赴戍登程口占示家人

Chók-cê̤ṳ Wikipedia
跳至導覽 跳至搜尋

參考閩東語平話字其版本。/ Chăng-kō̤ Mìng-dĕ̤ng-ngṳ̄ Bàng-uâ-cê gì bāng-buōng.


赴戍登程口占示家人》是兩隻七言律詩道光二十二年(1842年)八月十一號,福州儂林則徐西安城共厝裏儂告別,啟程去戍守邊疆倛時候,寫了茲題詩。[1]大中「苟利國家生死以,豈因禍福避趨之」是最有名倛兩句詩,乞後人傳誦無停[2]。《雲左山房詩鈔》卷六裏勢收錄。

創作背景[Siŭ-gāi | Gāi nguòng-mā]

林則徐畫像

道光二十一年(1841年)六月二十八號,道光皇帝下旨,將林則徐流放伊犁。林則徐七月十四號趁鎮海出發,第二年五月遘了西安,複病了,就留西安兩月。八月十一號,天晴去了,林則徐共厝裏儂告別,共長頭囝林汝舟、嫩囝聰彝、最嫩倛林拱樞齊去戍守邊疆。卜出發倛時候,口占了兩隻詩,就離城遘西邊去了。[1]

詩歌大意[Siŭ-gāi | Gāi nguòng-mā]

出門一笑莫心哀,浩蕩襟懷到處開。
時實難以無過立,達官非自有生來。
風濤回首空三島,塵壤從頭數九垓。
休信兒童輕薄語,嗤他趙老送燈臺。

力微任重久神疲,再竭衰庸定不支。
苟利國家生死以,豈因禍福避趨之?
謫居正是君恩厚,養拙剛於戍卒宜。
戲與山妻談故事,試吟斷送老頭皮。

頭蜀隻詩,首聯強作歡顏,表現了林則徐曠達倛胸懷;頷聯講自家問心無愧;頸聯譏諷英國無人才[注 1],講自家卜去遊歷各地;尾聯摒棄了「趙老送燈臺,一去更不來」茲蜀句蠻笑倛話[注 2][3]

第二首詩倛首聯,講自家老儂去了,故此體𣍐好,讓厝裏儂伓使憂慮;頷聯借了鄭國大夫子產倛「苟利社稷,死生以之」[注 3],詩歌臺中「國家」、「生死」、「禍福」、「避趨」是偏義詞,指「國」、「死」、「禍」、「避」[4],表現林則徐無管自家得失倛情懷[注 4];前四句乞頸聯做鋪墊,表現了伊忠君愛國倛思想;尾聯使典故[注 5]表達伊浩大倛氣度共樂觀倛精神[5]

寫詩之後[Siŭ-gāi | Gāi nguòng-mā]

林則徐野中意「苟利國家生死以,豈因禍福避趨之」茲兩句詩,野価吟誦來勉勵自家[注 6][5]。道光二十一年十二月十一號,林則徐遘漳州倛時候,復發舊疾,但是固使茲兩句詩勉勵自家,催促快快行墿。[1]

道光二十九年十一月廿一(1850年1月3號),林則徐帶老媽棺材轉福建倛時候,半墿中敆長沙碰著左宗棠來船裏勢拜見。講再見倛時候,林則徐親手寫「苟利國家生死以,豈因禍福避趨之」送左宗棠,之後左宗棠都使這對聯激勵自家。[6]

江澤民講話時,仈曾野稠講「苟利國家生死以,豈因禍福避趨之」茲兩句詩[7],伊見覺茲兩句會使鼓勵大家儂立志爲國[8]1989年,江澤民離開上海時,前任上海市市長汪道涵就使「苟利國家生死以,豈因禍福避趨之」送伊[9];江澤民做了中共中央總書記之後,總款講鄧小平聽:「人民將我安遘這位處,我定著鞠躬盡瘁,死而後已,做遘『苟利國家生死以,豈因禍福避趨之』。」[10][11]1990年6月23號,江澤民著廣東虎門林則徐故居寫了「苟利國家生死以,豈因禍福避趨之」倛對聯[12][13]2009年4月23號,退老倛江澤民訪問中國聯合工程公司時,複總款共大家儂罔講罔聽[14]

「我真𣍐會意,我就是蜀隻上海市委書記,快勢將我選遘北京去了,故此鄧小平同志共我攀講,講『中央都決定啦,汝來當總書記』,我講另請高明吧。我直直話,我也伓是謙虛,我蜀隻上海市委書記怎講來北京了嚕?但是嘛,小平同志講『大家都研究決定了』,故此之後我就念了兩首詩,就是『苟利國家生死以,豈因禍福避趨之』,噲故此我就來遘北京了哇。」[14]

因江澤民野稠使「苟利國家生死以,豈因禍福避趨之」,比如講「之後我就念了兩首詩,就是『苟利國家生死以,豈因禍福避趨之』」,故此這詩變成了膜蛤文化倛蜀部分,時行起去。中國野価網民伓講破,[15][16]掏伊去解悶、客佻溪,或者掏自家做蠻笑[17]

