反送中運動

參考閩東語平話字其版本。/ Chăng-kō̤ Mìng-dĕ̤ng-ngṳ̄ Bàng-uâ-cê gì bēng-buōng.

反送中運動是趁2019年 3月31號開始、6月9號變大規模社會運動去其香港百姓反對《逃犯條例修訂草案》其抗議運動。

者隻運動無統一其領導，主要使社交媒體號召。運動其支持者使遊行示威、集會、靜坐、唱歌、吶喊、不合作運動、自殺等方法，反對香港政府其《逃犯條例》修訂草案，者隻草案允許犯罪嫌疑儂乞引渡遘中國大陸、澳門共台灣。反對者見覺，者隻草案會破壞「蜀國兩制」其香港司法獨立。

2019年3月15號，香港眾志會敆政府總部靜坐，伊各儂其碼是撤回《逃犯條例》其修訂。3、4月，「民間人權陣線」再三發起遊行。6月9號，民陣（民間人權陣線）複發起遊行，有野侈其市民參加。之後，示威者要求「五大訴求」：完全撤回《逃犯條例》修訂草案、撤回暴動其定性、釋放乞拘押其儂、追究警察隨便行使權力、馬上落實行政長官普選共立法會普選。

7月21號，元朗有頌白衣裳其儂襲擊示威者。

9月4號，香港特別行政區行政長官林正月娥宣布，撤回《逃犯條例》修訂草案。示威者見覺「五大訴求」㑚有蜀隻乞落實，故此，遊行示威運動繼續。

10月1號，香港有激烈其示威。行政長官林正月娥使《緊急法》制定《伓通蓋面條例》，引發更更強其示威。但是，者隻條例乞判定違憲。

11月，香港區議會選舉，民主派取得史無前例其勝利。獲得囇約88%其選票。

2020年1月，示威運動因為2019年冠狀病毒病徐仂緩和。5月，疫情敆香港乞控制去，示威活動恢復。北京宣布乞香港蜀隻「港版《國安法》」，同時，香港立法會恢復審議《國歌法》，觸發反對者反彈。

遘2020年5月27日，警察拘押過9000隻儂，年齡趁11歲遘84歲。者隻運動乞見覺是趁1997年香港回歸以來香港最嚴重其政治危機。