Báik-gă-cióng

Báik-gă-cióng (八家將) hĕ̤k-ciā hô̤ lā̤ Báik-cióng (八將), Báik-cióng-iè (八將爺), Cióng-iè (將爺), sê Dô̤-gáu diē-sié gì sìng, dŭ-liāng ô ciáh, ĭ-gáuk-nè̤ng sê Ngū-dá̤ â-dā̤ ciŏng-muòng niăh gūi gì ciŏng-gŭng.

Hók-ciŭ gì Báik-cióng sê Huâng Sêu (范壽), Iù Guóng (尤券), Iòng Báik (楊八), Liū Chék (柳七), Ĕu Siè (歐蛇), Lī Nēu (李鳥), Uòng Hū (王虎), Ngà̤ Lṳ̀ng (倪龍). Gô-dā̤ găk nùng-lĭk lĕ̤k-nguŏk, chék-nguŏk gì sèng-âu tiĕng-ké cêng iĕk, cêng sèu huák-sĕng ŭng-ĭk, Hók-ciŭ nè̤ng gó-nâ-háng sê gūi hâi gì, â̤ có̤ siŏh ciáh hô̤ lā̤ "chók-hāi" (出海) ngì-sék lì ciŏng gūi dṳ̆k kó̤. Ciā ngì-sék gì sèng gūi gĕ̤ng â̤ kó̤ Ngū-dá̤ gì miêu diē-sié chiāng Báik-cióng dṳ̆k gūi, hô̤ lā̤ "chiāng-chióng" (請將). Ciā ngì-sék găk Ùng-gáik ī-hâiu ké̤ṳk dìng âi lāu. Báik-cióng-ū (八將舞) sê gĭng-dáng Chŏng-săng-kṳ̆ gì hŭ-ŭk-cék ùng-huá mì-sāng.

Dài-uăng gì Báik-gă-cióng sê Găng Ciŏng-gŭng (甘將軍), Liū Ciŏng-gŭng (柳將軍), Siâ Ciŏng-gŭng (謝將軍), Huâng Ciŏng-gŭng (范將軍), Chŭng Dâi-sìng (春大神), Hâ Dâi-sìng (夏大神), Chiŭ Dâi-sìng (秋大神), Dĕ̤ng Dâi-sìng (冬大神); iâ ô sèng-âu gái gă siông Ùng Puáng-guăng (文判官), Ū Puáng-guăng (武判官) lâng ciáh cà̤ hô̤ lā̤ Sĕk-gă-cióng (什家將).