嚴復

參考閩東語平話字其版本。/ Chăng-kō̤ Mìng-dĕ̤ng-ngṳ̄ Bàng-uâ-cê gì bēng-buōng.

嚴復（1853年 12月10號－1921年 10月27號），字幾道，福州儂，是中國近代其思想家，翻譯家。

1867年，嚴復裏福州船政學堂學習駛船。1877年，伊留學英國學習海軍，1879年轉來中國。1895年甲午海戰中國戰敗之後，伊開始將西方盡価先進其思想介紹裏中國，比較出名其翻譯作品有《天演論》共《國富論》。

嚴復將《天演論》裏勢其兩句「natural selection」共「survival of the fittest」分別翻譯成「物競天擇」共「適者生存」。嚴復想通過茲兩句話告訴中國儂，一定着爲了國家富強勤儆奮闘，儷無就會乞別儂欺。

嚴復翻譯西方作品，態度野認真。敆《天演論》其序裏勢，伊寫遘：「譯事三難：信達雅」。信，就是伓使改變原作者其意思；達，就是語言着通順，符合語法；雅，就是使辭造句着有雅緻。茲句話對後世影響盡大，一直遘今旦儂認爲「信」「達」「雅」是判斷翻譯好呆其標準（雖然嚴復自家透底無總款講過）。