基因編輯嬰兒事件

Chók-cê̤ṳ Wikipedia
跳至導覽 跳至搜尋
"基因編輯嬰兒事件" 是一篇漢字文章,卜覷平話字版本"Gĭ-ĭng Biĕng-cék Ĕng-ì Sê̤ṳ-giông",篤嚽所
賀建奎敆自家實驗室裏勢對鏡頭解釋自家對胚胎做基因編輯其過程(2018年11月)

基因編輯嬰兒事件,是中國南方科技大學生物系副教授賀建奎共伊其團隊敆2018年通過基因編輯技術,對兩隻雙胞胎嬰兒胚胎細胞其CCR5基因來改造,造成讓嬰兒會使得遘可以遺傳其對部分艾滋病其免疫力其爭議性事件。

賀建奎共伊其團隊敆茲回基因編輯開始以先,首先使其胚胎共小鼠來做 CRISPR/Cas9 編輯動物基因其實驗[1][2]。敆者動物實驗臺中得遘預期其編緝效果,固加發現小鼠其組織共行為也無明顯差異[2],仱就開始趁艾滋病組織臺中招志願者,成功招著8對老公嬷,全部都是男界HIV陽性,女界HIV陰性[2]。敆洗澈伊各儂其精子以後,將精子共CRISPR/Cas-9酶拍針拍底女界其卵子臺中[3]。茲芘過程總計產生了22芘受精其胚胎,其中有16芘胚胎會存活。接下來,團隊編輯茲16芘胚胎其基因組[3]。介共2芘胚胎植底母體,最後成功生出雙胞胎[1][3]。另外蜀隻女志願者是「生化妊娠」[2]。茲兩隻雙胞胎出生以後,賀建奎就使「露露」(Lulu)共「娜娜」(Nana)茲兩芘名字來告[4],介共茲芘結果錄成視頻[5]

茲芘研究最早敆2018年11月25號由賀建奎團隊通過視頻形式公佈[5]。接下來,馬上就引起廣泛爭議[6][7],因為基因編輯嬰兒本身涉及固未解決其倫理共技術問題[8][9]。中國國內有百幾隻科學家聯名反對[10]戴维·巴尔的摩代表第二屆人類基因組編輯國際峰會組委會發布聲明,表示谴责,介加呼籲為相關試驗確立嚴格標準[11]。中華人民共和國科學技術部敆第二工宣佈暫停賀建奎其科研活動[12],衛健委、廣東省政府、深圳市政府等等已經對茲件事計開展調查[13][12][14]

技術手段[Siŭ-gāi | Gāi nguòng-mā]

HIV-1作用著CD4+輔助性T細胞

茲芘研究臺中使其主要技術是CRISPR/Cas9[4],是蜀種借趁細菌臺中來其CRISPR/Cas系統準確固加有效咯做基因編輯其技術。茲芘系統是現在發現存在敆多數細菌共大部分古菌臺中其蜀種後天免疫系統[15],廮𡅏消滅外頭來其質粒或者噬菌體[16][17]。賀建奎團隊使者技術來編輯胚胎細胞臺中共艾滋病免疫有干過其CCR5基因,來使嬰兒出生以後有先天性其免疫艾滋病其能力[4]

CCR5基因表達其產物是白細胞表面其蜀種卵白質,號𡅏CCR5卵白質,R5型HIV病毒底遘人體介感染宿主細胞其過程需要借助CCR5卵白質。有其儂群其基因組臺中有CCR5基因其蜀芘突變型,號𡅏CCR5-Δ32,有蜀段長是32鹼基對其缺失,造成表達產物無法乞HIV病毒識別共結合,故此會使對R5型HIV病毒引起其艾滋病免疫,但是對㑚使CXCR4受體卵白其X4型HIV病毒就無免疫能力。固加上CCR5敆正常免疫臺中其作用固未清楚。《複雜疾病遺傳學》(Genetics of Complex Disease)茲本書指出:「一般來講,CCR5𣍐影響免疫反應,但是伊對西尼羅河病毒感染其免疫反應臺中扮演重要其角色」[18]

