Ciéu-tiĕng-gŭng

Ciéu-tiĕng-gŭng (照天君) sê Hók-ciŭ mìng-găng gé̤ṳng gì siŏh ciáh sìng. Ciā sìng gâe̤ng sṳ̀ng-chéu séng-ngiōng ô găng-guó.

Ciéu-tiĕng-gŭng buōng-dā̤ sê Nàng-muòng-dău gâe̤ng Dà-dìng hó-gê̤ṳng gì nè̤ng gé̤ṳng gì sìng, sê Mìng-uŏk-gīng (閩越境) gì Buōng-gī Dâi-uòng. Ă-piéng Ciéng-cĕng sèng-âu, Nàng-muòng-dău Ó̤-muōi-háe̤ng (澳尾巷) hó-gê̤ṳng ô iā sâ̤ diè-giāng kă̤-giāng. Ô siŏh dèu kó̤ Bŏng-biĕng-chŏng (幫邊村) gì siŏh-bēng-diô, gĭng-guó diè-giāng gì dê-huŏng biĕng-dău ô sé dău sṳ̀ng-chéu, hŭ-uái diô mâ̤ bàng, giàng-iâ-diô gì nè̤ng iā sèu dâung cūi lā̤ céng sī. Ô siŏh buŏ, siŏh ciáh nè̤ng giàng gáu sṳ̀ng-chéu â-dā̤, săng-mŭk-siŏh-sì káng-giéng huōi-guŏng dàng lā̤ diô-méng iā guŏng, ī-hâiu buŏ buŏ dŭ sê săng ciŏng-uâng. Báh-sáng nêng-ùi sê sìng, găk chéu â kī siŏh ciáh kăng gé̤ṳng ĭ, hô̤ ciā sìng hô̤ lā̤ "Ciéu-tiĕng-gŭng", ī sìng-chiông kŭi-ngāng gì hī gĕ̤ng chék-nguŏk sĕk-gāu có̤ ĭ gì săng-nĭk. Ī-hâiu sṳ̀ng-chéu dŭ sĕng--kó̤, sìng-chiông ké̤ṳk buăng gáu hó-gê̤ṳng gì Ciék-lṳ̀ng-dìng (接龍亭) gié-sṳ̆k gé̤ṳng. Ciā Ciék-lṳ̀ng-dìng găk gĭng-dáng Dài-gĕ̤ng-kṳ̆ Dĕ̤ng-să̤-ò̤ (東西河) ò̤-gièng, diŏh Băh-mā Huă-huòng (白馬花園) ciā siēu-kṳ̆ gì piăng-âu, ĭ iâ sê Giū-áng Tái-săng gì Hàng-tàu-dòng.

Gó ô siŏh cṳ̄ng gōng-huák, gōng ciā Ciéu-tiĕng-gŭng buōng-miàng Ciéu Tiĕng-cê̤ṳ (照天柱), 881 nièng găk Lièng-gŏng chók-sié, 16 huói găk Siók-hŭng-sê chók-gă, ī-hâiu ké̤ṳk Uòng Sīng-dĭ chiāng kó̤ có̤ Dĕ̤ng-muòng ngiê-dāu Bó̤-guók Cṳ̆-séng Sièng-iêng (報國資聖禪院) gì dŏng-gă. Ī-hâiu, Uòng Iòng-gĭng ù-dô̤ (無道), ĭ cāu kó̤ biĕk-dó̤i cīng-géu báh-sáng, có̤i-cṳ̆ng găk siŏh dău sṳ̀ng-chéu â-dā̤ dáik-dô̤ (得道). Báh-sáng gāng-siâ ĭ, kī miêu gé̤ṳng ĭ, gó̤ ĭ "Ciéu-tiĕng-gŭng". Găk Chŏng-săng-kṳ̆ Gŏ̤-gái-săng iâ ô siŏh ciáh Ciéu-tiĕng-gŭng gì cū-dâing, hô̤ lā̤ Nàng-tiĕng Ciéu-tiĕng-gŭng Dô̤-diòng.

Gĭng-dáng có̤i chók-mièng gì Ciéu-tiĕng-gŭng miêu găk Céng-ăng-kṳ̆ Gĭng-giĕ-săng gì Nàng-tiĕng Ciéu-tiĕng-gŭng-gṳ̆ng.