溫家寶敆記者招待會倛時候,講了三回「苟利國家生死以,其因禍福避趨之」,固將伊當作自家倛工作態度共信念。2003年3月,第十屆全國人大一次會議任命溫家寶做國務院總理,大會後,著記者招待會,溫家寶回答德新社記者關於工作風格倛問題時,回答講:「當選以後,我心裏勢都是默念林則徐倛兩句詩——苟利國家生死以,豈因禍福避趨之。嚽就是我今後工作倛態度。」 2008年,第十一屆全國人大一次會議第二回任命溫家寶做國務院總理。之後,伊複提及茲隻詩: 「我共大家儂當面立過誓言——苟利國家生死以,豈因禍福避趨之。今旦我固想加蜀句話,就是『天變不足畏,祖宗不足法,人言不足恤』。」 2012年,敆十一屆全國人大五次會議,溫家寶表達自家最後蜀屆任期倛心情時,總款共大家講: 「我秉承『苟利國家生死以,豈因禍福避趨之』倛信念,爲國家服務正正好四十五年,我爲國家、人民傾注了我全部倛熱情、心血共精力,未謀過私利。我敢去面對人民、面對歷史。」[18]

2013年3月,著中共中央黨校建校八十周年慶祝大會,習近平發表講話時講:「古人所講倛……『位卑未敢忘憂國』、『苟利國家生死以,豈因禍福避趨之』倛報國情懷……等等,都體現了中華民族倛優秀傳統文化共民族精神,儂家都應該繼承共發揚。」[19]

條目註解[Siŭ-gāi | Gāi nguòng-mā]

  1. 詩歌臺中倛「三島」就是英倫三島。
  2. 俚諺「趙老送燈臺,一去更不來」出自歐陽修《歸田錄》,「兒童」代指總款講倛儂。
  3. 出自《左傳·昭公四年》。
  4. 林則徐《致姚春木王冬壽書》:「自念禍福死生,早已度外置之,唯逆焰已若燎原,身雖放逐,安能委諸不聞不見?」
  5. 林則徐自註:「宋真宗聞隱者楊朴能詩,召對,問:『此來有人作詩送卿否?』對曰:『臣妻有一首云:更休落魄耽杯酒,且莫猖狂愛詠詩。今日捉將官里去,這回斷送老頭皮。』上大笑,放還山。東坡赴詔獄,妻子送出門,皆哭,坡顧謂曰:『子獨不能如楊處士妻作一首詩送我乎?』妻子失笑,坡乃去。」出自《東坡志林》。
  6. 林昌彝《射鷹樓詩話》: 「蓋文忠公矢志公忠,乃心王室,故二句詩常不去口。」

參考資料[Siŭ-gāi | Gāi nguòng-mā]

  1. 1.0 1.1 1.2 楊國楨. 林則徐傳. 人民出版社. 1995. ISBN 9787010007526. 
  2. 楊國楨. 林則徐論考. 福建人民出版社. 1989. 
  3. 中國古典詩詞精華類編:鄉情卷. 内蒙古大學出版社. 1996. 270. ISBN 9787810154123. 
  4. 鄒光椿. 林則徐名詩句的修辭解. 修辭學習. 1998, (5): 49-50. doi:10.16027/j.cnki.cn31-2043/h.1998.05.032. 
  5. 5.0 5.1 徐輝. 含淚的微笑——林則徐《赴戍登程口占示家人》賞析. 名作欣賞. 1998, (2): 82-84. 
  6. 孫良珠. 左宗棠全传. 崧博出版事業有限公司. 2017-01-27. 
  7. 鐘之成. 序言//爲了世界更美好: 江澤民出訪紀實. 世界知識出版社. 2006. ISBN 9787501228898. 
  8. 蔡清富. 江澤民的詩教. 北京支部生活. 2000, (8). 
  9. 高化民; 齐彪; 董志铭. 潮涌: 改革風雨路. 广西人民出版社. 1998. 242. ISBN 9787219038185. 
  10. 戚義明. 江澤民的歷史責任感. 黨的文獻. 2013, (3): 122-124. 
  11. 江澤民. 江澤民文選. 人民出版社. 2006. 336. 
  12. 1990年6月23日江澤民參觀鴉片戰爭博物館時的題詞. 鴉片戰爭博物館. [2017-07-23]. 
  13. 張紹誠. 林則徐謫戍詩淺析. 文史雜誌. 2002, (2): 77. 
  14. 14.0 14.1 Peter, Ho. 網突流傳江澤民短片 自曝89.64前推讓總書記. 2011-10-28 [2017-07-23]. 
  15. 梓鵬. 觀察:為什麽中國網友給中共“長者”祝壽?. BBC 中文網. [2017-07-23]. 
  16. 《大事件》編輯部. 《大事件》第60期: 習江互動微妙. 大事件雜誌社. 2016-08-30. ISBN 9781681821450. 
  17. 膜蛤吃瓜趙家人 三大流行語透析中國. 多維新聞網. [2017-07-23]. 
  18. 王春永. 溫家寶總理經典引句解說. 中華書局(香港)出版有限公司. 2008-07-01. 40-41. ISBN 9789622310414. 
  19. 安東. 習近平經典引句解讀. 中華書局(香港)出版有限公司. 2015-03-09. 25. ISBN 9789888310951. 
Wikisource
Wiki Dù-cṳ̆-guāng ô guăng-ṳ̀ 赴戍登程口占示家人 gì cṳ̆ (Ĭng-ngṳ̄).
維基圖書館有關於赴戍登程口占示家人其書(英語)。