西營裏長生堂

西營裏長生堂，簡稱長生堂，是福州其蜀隻廟。原來其廟敆西營，文革辰候乞破壞去，九幾年初期重修。2007年西營拆遷，因為伓是登記其宗教場所，乞當平常其厝拆唻，儷賠30萬塊錢無塊掏地。這仂囝錢敆附近連買蜀間店來當廟使都無夠，最後無能耐着鼓樓區加洋新村裏勢買蜀間車庫，將菩薩暫安裏勢。這廟是道教九案泰山其13隻堂之一，屬嘉興境，迎神共問杯其時候屬西營案。兩隻泰山護駕大將軍羅大伯、羅二伯供這廟𡅏。

每年卜開始九案泰山迎神其辰候，大伯、二伯先出發去舊案溫、康兩隻將軍夫塊護駕，之後乍開堂。本底這大伯、二伯儷是呵呵班當差其。有蜀年迎神其辰候，溫將軍其銀帽盪長生堂東一班羅大伯心肝𡅏。溫將軍此刻就封大伯、二伯做護駕大將軍。以後每蜀年開堂之前都喚大伯、二伯來站堂。迎神其辰候，都着跟溫、康兩隻將軍身邊護駕，儷九月十二問杯結束以後乍轉去過自家生日蜀工。