榕𣗬

參考閩東語平話字其版本。/ Chăng-kō̤ Mìng-dĕ̤ng-ngṳ̄ Bàng-uâ-cê gì bēng-buōng.

榕𣗬，是桑科（Moraceae）榕屬（Ficus）榕亞屬（Subgen. Urostigma）下部分植物其通稱，主要包括雅榕（Ficus concinna）共榕樹（Ficus microcarpa）。

榕𣗬故是福州市其市𣗬。

特征

榕𣗬是蜀種四季常青其大𣗬，分佈敆福建、臺灣、廣東、馬來西亞、琉球群島、澳大利亞等熱帶、亞熱帶國家共地區。

榕𣗬一般會生氣根，通俗其號「鬚鬚」或者「榕𣗬鬚」。榕𣗬鬚會垂遘地兜，鑽塗裡繼續生長，過蜀段時間會發遘比手臂故𡅏粗。本底生𣍐深其部分根會趁地裡鑽出，發其格外粗壯，號𡅏「板根」。氣根共板根都有能耐對手支撐榕𣗬，所以榕𣗬會發其高大。

榕𣗬其花生著𣗬椏柄柄懸頂，是隱頭花序，伓是平常看見其許種形態其花。榕𣗬結其果是聚花果、隠花果，樣式野像放嫩去其無花果。

榕𣗬椏椏若是乞剪下去，剪下其地方會流出白色其奶，燋去咧會野𪏸。

福州本地舊底就有生野価榕𣗬，野快都有「榕城」其別稱。宋代冶平年間，福州太守張伯玉動員百姓栽榕𣗬，遘熙寧年間，福州就有「綠陰滿城，暑不張蓋」（囫圇城都是樹，熱天伓使遮傘）其環境。之後程师孟接班做太守，復新栽榕𣗬萬上蔸，寫詩遘：^[1]

三樓相望枕城隅，臨去猶栽木萬株。試問國人來往處，不知曾記使君無？^[1]

榕𣗬敆連江、寧德，復號𡅏薜荔𣗬（也有書寫做「比式」^[2]）。