏng bī-gáu, Hók-ăng-uâ gó bō̤-liù lā̤ siŏng-dŏng sâ̤ gì gū-cā Mìng-dĕ̤ng-ngṳ̄ gì dĕk-sáik; dùng-sì, iâ sêu báe̤k buô Ngù-ngṳ̄ gì īng-hiōng, huák-sĕng siŏh-piĕ biéng-huá.

• Hók-ăng-uâ bī Hók-ciŭ-uâ dŏ̤ 2 bĭk siăng-mō̤: [j] gâe̤ng [w]. Găk «Ăng-kiŏng Báik-ĭng» diē-lié, cī lâng bĭk siăng-mō̤ ké̤ṳk chĭng có̤ "Ṳ̀-mō̤" (如母) gâe̤ng "Ù-mō̤" (無母).
• Hók-ciŭ-uâ gì [s] găk Hók-ăng-uâ dŭ sê tĕ̤k siàng [θ].