Ngū-dá̤
Ngū-dá̤ (五帝), ciòng miàng Ngū-hók Dâi-dá̤ (五福大帝), sê Dô̤-gáu diē-sié gì guāng ŭng-ĭk gì sìng-mìng, ī-hâiu ké̤ṳk mìng-găng hông có̤ dṳ̆k--kó̤ ŭng-ĭk gì sìng. Ciā sìng ké̤ṳk Hók-ciŭ-nè̤ng hông có̤ hiŏng-tū gì siū-hô̤-sìng. Ngū-dá̤ dŭ-liāng ô 5 ciáh sìng, buŏng dĕ̤ng, să̤, nàng, báe̤k, dṳ̆ng, muōi ciáh sìng guāng ciáh huŏng-ôi. Â-dā̤ gì buô-hâ ô Ĭng-iòng-sĭ (陰陽司), Liòng-nguông-sĭ (良願司), Sùng-áng-sĭ (巡按司), Cūi-chái-sĭ (水菜司), Ciōng-kó̤-sĭ (掌庫司), Sùng-ŭ-sĭ (巡塢司) dēng-dēng.
Ngū-dá̤ guāng gì huŏng-ôi
[Siŭ-gāi | Gāi nguòng-mā]Ngū-dá̤ gáuk ciáh guāng gì huŏng-ôi sê:[1]
Dṳ̆ng: Hiēng-lìng-gŭng Diŏng Nguòng-báik (顯靈公張元伯), ngū-hèng sṳ̆k tù, uòng-sáik méng
Dĕ̤ng: Éng-lìng-gŭng Cṳ̆ng Sê̤ṳ-séu (應靈公鍾士秀), ngū-hèng sṳ̆k mŭk, liŏh-sáik méng
Să̤: Sŏng-lìng-gŭng Làu Nguòng-dăk (宣靈公劉元達), ngū-hèng sṳ̆k gĭng, băh-sáik méng
Nàng: Iòng-lìng-gŭng Sṳ̄ Ùng-ngiĕk (揚靈公史文業), ngū-hèng sṳ̆k huō, è̤ng-sáik méng
Báe̤k: Céng-lìng-gŭng Diêu Guŏng-mìng (振靈公趙光明), ngū-hèng sṳ̆k cūi, ŭ-sáik méng
Chók-hāi
[Siŭ-gāi | Gāi nguòng-mā]Nùng-lĭk lĕ̤k-nguŏk, chék-nguŏk gì sèng-âu, Dài-gĕ̤ng gì nè̤ng dŭ â̤ có̤ siŏh ciáh miàng hô̤ "chók-hāi" (出海) gì ngì-sék, iâ hô̤ lā̤ "Lĕ̤k-nguŏk-huôi" (六月會). Muōi nièng ngū-nguŏk chĕ̤-lĕ̤k, Ngū-dá̤ kŭi-dòng bâing-áng. Sĕng iù Gèng-gŏ̤ Ā̤-báik giàng sèng-dău, gì-tă sìng giàng ĭ piăng-âu, Ngū-dá̤ găk có̤i-hâiu, mŭk-dĭk sê niăh áuk-gūi. Ngū-dá̤ săng gì iông-sék dŭ cêng--kó̤ chiăng-giăng, gó-chṳ̄ Hók-ciŭ-uâ ô siŏh guó uâ hô̤ lā̤ "ké̤ṳk Ngū-dá̤ niăh kó̤" (乞五帝搦去), é-sé̤ṳ sê má nè̤ng kó̤ sī. Ciék-giâ-lì sê dáe̤k-sìng (撞神), Gèng-gŏ̤ Ā̤-báik sùng-iâ niăh cāu--kó̤ gì áuk-gūi. Cĭ-hâiu gēng siŏh gĕ̤ng có̤ "sùng-iù" gì ngì-sék. Ciā nĭk kĕk cāi cák siŏh ciáh sùng. Gái ciŏng dṳ̆-háik, giĕ-mò̤ dēng-dēng lă-că-nó̤h biáng tĕ̤ng-tĕ̤ng lā̤ káing kī lì, dâi-biēu ciŏng áuk-gūi guŏng tĕ̤ng-tĕ̤ng lā̤ kó̤, ciā tĕ̤ng-tĕ̤ng hô̤ lā̤ "Hók-tē̤ng" (福桶). Dāng iù Gèng-gŏ̤ Ā̤-báik dâi-dô̤i, gáu ciáh sìng gŏng lā̤ hâ Hók-tē̤ng gì cāi-sùng, ká̤-ká̤ bié gáu Mìng-gĕ̤ng biĕng, ciŏng ĭ buóng-huōi siĕu lâi. Gê̤ṳng-sāng-dōng siông-dài ī-hâiu mò̤ ciā ngì-sék lāu.[2]