貓熊

Chók-cê̤ṳ Wikipedia
跳至導覽 跳至搜尋

參考閩東語平話字其版本。/ Chăng-kō̤ Mìng-dĕ̤ng-ngṳ̄ Bàng-uâ-cê gì bēng-buōng.


貓熊

貓熊一般號𡅏熊貓,也號𡅏大熊貓或者大貓熊,是蜀種野生其食肉動物。伊共蜀樣都是屬食肉目其。雖然講野価科學家將伊分遘熊科下底去,固有儂見覺伊伓是熊其蜀種。

名字[Siŭ-gāi | Gāi nguòng-mā]

1869年,法國傳教士Armand David頭回著中國其四川發現貓熊以後,將者動物其學名號做「Ursus melanoleucus」,意思是「烏色白色其熊」。遘尾了法國國家自然歷史博物館其動物學家Alphonse Milne-Edwards研究David帶轉來其骨骨以後,見覺嚽是蜀種共小熊貓野像其動物,就起學名號𡅏「Ailuropoda melanoleuca」,意思是「像小熊貓其動物」。者名字遘今旦固著𡅏使。

外形[Siŭ-gāi | Gāi nguòng-mā]

貓熊身體會做肥肥式,做圓圓式,尾尾做短短式,身體懸頂烏共白兩種顏色分野清楚,身體共尾尾是白其色,目睭肩頭都是烏其;腹老有其是棕色,有其是烏其色。

貓熊其身體一般由120遘180釐米許罔懸,尾尾差不多10遘20釐米許罔長,身體大概有60遘150公斤許罔重。一般來講雄性其會比雌性其大頭仂囝。

貓熊本底是生活著烏烏暗暗其林裏勢,故此目睭𣍐好使,不過伊著暝晡也共著日中其辰候蜀樣輪活。

分佈[Siŭ-gāi | Gāi nguòng-mā]

貓熊會中當蜀種動物界其活化石,因為者動物其樣式共幾十萬年以前其無什乇區別。舊底著中國東部、南部遘緬甸都有,遘現在儷生活著四川部份地區了。伊主要著海拔2000遘3000米其林或者針箬林裏勢。

習慣共生態地位[Siŭ-gāi | Gāi nguòng-mā]

熊貓著𡅏食竹

貓熊愛自家住,每蜀頭其貓熊都有自家活動其地方。除去發情其時期,伊都是自家住。野価儂固儷喊熊貓是主要食竹箬其蜀種動物。其實貓熊共其他熊蜀樣是雜食動物,現在其貓熊著食肉動物向食草動物過渡其時期。貓熊會拿竹鼠茲蜀類嫩嫩式動物,也會食動物其死屍,有其辰候固會去拿頭牲來食。貓熊其下頦野有力,故此竹許罔硬其乇伊都咬會定動。但是伊消化植物纖維共養分其能力𣍐好,故此蜀日著食15遘20公斤其竹營養乍有遘。

貓熊其囝是花豹豺犬其主要食物。

保護現狀[Siŭ-gāi | Gāi nguòng-mā]

1936年1月,頭隻大貓熊乞儂下遘美國舊金山去展覽,野価美國儂見覺伊野有味。茲頭貓熊遘尾了乞下去芝加哥,敆1938年著許塊死去。著伊死茲年,Brookfield動物園挈2500美元其代價買遘蜀頭貓熊。1972年美國總統理查·尼克森訪問中國其辰候,毛澤東將2頭貓熊送乞美國。許辰候𩚉蜀頭貓熊蜀年平均著挈260萬美元,儷是再加蜀頭貓熊其囝,就著超過300萬,嚽比其他瀕危其動物固𡅏使錢。

維基共享裡勢有共貓熊有干過其內容。
維基物種裡勢有共貓熊有干過其內容。