Tái-bìng-săng-dòng

Tái-bìng-săng-dòng (Giū-áng Tái-săng-hū) (Chŏng-hà Cĭng-ìng-miêu)
太平山堂 (九案泰山府) (苍霞真人庙)
Cŭng-gáu
Cŭng-gáu	Dô̤-gáu Dṳ̆ng-guók mìng-găng séng-ngiōng
Ôi-dé
Ôi-dé	Hók-gióng Hók-ciŭ Dài-gĕ̤ng Tái-bìng Nê-lâe̤ng 44 hô̤
Guók-gă	Dṳ̆ng-guók
Cô̤-biĕu	26°3′51.08″N 119°17′49.24″E
Gióng-dê̤ṳk
Kī gì sì-găng	636 nièng
Dê-dù

Tái-bìng-săng-dòng (太平山堂) sê Hók-ciŭ Dài-gĕ̤ng gì siŏh ciáh miêu, găk Dài-gĕ̤ng-kṳ̆ Tái-bìng Nê-lâe̤ng (太平二弄) 44 hô̤, Chŏng-hà Cĭng-ìng-miêu (蒼霞真人廟) gâe̤ng ciā dòng kī diŏh siŏh-dŏ̤i. Ciā miêu sê Dô̤-gáu Giū-áng Tái-săng gì 13 ciáh dòng cĭ ék, siŏh Sĭk-buô-gīng (石部境), ciō-iéu gé̤ṳng Kŏng Săng-sié-cṳ̄ (康三世子), Uòng Dâi-ìng (王大人), iâ ô gé̤ṳg Cê̤ṳ-sêu-sĭ (注壽司), Tiàng Cŏng-uòng (程尊王), Mā Hŭ-ìng (馬夫人), Hṳ̄ Cĭng-gŭng (許真君), Huŏng Duâi-nā̤ (方大奶) dēng-dēng sìng-mìng. Tái-bìng-săng-dòng ngiàng-sìng gâe̤ng muóng-buŏi gì sèng-âu sṳ̆k Tái-bìng-săng-áng (太平山案), iâ sê muōi siŏh nièng chăng-gă ngiàng-sìng nè̤ng có̤i sâ̤ gì siŏh ciáh dòng.

Giū-áng Tái-săng táu-dā̤ mò̤ "cūng-dòng" (總堂) gì gái-niêng. Dáng-sê áng céng-hū giĕ-dêng, sū-iū mìng-găng séng-ngiōng dŭ diŏh ô cūng-dòng, Tái-bìng-săng-dòng cêu ī "Giū-áng Tái-săng-hū" (九案泰山府) gì miàng-cê ció-cháik siàng ciā séng-ngiōng gì cūng-dòng.

