豬囝佩奇

參考閩東語平話字其版本。/ Chăng-kō̤ Mìng-dĕ̤ng-ngṳ̄ Bàng-uâ-cê gì bēng-buōng.

---

2011年，蜀隻伲囝共豬依爸、豬依媽客佻

《豬囝佩奇》是蜀部英國動畫，乞固未去學校其伲囝看。只部動畫由Astley Baker Davis做，E1 kids發行。2004年5月31號頭蜀回播放，播出4季。停了2年，2015年2月14號復播放了新其蜀季。只芘動畫共總著180隻地區播放，仈曾掏下2005年英國電影共電視藝術學院最佳學前動畫獎共2005年安錫國際動畫影展最佳電視動畫獎。主角佩奇其配音員哈莉·貝特也得遘了2011年英國電影共電視藝術學院最佳兒童演出獎。

背景

《豬囝佩奇》每蜀集大概5分鐘，講有蜀頭豬，名「佩奇」，是諸娘囝。伊共伊厝裏儂、客佻幫發生了野価事計。伊其朋友，都是各種各色其哺乳類動物，譬如講貓囝、犬囝、兔囝等等，並且都共伊蜀樣大。伊其依弟「喬治」也有另蜀堆共伊蜀樣大其客佻幫。故事其內容，大部份是圍繞平常其生活，比如伲囝哥參加其學前遊戲班、泅水、去依公依嬤厝或且表親其厝、著遊樂場客佻、騎骹踏車等等。

動畫裏勢其角色，雖然講是動物，都共儂蜀樣，有衣裳頌，有厝住，有其也會仈開車，但同時固保留動物其特性。例如，佩奇共伊厝裏儂講話其前後，時不時會像豬蜀樣𧲇𧲇叫。其他動物角色也會發出自家其叫聲。有其固會展現其他其特性，比如兔囝其角色，除𡅏講話其時候會「嗚咿嗚咿」叫，也盡去愛食紅蘿蔔。有仂囝例外其是，兔囝住著山懸頂其洞洞裏勢，雖然伊各儂其洞洞都像人類其厝蜀樣有檻門囝共家具。各種角色無面、畏羞其時候，面都會變紅，喙也有能耐表達悲傷、歡喜、受氣、困惑等等情緒。雖然動畫裏勢其哺乳類動物都有擬人化，但是其他其動物就無總款了。比如鴨囝、烏龜小提、鸚鵡Polly、金魚小金等等。動畫其旁白由John Sparke負責，伊其旁白加強了劇情其喜劇效果：比如有什乇𣍐好其事計發生（比如喬治啼嘛），伊就會加蜀句「啊呀，仱死了」；或者如果角色做其事計野危險（比如佩奇騎車無看前斗），伊就大告「著細膩」。

播放

第一季都領有52集，由2004年5月31號開始，著英國第五臺播放。著美國，頭蜀會播放是著2005年8月22號，著卡通頻道其Tickle-U學前電視節目環節；之後2007年12月共2008年1月著Noggin頻道（以後其尼克幼兒頻道）播放。著英國、葡萄牙、意大利、比荷盧、斯堪的納維亞、澳洲也著Nick Jr.頻道播放。

第二季都領有52集，由2006年9月4號開始播放。Cecily Bloom取代Lily Snowden-Fine，乞佩奇配音。其他角色配音也有調動。

第三季著2009年5月4號由英國第五臺兒童節目《MilkShake》播放，佩奇其配音員改為Harley Bird。