Hàng-tàu Duâi-dòng

Hàng-tàu Duâi-dòng (Ciék-lṳ̀ng-dìng Nàng-tiĕng-ciéu Tiĕng-gŭng Cū-dâing)
涵头大堂 (接龙亭南天照天君祖殿)
Cŭng-gáu
Cŭng-gáu	Dô̤-gáu Dṳ̆ng-guók mìng-găng séng-ngiōng
Ôi-dé
Ôi-dé	Hók-gióng Hók-ciŭ Dài-gĕ̤ng Ŭ-săng-lô 87 hô̤
Guók-gă	Dṳ̆ng-guók
Cô̤-biĕu	26°4′28.42″N 119°17′20.40″E
Dê-dù

Hàng-tàu Duâi-dòng (涵頭大堂), gāng-chĭng Hàng-tàu-dòng (涵頭堂), bô hô̤ lā̤ Ciék-lṳ̀ng-dìng Nàng-tiĕng-ciéu Tiĕng-gŭng Cū-dâing (接龙亭南天照天君祖殿), sê Hók-ciŭ Dài-gĕ̤ng gì miêu, găk Dài-gĕ̤ng-kṳ̆ Ŭ-săng-lô (烏山路) 87 hô̤, ciō-iéu gé̤ṳng Cŭng-ngŏk Dâi-ciŏng-gŭng (宗岳大將軍). Ciā miêu sê Dô̤-gáu Giū-áng Tái-săng gì 13 dòng cĭ ék, sṳ̆k Ò̤-dĕ̤ng Hô̤-mìng-gīng (河東護民境), ngiàng-sìng gâe̤ng muóng-buŏi gì sèng-âu sṳ̆k Dāu-diè-áng (斗池案).

Hàng-tàu-dòng nguòng-lài găk Hàng-tàu-chŏng, 2000 nièng Hàng-tàu-chŏng cháik-chiĕng, duâi-buô-hông gṳ̆-mìng dŭ buăng bék-dó̤i kó̤. Dâ̤ nê nièng, Hàng-tàu-dòng buăng gáu hó-gê̤ṳng gì Băh-mā Huă-huòng (白馬花園) biĕng-dău tṳ̀ng-sĭng kī. Ciā sĭng miêu diŏh Dĕ̤ng-să̤-ò̤ (東西河) gièng. Hiêng-câi Hàng-tàu-dòng diē-sié gé̤ṳng gì ciō-sìng sê Buōng-dê Dâi-uòng; sê-sìng sê Cŭng-ngŏk Tái-săng nô̤i-gák (宗岳泰山內閣), bău-guák Cŭng-ngŏk Dâi-ciŏng-gŭng (宗岳大將軍, Cŭng-ngŏk Tái-săng Diŏng Sé̤ṳ Diŏng Chiĕng-suói Hô̤-gá Dâi-ciŏng-gŭng 宗岳泰山張泗張千歲護駕大將軍), Cŭng-ngŏk Tái-săng nô̤i-gák Cō̤-dâi-sìng "Hŭng" (宗岳泰山內閣左大臣"風"), Cŭng-ngŏk Tái-săng nô̤i-gák Iêu-dâi-sìng "Huòng" (宗岳泰山內閣右大臣"皇"), Cŭng-ngŏk Tái-săng Dṳ̆ng-gŭng Dâi-sìng Dó̤h Hŭng-mìng (宗岳泰山中軍大臣卓風明), Cŭng-ngŏk Tái-săng Kṳ̆-mĭk Dâi-sìng (宗岳泰山樞密大臣), Cŭng-ngŏk Tái-săng Bĭng-mā Cūng-dŭ-dók (宗岳泰山兵馬總都督). Gó ô gé̤ṳng Siĕng-iè (仙爺), Uòng-iè (王爺), Báe̤k-cá̤ Cŏng-uòng (北濟尊王), Lìng-cūi-nā̤, Gàu-séng-uòng dēng-dēng cêng sâ̤ gì sìng-mìng.

Hàu-tàng-dòng sê 2008 nièng ī-hâiu ciáh kăi-sṳ̄ gă guá (加掛) "Ciék-lṳ̀ng-dìng Nàng-tiĕng-ciéu Tiĕng-gŭng Cū-dâing" (接龙亭南天照天君祖殿) gì bà̤-bà̤ gì. Ciā "Ciék-lṳ̀ng-dìng Nàng-tiĕng-ciéu Tiĕng-gŭng Cū-dâing" sê Hók-gióng-sēng Mìng-cŭk Cūng-gáu Sê̤ṳ-ô-tiăng (福建省民族宗教事務廳) nêng-dêng gì cŭng-gáu uăk-dông diòng-sū, "Hàng-tàu Duâi-dòng" ng-sê. Ciéu-tiĕng-gŭng (照天君) gì séng-ngiōng gâe̤ng Giū-áng Tái-săng gŏng-buōng mò̤ găng-guó, Ciéu-tiĕng-gŭng Cū-dâing gâe̤ng Giū-áng Tái-săng hó-siŏng mâ̤ kó̤ chăng-gă dó̤i-huŏng gì ngiàng-sìng dēng-dēng uăk-dông. Ciā Ciéu-tiĕng-gŭng Cū-dâing buōng-dā̤ sê găk Dà̤-dìng-ò̤ gièng, gê̤ṳ-liê Hàng-tàu-dòng mâ̤ huông, cĭ-hâiu ĭng-ôi cháik-chiĕng buăng gáu Ŭ-săng kó̤. Ĭng-ôi iā sâ̤ nè̤ng kó̤ hŭ-uái siĕu-hiŏng, īng-hiōng gáu Hók-ciŭ-chê céng-hū gì gĕ̤ng-cáuk, 2008 nièng ké̤ṳk iĕu-giù buăng kó̤ Gĭng-giĕ-săng, kī siàng hiêng-câi gì Nàng-tiĕng Ciéu-tiĕng-gŭng-gṳ̆ng. Ciéu-tiĕng-gŭng-gṳ̆ng guāng-ūi-huôi gì buô-hông nè̤ng hièng hŭ-uái káh huông, giók-dêng diŏh hó-gê̤ṳng tō̤ dê, có̤i-cṳ̆ng sōng-dĕk diŏh Hàng-tàu-dòng, Hàng-tàu-dòng iâ dùng-é ciŏng Ciéu-tiĕng-gŭng chiāng diē lì. Hiêng-câi miêu gì sèng-dāu gé̤ṳng gì sê Ciéu-tiĕng-gŭng, piăng-âu sê Hàng-tàu-dòng. Iā sâ̤ séng Ciéu-tiĕng-gŭng lì cŭ-uái siĕu-hiŏng, dáng-sê ĭ-gáuk-nè̤ng dó̤i Giū-áng Tái-săng liēu-gāi cêng ciēu.