CRISPR/Cas9技術現在固未成熟,可能會造成號𡅏「脫靶效應」其錯誤編輯,造成共目標序列對𣍐上其序列乞錯誤切割,造成蜀堆無法預知其突變,敆遺傳學懸頂對受編輯生物其基因組有風險[19]。賀建奎對嚽回應講,伊敆為胎兒作基因測序辰候㑚發現蜀芘敆非編碼區、離基因區有一定距離其潛在脱靶,固加指伊茲兩隻出生以後無檢出脫靶活性[20][21]

CCR5-Δ32基因雖然對部分艾滋病有免疫作用,但是蜀篇2015年其綜述講伊共多發性硬化[22]有干過,不過敆囫圇研究臺中伊共自體免疫性疾病其關係存有矛盾[23]。伊共跟腫瘤其關係就無詳細記錄[24]。固加上CCR5-Δ32可能會造成攜帶者敆感染西尼羅河病毒以後出現更更嚴重其神經系統疾病[18]

賀建奎敆11月28號著基因編輯峰會其演講顯示,露露其兩芘CCR5基因都伓是野生型,也伓是Δ32,實際是兩種現在固未發現自然存在其移碼突變,效應無無儂會八;娜娜其兩芘基因臺中蜀芘缺失15芘碱基(Δ15),𣍐造成移碼突變,但是表型效應也無儂會八,另外蜀芘是野生型。都無形成目標基因CCR5-Δ32。[25][26]

質疑共譴責[Siŭ-gāi | Gāi nguòng-mā]

賀建奎宣佈世界頭蜀芘免疫艾滋病其基因編輯嬰兒敆中國出生。

茲兩隻嬰兒敆中國出生,名字叫做露露(Lulu)共娜娜(Nana)[4]。茲件事計涉及其倫理等等問題馬上引發質疑,百幾隻中國科學家敆茲條消息公佈以後馬上發表聯合簽署其聲明表示強烈譴責,講者實驗存在嚴重其生命倫理問題,固使「瘋狂」來講茲回實驗,要求補上監管漏洞;指出茲芘實驗敆技術上無任何創新,突破其是科學家其倫理道德底線[10]。中國監管部門共國際醫學專家也對茲回實驗表示肝火婆寵棕[27]

倫理問題[Siŭ-gāi | Gāi nguòng-mā]

茲芘研究敆中國臨床試驗註冊中心公開註冊成功[28],但是者內容明顯違反了中華人民共和國科學技術部中華人民共和國衛生部其《人胚胎幹细胞研究倫理指首原則》臺中其「體外培養期限趁受精或者核移植開始無年呆超過14工」、「無年呆將先款臺中得遘其已經廮𡅏研究其人囊胚植底儂或者任何其他動物其生殖系統」等等規定[29]

執行單位方面,申請書懸頂寫遘倫理審查是由深圳和美婦兒科醫院作出,認為講「符合倫理規範,同意開展」,固加有醫院相關部門負責人其簽字共醫院公章[4]。但是深圳市衛生計生委醫學倫理專家委員會相關負責人講,以先無收遘項目其倫理審查報備[30]。固加茲芘醫院以後講茲芘事計共伊無干過,講申請書偽造[31][32]

賀建奎母校萊斯大學敆當地時間11月27號宣佈對可能參加茲芘項目其教授、賀建奎以先其導師邁克爾·蒂姆發起調查,因為茲芘研究引發「令人不安其科學、法律共倫理問題」[33][34]。蜀隻參加者此工作其美國科學家表示,基因編輯可能造成DNA變化傳遘下蜀代,固加可能會對其它基因造成傷害[35]。嘢価科學家表示基因編輯嬰兒其出生造成潘多拉盒盒乞開起去[36]

參考資料[Siŭ-gāi | Gāi nguòng-mā]