Lĭk-sṳ̄

Tái-bìng-săng-dòng sê Giū-áng Tái-săng diē-sié có̤i cā kī gì siŏh ciáh dòng, ô chă-bók-dŏ̤ chiĕng gūi nièng gì lĭk-sṳ̄. Dòng-dièu Dĭng-guăng (貞觀) 2 nièng (636 nièng), Tái-bìng-săng-chŏng (太平山村) gì nè̤ng téng Hók-ciŭ siàng-báe̤k gì Dŭng-ngŏk-miêu (東嶽廟) chiāng lì Ŭng, Kŏng lâng ciáh ciŏng-gŭng gì hiŏng-huōi diōng lì gé̤ṳng. Dâi-kái diŏh Dòng-dièu muăk-gĭ gáu Sóng-dièu chĕ̤-gĭ gì sèng-âu, Nàng-dài Sĕk-săng-hiŏng (南臺十三鄉) huák-sĕng ŭng-bâng, cêng sâ̤ nè̤ng gāng-niēng, nâ ô gé̤ṳng lâng ciáh ciŏng-gŭng gì Tái-bìng-săng-chŏng sêu-căi có̤i kĭng, gó-chṳ̄ hó-gê̤ṳng gì chŏng dŭ lièng-hăk kī-lì gé̤ṳng lâng ciáh ciŏng-gŭng, ī-giù bō̤-iêu, gáu muōi huák-diēng siàng Giū-áng Tái-săng gì séng-ngiōng. Ùng-gáik gì sèng-âu miêu ké̤ṳk pó̤-huâi kó̤, Mìng-dièu có̤ gì lâng ciáh ciŏng-gŭng gì sìng-chiông iâ ké̤ṳk siĕu lâi. Bái-gūi-nièng, chŏng-mìng cĭk-cṳ̆ 15 uâng dó̤i cièng mā̤ siŏh lŏ̤h chió, tṳ̀ng-sĭng kī ciā Tái-bìng-săng-dòng. Gāu-gūi-nièng, cŭng-gáu céng-cháik bóng-sĕ̤ng, Tái-bìng-săng-dòng huák-dông Sĕk-săng-hiŏng giŏng-kuāng mā̤ diōng Tái-bìng-săng-dòng gì gô-dê, dáng-sê mò̤ cièng kī chió. Ciáng-hō̤ Chŏng-hà Cĭng-ìng-miêu cháik-chiĕng, dò̤ gáu 90 uâng cháik-chiĕng-kuāng, mò̤ dó̤i tō̤ dê. Tái-bìng-săng-dòng cêu iĕu-chiāng ĭ-gáuk-nè̤ng hăk lā̤ kī miêu. Cêu ciŏng-uâng, Sĕk-săng-hiŏng bô giŏng-kuāng 40 uâng, ciŏng lâng ciáh miêu dŭ kī kī lì, gă guá (加掛) "Chŏng-hà Cĭng-ìng-miêu" (蒼霞真人廟) gì bà̤-bà̤, hìng-siàng hiêng-câi gì iông-sék.

Gĭng-dáng Tái-bìng-săng-dòng diē-sié dṳ̀-kó̤ sô̤i Giū-áng Tái-săng gì bù-sák, gó bău-guák Buōng-dê Dâi-uòng dēng-dēng gì bù-sák, dŭ sê hó-gê̤ṳng cháik-chiĕng mò̤ dó̤i sô̤i, iâ ké̤ṳk chiāng diē lì gé̤ṳng. Găng-biáh gì Chŏng-hà Cĭng-ìng-miêu diē-sié sô̤i gì sê Chŏng-hà Cĭng-ìng (蒼霞真人), iâ hô̤ lā̤ Ngū-gók Cĭng-ìng (五穀真人), Ngū-gók Cĭng-gŭng (五穀真君), Diŏng Cĭng-ìng (張真人), miàng Diŏng Séng (張信), cū-miêu găk Mìng-âu Siông-gă̤ gì Kă̤-nguòng-gṳ̆ng (溪源宮). Mìng-dièu sèng-âu, Chŏng-hà-ciŭ (蒼霞洲) Dìng (陳), Gŏ̤ (高), Dó̤h (卓) săng sáng duâi-hô̤ có̤-máe̤ng ciā Diŏng Cĭng-ìng lì Chŏng-hà, cêu diŏh Chŏng-hà-ciŭ iâ kī siŏh ciáh miêu lì gé̤ṳng ĭ. 1881 nièng (Guŏng-sê̤ṳ 7 nièng) Hók-ciŭ duâi có̤-âng, Mìng Ciék cūng-dók (閩浙總督) gáu ĭ Chŏng-hà-ciŭ gì miêu kó̤ bái, giék-guō dâung-ṳ̄, gó-chṳ̄ hŭng có̤ "Ngū-gók Cĭng-gŭng". Chŭi-iòng-gōng lâng ciáh miêu kī diŏh siŏh-dŏ̤i, Chŏng-hà Cĭng-ìng gâe̤ng Giū-áng Tái-săng gì séng-ngiōng gŏng-buōng mò̤ găng-guó, Chŏng-hà Cĭng-ìng-miêu gâe̤ng Giū-áng Tái-săng hó-siŏng mâ̤ kó̤ chăng-gă dó̤i-huŏng gì ngiàng-sìng dēng-dēng uăk-dông.