砒霜

參考閩東語平話字其版本。/ Chăng-kō̤ Mìng-dĕ̤ng-ngṳ̄ Bàng-uâ-cê gì bēng-buōng.

---

砒霜

砒霜，化學名稱是三氧化二砷（As₂O₃），是蜀種特別毒其白色粉粉，樣式像霜。鼻齅無味，喙食無味。古底儂講其「砒」，就是化學元素砷。因為三氧化二砷其樣式嘢像霜，故此號𡅏「砒霜」。

生產

• 讓雌黃（三硫化二砷）氧化，就得遘砒霜共二氧化硫。

${\rm {2As_{2}S_{3}+9O_{2}{=\!=\!=\!=}2As_{2}O_{3}+6SO_{2}}}$

• 水解三氯化砷，就得遘砒霜共鹽酸。

${\rm {2AsCl_{3}+3H_{2}O{=\!=\!=\!=}As_{2}O_{3}+6HCl}}$

毒性

古底因為技術落後，做出其砒霜底裡有嘢価硫化物，故此顏色是紅其，叫做「鶴頂紅」。因為銀容易共硫起化學反應，變成烏色其硫化銀，故此古底真稠使銀來試毒。現來技術進步了，做出其砒霜都是白色其，純度嘢懸，底裡㑚有三氧化二砷，無硫化物，故此使銀也試無挃出了。

砒霜劇毒。㑚使食仂囝就會死儂。食遘腹𦚱底，馬上發生急性砷中毒，食管有燒灼感覺，接下就是病吐瀉，固加瀉出其乇帶血，屎作紅丹丹咯，最後器官衰竭死儂。就算無食喙𡅏，鼻齅仂囝或者皮膚接觸仂囝，也會發生急性砷中毒，乍開始呼吸道或者皮膚受遘嚴重刺激，仱接下就是長期其神經問題，包括頭疼、頭眩。

解藥

• 二巰丙磺鈉注射液，有效成分是2,3-二巰基丙磺酸鈉，也號𡅏「解砷靈」。
• 2,3-二巰基丁二酸鈉
• 二巰基丙醇（BAL）