西洋積善堂

西洋積善堂，簡稱西洋堂或者積善堂，是福州臺江其蜀隻廟，原來其廟敆西洋裏，因為拆遷，現在搬遘臺江區西洋新村裏勢重新起。這廟是道教九案泰山其13隻堂之一，屬上洋境，主要供雷總政，迎神共問杯其辰候屬西洋案。

每年九案泰山迎神，九月十二問杯結束以後，會將溫、康兩隻將軍先趁舊案請遘行臺過渡，十四巡十三鄉以後再搬遘新案，號𡅏轉宮。按傳統，行臺一般都是設着積善堂。十三這日暝晡會使敆西洋附近迎神。

文革其辰候，西洋堂乞沒收，之後拆平八去。1992年使政府賠其錢共小區居民其捐款重起。之後陸陸續續有其他神也乞請入去供。現在西洋堂裏勢有供六將軍、王太保、劉仙師、中爺、馬爺、軍爺、雙爺、大爺、雷總政、主事、驅瘟大臣等等其神。