Dāu-diè-siâ
 | Cī piĕng ùng-ciŏng ô Háng-cê gì bēng-buōng. Chăng-kō̤ ĭ gì Háng-cê bēng-buōng. 參考伊其漢字版本。 |
| Dāu-diè-siâ | |
|---|---|
|
斗池社 | |
| Cŭng-gáu | |
| Cŭng-gáu |
Dô̤-gáu Dṳ̆ng-guók mìng-găng séng-ngiōng |
| Ôi-dé | |
| Ôi-dé | Hók-gióng Hók-ciŭ Gū-làu Dāu-diè Sĭng-chŏng B kṳ̆ Nguŏk-dāu Guōng-diòng |
| Guók-gă |
 Dṳ̆ng-guók |
| Cô̤-biĕu | 26°4′24.89″N 119°17′5.71″E / 26.0735806°N 119.2849194°E |
| Dê-dù | |
 | |
Dāu-diè Cūng-siâ (斗池總社), gāng-chĭng Dāu-diè-siâ (斗池社), iâ hô̤ lā̤ Dāu-diè-dòng (斗池堂), sê Hók-ciŭ gì siŏh ciáh miêu, găk Gū-làu-kṳ̆ Dāu-diè Sĭng-chŏng (斗池新村) B kṳ̆ diē-sié gì Nguŏk-dāu Guōng-diòng (玉斗廣場). Ciā miêu sê Dô̤-gáu Giū-áng Tái-săng gì 13 ciáh dòng cĭ ék, sṳ̆k Hô̤-mìng-gīng (護民境), ngiàng-sìng gâe̤ng muóng-buŏi gì sèng-âu sṳ̆k Dāu-diè-áng (斗池案).
Ciā miêu nguòng-dā̤ găk Dāu-diè-chŏng (斗池村). Nguòng-lài Dāu-diè-chŏng ô Ngū-dá̤-miêu (五帝廟) gâe̤ng Dāu-diè-siâ lâng găng miêu. 1990 nièng Dāu-diè-chŏng nguòng-cháik-nguòng-chiĕng (原拆原遷), lâng găng miêu ké̤ṳk dĭk-ciék tiáh lâi, mò̤ dó̤i buòi cièng. Hī sèng-âu Dāu-diè-chŏng sê ô cièng mò̤ dó̤i kī miêu, gó-hō̤ duâi-buô-hông hiŏng-lī dŭ buăng diē sĭng kī gì Dāu-diè Sĭng-chŏng diêu, có̤i cṳ̆ng dâi-gă-nè̤ng mò̤-niĕ-ài ciŏng Dāu-diè Sĭng-chŏng diē-sié lâu-nè̤ng-huôi gì nê cèng gāi siàng lâng găng sĭng gì miêu, cêu sê găk gĭng-dáng B kṳ̆ gì Nguŏk-dāu Guōng-diòng cŭ-uái. 2011 nièng, Dāu-diè-siâ găk muóng-buŏi gì sèng-âu ké̤ṳk sōng có̤ sĭng-áng (新案), dĕk-lìng-é diŏh ngiê-dāu gái kī siŏh ciáh tiék-puòi-bùng lì sô̤i bù-sák, ciā tiék-puòi-bùng gáu gĭng-dáng gó găk lā̤.
Dāu-diè-siâ Buōng-dā̤ gé̤ṳng Giū-áng Tái-săng â-dā̤ gì Bĭng-mā Dâi-dŭ-dók (兵馬大都督). Buōng-dê Dâi-uòng sê Bái-gūi-nièng ī-hâiu ciáh chiāng diē lì gì. 1990 nièng Dāu-diè cháik-chiĕng gì sèng-âu, bék-dó̤i gì Ngū-dâi Nguòng-só̤i (五大元帥, Dâing, Hò̤, Liēu, Uòng, Dìng), Lìng-cūi-nā̤, Ŭ-săng Siĕng-sṳ̆ (烏山仙師), Sìng-uòng-iè (神王爺) dēng-dēng gì sìng ĭng-ôi cháik-chiĕng mò̤ miêu, iâ ké̤ṳk chiāng diē lì gé̤ṳng.