Sĕk-báik-iòng
 | Cī piĕng ùng-ciŏng ô Háng-cê gì bēng-buōng. Chăng-kō̤ ĭ gì Háng-cê bēng-buōng. 參考伊其漢字版本。 |
Sĕk-báik-iòng (十八洋) sê Hók-ciŭ gì siŏh ciáh gô dê-miàng, diŏh gô-dā̤ Hók-ciŭ-siàng ngiê-dāu nàng-biĕng huŏng-ôi, gĭng-dáng sṳ̆k Dài-gĕ̤ng-kṳ̆ Siông-hāi Gă̤-dô̤ (上海街道), Nìng-huá Gă̤-dô̤ (寧化街道), Ngiê-ciŭ Gă̤-dô̤ (義洲街道), Dà-dìng Gă̤-dô̤ (茶亭街道), Iòng-dṳ̆ng Gă̤-dô̤ (洋中街道), gó ô Gū-làu-kṳ̆ gì Hùng-săng-déng (洪山鎮).
Sĕk-báik-iòng ciā dê-huŏng diŏh Hók-ciŭ-siàng nàng, ī gĭng-dáng Báik-ék-chék-lô (八一七路) ùi dṳ̆ng-sĭng. Báik-ék-chék-lô gô-dā̤ chók Nàng-muòng-dău cêu sê hiŏng-hâ, iù báe̤k hióng nàng gì duâi diô hô̤ lā̤ Dāu-dṳ̆ng-lô (斗中路, Dāu-dṳ̆ng-gă̤ 斗中街), Sā̤-mā-lô (洗馬路), Hók-dáik-lô (福德路), Dà-dìng-lô (茶亭路, Dà-dìng-gă̤ 茶亭街), Gék-sĭng-lô (吉新路), Huàng-săng-lô (橫山路, Huàng-gă̤ 橫街), Siēu-giò-lô (小橋路, Siēu-giò-tàu 小橋頭), Dŏng-dìng-lô (中亭路, Dŏng-dìng-gă̤ 中亭街). Cī siŏh piéng dṳ̀-kó̤ ièng-gă̤ dŭ sê chió bī-gáu nâu-iĕk, gái hióng ngiê-dāu cêu sê cêng huŏng-liòng gì Sĕk-báik-iòng.
"Iòng" (洋) gô-dā̤ diŏh Hók-ciŭ-uâ diē-sié â̤ cī duâi-piéng gì chèng gâe̤ng ò̤, puō. Sĕk-báik-iòng cŭ-uái gô-dā̤ siŏh-chék-ché̤ṳ dŭ sê chèng, kă̤-giāng diè-giāng siàng-dŏ̤i-săng, bău-guák Puō-dĕ̤ng-iòng (浦東洋), Puō-să̤-iòng (浦西洋), Dāu-diè-iòng (斗池洋), Să̤-iòng (西洋), Siông-ò̤-iòng (上河洋), Â-ò̤-iòng (下河洋), Iòng-bāng-iòng (洋柄洋), Dòng-tĭng-iòng (長汀洋), Bŏng-ciŭ-iòng (幫洲洋), Hò̤-dĕk-iòng (荷澤洋), Pŏ̤-muōi-iòng (坡尾洋), Ăng-dâng-iòng (安淡洋), Puō-muōi-iòng (浦尾洋), Cūi-sṳ̀ng-iòng (水松洋), Hĭng-huòng-iòng (興園洋), Siēu-liū-iòng (小柳洋), Gă-iòng (加洋), dŭ liāng ô 18 ciáh iòng, gó-chṳ̄ hô̤ lā̤ "Sĕk-báik-iòng". Sĕk-báik-iòng gì kă̤-giāng lièng lā̤ Mìng-gĕ̤ng, gô-dā̤ nièng-nièng-màng dŭ â̤ huák-kă̤-cūi, sêu-guái báh-sáng. Gô-dā̤ ô siŏh guó uâ "Sĕk-báik-iòng-lô diô uăng uăng, siŏh nièng hùng-cūi iĕng gāu huăng" (十八洋路墿彎彎，蜀年洪水淹九番). Bô gă lā̤ iā ṳ̀ng-ê buóh tè̤ng-giāng, gô-dā̤ iā sèu huák-sĕng diòng-niēng-bâng, gó-chṳ̄ sĕng-uăk cêng-kó̤ káung-nàng. Gô-dā̤ ô nè̤ng gōng "Cūi iĕng Sĕk-báik-iòng, kŏng-chái buáng nièng liòng, mâ̤ ì iêu mâ̤ nṳ̄, cìng-gīng hō̤ chă̤-liòng" (水淹十八洋，糠菜半年糧，賣兒又賣女，情景好凄涼), cêu-sê gōng hī sèng-âu gì cìng-huóng.
