Dūng Hông

Dūng Hông (董奉, ?  – 280 nièng ) sê Dṳ̆ng-guók Dĕ̤ng-háng muăk-gĭ gáu Săng-guók sì-gĭ gì siŏh ciáh Dṳ̆ng-ĭ ĭ-sĕng, ĭ gâe̤ng Huà Dò̤, Diŏng Dê̤ṳng-gīng cà̤ hô̤ lā̤ "Gióng-ăng Săng Sìng-ĭ" (建安三神醫).

Dūng Hông ciā nè̤ng sê Âu-guăng-gâing (侯官縣) Dūng-gièng-chŏng (董墘村) nè̤ng, ciā dê-huŏng cêu sê gĭng-dáng Hók-ciŭ Diòng-lŏ̤h Gū-huài-déng (古槐鎮) gì Chĭng-săng-chŏng (青山村). Ĭ káng-bâing mò̤ siŭ lā̤ ng-dĭk cièng, nâ huáng bâng-nè̤ng găk ĭ muòng-sèng căi hâing chéu, bâng kĭng căi siŏh dău, bâng dâe̤ng căi ngū dău. Cêu ciŏng-uâng siŏh nièng siŏh nièng tié-lāu căi tié-lāu căi, căi siàng siŏh piéng hâing-lìng. Hâing-ìng sṳ̆k--kó̤ ī-hâiu, ĭ kī siŏh ciáh chŏng-kó̤ ĕng cuòi, kĕk hâing-ìng uâng mī, gái dò̤ mī kó̤ ciék-cá̤ báh-sáng.

Dūng Hông ké̤ṳk Hók-ciŭ-nè̤ng hông có̤ sìng, hô̤ lā̤ Iŏh-uòng-cū-sṳ̆ (藥王祖師) hĕ̤k-ciā Hâing-lìng-cū-sṳ̆ (杏林祖師). Gĭng-dáng Diòng-lŏ̤h ô Dūng-hông-săng (董奉山), kĕk ĭ miàng-cê lì gé-niêng ĭ. Săng-dīng ô ĭ liêng-dăng gì gū-cék, săng-kă ô siŏh ciáh "Hâing-lìng sṳ̄-cū Dūng Hông chāu-dòng" (杏林始祖董奉草堂). Hók-ciŭ gì Ò̤-siông Géu-sĕng-dòng iâ sê gé̤ṳng ĭ gì.