Tái-bìng-săng-dòng
Chăng-kō̤ Mìng-dĕ̤ng-ngṳ̄ Háng-cê gì bēng-buōng. / 參考閩東語漢字其版本。
| Giū-áng Tái-săng-hū Tái-bìng-săng-dòng | |
|---|---|
|
九案泰山府太平山堂 | |
| Cŭng-gáu | |
| Cŭng-gáu |
Dô̤-gáu Dṳ̆ng-guók mìng-găng séng-ngiōng |
| Ôi-dé | |
| Ôi-dé | Hók-gióng Hók-ciŭ Dài-gĕ̤ng Tái-bìng Nê-lâe̤ng 44 hô̤ |
| Guók-gă |
 Dṳ̆ng-guók |
| Cô̤-biĕu | 26°3′51.08″N 119°17′49.24″E / 26.0641889°N 119.2970111°E |
| Gióng-dê̤ṳk | |
| Kī gì sì-găng | 636 nièng |
| Dê-dù | |
 | |
Tái-bìng-săng-dòng (太平山堂) sê Hók-ciŭ Dài-gĕ̤ng gì siŏh ciáh miêu, găk Dài-gĕ̤ng-kṳ̆ Tái-bìng Nê-lâe̤ng (太平二弄) 44 hô̤, Giū-áng Tái-săng-hū Cūng-dòng (九案泰山府總堂) gâe̤ng ciā dòng kī diŏh siŏh-dŏ̤i. Ciā miêu sê Dô̤-gáu Giū-áng Tái-săng gì 13 ciáh dòng cĭ ék, siŏh Sĭk-buô-gīng (石部境), ciō-iéu gé̤ṳng Kŏng Săng-sié-cṳ̄ (康三世子), Uòng Dâi-ìng (王大人), iâ ô gé̤ṳg Cê̤ṳ-sêu-sĭ (注壽司), Tiàng Cŏng-uòng (程尊王), Mā Hŭ-ìng (馬夫人), Hṳ̄ Cĭng-gŭng (許真君), Huŏng Duâi-nā̤ (方大奶) dēng-dēng sìng-mìng. Tái-bìng-săng-dòng ngiàng-sìng gâe̤ng muóng-buŏi gì sèng-âu sṳ̆k Tái-bìng-săng-áng (太平山案), iâ sê muōi siŏh nièng chăng-gă ngiàng-sìng nè̤ng có̤i sâ̤ gì siŏh ciáh dòng.
Tái-bìng-săng-dòng sê Giū-áng Tái-săng diē-sié có̤i cā kī gì siŏh ciáh dòng, ô chă-bók-dŏ̤ chiĕng gūi nièng gì lĭk-sṳ̄. Dòng-dièu Dĭng-guăng (貞觀) 2 nièng (636 nièng), Tái-bìng-săng-chŏng (太平山村) gì nè̤ng téng Hók-ciŭ siàng-báe̤k gì Dŭng-ngŏk-miêu (東嶽廟) chiāng lì Ŭng, Kŏng lâng ciáh ciŏng-gŭng gì hiŏng-huōi, diŏh Tái-bìng-săng dīng kī ciā miêu lì gé̤ṳng. Chă-bók-dŏ̤ Mìng-dièu, Chĭng-dièu sì-gĭ, Nàng-dài Sĕk-săng-hiŏng (南臺十三鄉) huák-sĕng ŭng-bâng, cêng sâ̤ nè̤ng gāng-niēng, nâ ô gé̤ṳng lâng ciáh ciŏng-gŭng gì Tái-bìng-săng-chŏng sêu-căi có̤i kĭng, gó-chṳ̄ hó-gê̤ṳng gì chŏng dŭ lièng-hăk kī-lì gé̤ṳng lâng ciáh ciŏng-gŭng, ī-giù bō̤-iêu, có̤i muōi huák-diēng siàng Giū-áng Tái-săng gì séng-ngiōng. Ùng-gáik gì sèng-âu miêu ké̤ṳk pó̤-huâi kó̤. 1991 nièng tṳ̀ng-siŭ gì sèng-âu kī Giū-áng Tái-săng-hū Cūng-dòng, ciŏng hó-gê̤ṳng cháik-chiĕng gì Buōng-dê Dâi-uòng chiāng diē lì gé̤ṳng. 2016 nièng, ciā miêu găk hó-gê̤ṳng cháik-chiĕng gì sèng-âu chă-nék-giāng iâ ké̤ṳk tiáh lâi, gĭng-guó hiĕk-siŏng có̤i-cṳ̆ng mò̤ tiáh, gâe̤ng hó-gê̤ṳng gì Chŏng-hà Cĭng-ìng-miêu hăk siŏh-dŏ̤i, bô ciŏng hó-gê̤ṳng cháik-chiĕng mò̤ dó̤i sô̤i gì sìng dŭ chiāng diē lì.