1952 nièng, Sĕk-báik-iòng hó-gê̤ṳng sĕk gūi ciáh chŏng sìng-lĭk Là̤-mìng Hăk-cáuk-siâ (黎明合作社), bà cūi-gṳ̀, gāi-cô̤ tū-dê. 1963 nièng, kī hō̤ Mìng-gĕ̤ng gièng gì tì-bá. Cĭ-hâiu bô kăi-sṳ̄ gié-hĕk gĕ̤ng-ngiĕk-kṳ̆, diŏh gĭng-dáng Gĕ̤ng-ngiĕk-lô (工業路) hó-gê̤ṳng kī Bŏ̤-là̤-chiōng (玻璃厰), Guáng-tàu-chiōng (罐頭厰), Diêng-cṳ̄-guāng-chiōng (電子管厰), Ê-só-chiōng (味素厰), Dĕng-páu-chiōng (燈泡厰), Tòng-cṳ̀-chiōng (搪瓷厰), Bō̤-ŭng-bìng-chiōng (保溫瓶厰), Bì-ciū-chiōng (啤酒厰), Hók-dâi Gĭ-hâi-chiōng (福大機械厰), Káung-sĕng-só-chiōng (抗生素厰), Siê-iù-chiōng (豉油厰) dēng-dēng gĕ̤ng-chiōng. Gāi-gáik Kăi-huóng ī-hâiu, Là̤-mìng Hăk-cáuk-siâ kăi-sṳ̄ bâing gĕ̤ng-chiōng, 1992 nièng, sìng-lĭk Là̤-mìng Kiē-ngiĕk Cĭk-tuàng (黎明企業集團), cī dăng-ôi sê Hók-gióng tàu gă chŏng-ngék gì kiē-ngiĕk cĭk-tuàng gŭng-sĭ. Hó-gê̤ṳng gì chŏng dŭ kăi-sṳ̄ ŏ̤h ciā chŏng bâing hăk-cáuk-siâ gŭng-sĭ, bī-gáu chók-miàng gì gó ô Puō-dĕ̤ng-chŏng (浦東村) bâing gì È̤ng-gì buông-dáing (紅旗飯店). Gĭng-dáng Sĕk-báik-iòng gì chèng gĭ-buōng mò̤ lāu, duâi-buô-hông gì kă̤-giāng diè-giāng găk kī chó kī gĕ̤ng-chiōng gì sèng-âu dŭ ké̤ṳk dèng táh. Gáu-muōi ĭng-ôi kuàng-gīng ŭ-niēng, gĕ̤ng-chiōng dŭ buăng hiŏng-hâ kó̤ lāu, ciā dê-huŏng biéng siàng chê-dṳ̆ng-sĭng. Ô Bō̤-lṳ̀ng Siàng-chê Guōng-diòng (寶龍城市廣場), Uâng-chiông-siàng (萬象城) ciŏng-uâng gì siŏng-diòng, iâ ô Mìng-gĕ̤ng Báe̤k-ngiâng Dṳ̆ng-iŏng Siŏng-ô-kṳ̆ (閩江北岸中央商務區), Mìng-gĕ̤ng gĕ̤ng gièng gó ô kī Mìng-gĕ̤ng Gŭng-huòng (閩江公園).