Puòi Siĕng-sṳ̆

Puòi Siĕng-sṳ̆ (裴仙師), iâ hô̤ lā̤ Siĕng-iè (仙爺), buōng-miàng Ciŭ Gāng-giék (周簡潔), sê Sóng-dièu gì siŏh ciáh dô̤-sê̤ṳ. Puòi Siĕng-sṳ̆ găk Uŏk-ciŭ (越州, gĭng-dáng Ciék-gŏng Siêu-hĭng) chók-sié. Ĭ găk Hók-ciŭ Dók-sṳ̄ ngà-muòng (督署衙門) có̤ să-iè (師爺), ngiĕng-géu «Dô̤-dáik-gĭng», «Nàng-huà-gĭng», «Ciŭ-ĭk» dēng-dēng gì cṳ̆. Cĭ hâiu dáe̤k diŏh siĕng-ìng (仙人), ŏ̤k gáu siŭ-siĕng (修仙) gì mĭk-giók, diŏh ngà-muòng sèng-dāu gì sṳ̀ng-chéu â-dā̤ dáik-dô̤ (得道).

Hók-ciŭ nè̤ng găk sṳ̀ng-chéu biĕng-dău kī miêu gé̤ṳng ĭ, ciā miêu cêu sê gĭng-dáng Gū-làu-kṳ̆ Siók-ŭi-lô (肅威路) gì Puòi-siĕng-gṳ̆ng (裴仙宮). Ciā sṳ̀ng-chéu gĭng-dáng gó găk hiā gṳ̆ng diē-sié.

Gô-dā̤ bók-guāng dŏng-guăng-gì, có̤-sĕng-é-gì, gó sê tĕ̤k-cṳ̆-gì, dŭ ô nè̤ng gé̤ṳng Siĕng-iè. Hók-ciŭ nè̤ng gô-dā̤ gōng nâ sê ô-sĭng bái ĭ cêu â̤ huák-cài. Săng-nguŏk chĕ̤-sĕk sê Siĕng-iè gì săng-nĭk, sèng-âu có̤ siŏh-gā-nguŏk-nĭk, siàng-diē, Dài-gĕ̤ng siŏh-chék-ché̤ṳ dŭ â̤ chióng-hié, gōng-bìng-uâ, có̤ lā̤ iā nâu-iĕk.