Puō-dĕ̤ng Duâi-dòng

Chăng-kō̤ Mìng-dĕ̤ng-ngṳ̄ Háng-cê gì bēng-buōng. / 參考閩東語漢字其版本。

---

Puō-dĕ̤ng Duâi-dòng
浦东大堂
Cŭng-gáu
Cŭng-gáu	Dô̤-gáu Dṳ̆ng-guók mìng-găng séng-ngiōng
Ôi-dé
Ôi-dé	Hók-gióng Hók-ciŭ Dài-gĕ̤ng Băh-mā Nàng-lô 305-1 hô̤
Guók-gă	Dṳ̆ng-guók
Cô̤-biĕu	26°3′50.11″N 119°17′30.62″E
Dê-dù

Puō-dĕ̤ng Duâi-dòng (浦東大堂) iâ hô̤ lā̤ Puō-dĕ̤ng-dòng (浦東堂), sê Hók-ciŭ Dài-gĕ̤ng gì siŏh ciáh miêu, găk Dài-gĕ̤ng-kṳ̆ Băh-mā Nàng-lô (白馬南路) 305-1 hô̤. Ciā miêu sê Dô̤-gáu Giū-áng Tái-săng gì 13 ciáh dòng cĭ ék, siŏh Puō-dĕ̤ng-gīng (浦東境), ngiàng-sìng gâe̤ng muóng-buŏi gì sèng-âu sṳ̆k Puō-dĕ̤ng-áng (浦東案). Puō-dĕ̤ng Duâi-dòng ciō-iéu gé̤ṳng Hô̤-gá Ciŏng-gŭng (護駕將軍), Liòng-nguông-sĭ Ngŏk (良願司岳). Hiêng-câi bô chiāng iā sâ̤ gì-tă gì sìng-mìng diē kó̤ gé̤ṳng,bău-guák Tiĕng-cà̤ Ìng-séng Dâi-dá̤ (天齊仁聖大帝), Ciŭ, Huâng Ciŏng-gŭng (周范將軍) gâe̤ng hŭ-ìng, Déng-să̤ Dâi-nguòng-só̤i (鎮西大元帥), Ĭng-iòng Áng-că-sṳ̄ (陰陽按察使), Cê̤ṳ-sêu-sĭ (注壽司), Lìng-cūi-nā̤, Hĕk-siêng Ŭi-liĕk-uòng (獲宗威烈王), Hô̤-siêng-hèu (護善侯), Hièng-tiĕng Siông-dá̤ (玄天上帝), Diŏng Séng-gŭng (張聖君), Gàu Séng-uòng, gó ô Déng-hāi-làu gì Gĭng (金), Hò̤ (何), Liū (柳) săng ciáh hŭ-ìng.

Nguòng-lài gì miêu găk Puō-dĕ̤ng-chŏng (浦東村), 1990 nièng-dâi muăk-gĭ Puō-dĕ̤ng-chŏng nguòng-cháik-nguòng-chiĕng (原拆原遷), Puō-dĕ̤ng Duâi-dòng iâ buăng gáu hiêng-câi gì dê-huŏng, gê̤ṳ-liê lō̤ gṳ̆-mìng diêu gì Puō-dĕ̤ng Sĭng-chŏng (浦東新村) mâ̤ huông. Puō-dĕ̤ng Sĭng-chŏng diē-sié gó ô siŏh ciáh siŏh miàng gì Puō-dĕ̤ng-dòng, hī dòng gì hiŏng-huōi sê ĭ cê-gă kó̤ Tái-săng-hū chiāng gì, mò̤ sêu Puō-dĕ̤ng Duâi-dòng guāng, iâ mò̤ muóng-buŏi gì cṳ̆-gák.