掃帚

參考閩東語平話字其版本。/ Chăng-kō̤ Mìng-dĕ̤ng-ngṳ̄ Bàng-uâ-cê gì bēng-buōng.

掃帚也號𡅏筅帚，是蜀種掃地兜其乇。

有能耐做掃帚其材料很価。比如竹、菅芒、𢱈䅢、塑料等等。使竹做其告筅帚，連江也告竹筅帚，敆閩清固告刺掃（chiáh-sáu），坵塍、屏南告柴帚。菅芒做其，連江告菅帚（guăng-chiū），坵塍告芒帚。各種材料做其，都可以統稱掃帚。也有地方是統稱做筅帚。

掃帚掃禿去，就告掃帚𥏘^[1]^:255。

文化[Siŭ-gāi | Gāi nguòng-mā]

掃帚其歷史野𣆯。世界懸頂各種文化臺中，都會看見掃帚其身影。

彗星向太陽其方向運動其辰候會放出水蒸汽，看過去野像掃帚，故此號𡅏「掃帚星」^[1]^:255。

歐洲中古傳說裏勢，女巫——也就是神嬤^[1]^:271——會共掃帚騎骹膀下飛。只種有能耐飛其掃帚，就號𡅏飛天掃帚。

按日本其傳說，熱天其辰候，暝晡會有野価妖精鬼怪出來遊行，嚽就是百鬼夜行。臺中就有箒神參加。傳說掃帚乞抾唻，蜀百年都無儂管，就會慢慢吸收天地精華，積聚怨念，感受佛性，遘尾變成掃帚其付喪神，也就是箒神了。箒神會保佑女界平安生囝^[2]，嚽共福建傳說臺中其臨水奶有仂囝像。