香港

香港是中國南方其蜀芘特別行政區，全名號𡅏“香港特別行政區”，是中國兩芘特別行政區之一。

香港原來是滿清廣東下底其蜀隻縣。原來是蜀隻盡去逼其地方，野価海賊將窩做着嚽塊。滿清敆鴉片戰爭拍輸去，將香港島割乞英國；遘尾了復將九龍共新界租乞英國99年。英國將者殖民地發展野好，讓伊變成亞洲最發達其城市之一，共韓國、新加坡、臺灣齊號𡅏“亞洲四小龍”。

九龍共新界其租期敆1997年遘塊，差不多由1970年開始，英國共中國談判，卜將茲2隻地方還乞中國；但是中國一再堅持野卜挃是殖民地其香港島。最尾無年呆着1997年7月1號將香港島、九龍共新界都掏交乞中國，茲件事計乞今旦其中國儂號𡅏“香港回歸”。者“香港特別行政區”就總款成立去了。

香港儂頭底無參加香港歸屬其談判，故此有其香港儂有乞儂出賣其感覺。復加𡅏六四事件以後𣍐少其香港儂對中國政府印象𣍐好，有其儂見覺香港着獨立或者繼續接受英國其統治。

根據《香港特別行政區基本法》其規定，香港實施資本主義。嚽共大陸其社會主義制度𣍐蜀樣，因為“保持資本主義制度50年不變”是中國政府共英國約定其。敆英國統治辰候，香港其官方語言是英語共粵語，英語為主；遘“香港回歸”以後，換成漢語共英語，漢語為主。就是講現在粵語已經伓是官方語言了。學校教育其語言也換成漢語，不過也価儂反對總款做。