  1. 1.0 1.1 「我非常自豪」:賀建奎為基因編輯嬰兒實驗辯護. 紐約時報中文網. 2018-11-29 [2018-11-30]. 
  2. 2.0 2.1 2.2 2.3 基因编辑婴儿23个疑问 贺建奎回答了什么 回避了什么. 新浪科技. 2018-11-29 [2018-11-30]. 
  3. 3.0 3.1 3.2 CRISPR-baby scientist fails to satisfy critics. nature. 2018-11-28 [2018-11-30]. 
  4. 4.0 4.1 4.2 4.3 4.4 世界首例免疫艾滋病的基因编辑婴儿在中国诞生. 新浪科技. [2018-11-26](原始內容存檔着2018-11-26). 
  5. 5.0 5.1 基因編輯:中國科學家賀建奎引爆倫理爭議. BBC中文網. 2018-11-26 [2018-11-29]. 
  6. 鄭翠碧. 【基因改造嬰】涉事內地教授遭大學停職 周三將如期到港大演講. 香港01. 2018-11-26 [2018-11-29]. 
  7. 賀建奎基因編輯爭議不止 基因峰會发布嚴肅聲明. 多維新聞. 2018-11-29 [2018-11-29]. 
  8. 深圳學者修改嬰兒基因 香港須從嚴把關生物科技研究. 香港01. 2018-11-27 [2018-11-29]. 
  9. 基因改造嬰-一文睇清-賀建奎研究基因編輯愛滋免疫孖女由來. 香港01. 2018-11-28 [2018-11-29]. 
  10. 10.0 10.1 122位科学家联合声明:强烈谴责“基因编辑婴儿”. 新浪新闻. [2018-11-26]. 
  11. 基因峰会发布声明:贺项目存缺陷 不应临床试验. 新京报. 2018-11-29 [2018-11-30]. 
  12. 12.0 12.1 吕栋. 科技部回应基因编辑婴儿:暂停相关人员科技活动. 观察者网. [2018-11-29]. 
  13. 深圳医学伦理专家委员会回应“基因编辑婴儿”事件:已启动伦理问题调查. 新浪新闻. [2018-11-26]. 
  14. 基因改造嬰兒引爆倫理爭議 賀建奎明在港演講. 香港經濟日報. 2018-11-27 [2018-11-29]. 
  15. Westra ER, Swarts DC, Staals RH, Jore MM, Brouns SJ, van der Oost J. The CRISPRs, they are a-changin': how prokaryotes generate adaptive immunity. Annu Rev Genet. 2012, 46: 311–339 [2018-11-26]. PMID 23145983(原始內容存檔着2016-07-01). 
  16. Barrangou R, Fremaux C, Deveau H. CRISPR provides acquired resistance against viruses in prokaryotes. Science. March 2007, 315 (5819): 1709–12. PMID 17379808. doi:10.1126/science.1138140. 
  17. Marraffini LA, Sontheimer EJ. CRISPR Interference Limits Horizontal Gene Transfer in Staphylococci by Targeting DNA. Science. December 2008, 322 (5909): 1843–5. PMC 2695655. PMID 19095942. doi:10.1126/science.1165771. 
  18. 18.0 18.1 Donaldson, Peter; Daly, Ann; Ermini, Luca; Debra, Bevitt. Genetics of Complex Disease. Garland Science. 2015. 241. ISBN 9780815344919. 
  19. Klein, Misha; Eslami-Mossallam, Behrouz; Arroyo, Dylan Gonzalez; Depken, Martin. Hybridization Kinetics Explains CRISPR-Cas Off-Targeting Rules. Cell Reports. 2018-02, 22 (6): 1413–1423. ISSN 2211-1247. doi:10.1016/j.celrep.2018.01.045. 
  20. 基因编辑孖女已出生 贺建奎:发现一脱靶风险. 東方日報. 2018-11-28 [2018-11-28]. 
  21. 贺建奎现身详述项目过程 希望孩子能一直接受检查. 經濟觀察網. 2018-11-28 [2018-11-28](原始內容存檔着2018-11-28). 
  22. Ghorba, Khodayar; Hassanshahi, Gholamhossein; Momeni, Mohammad; Zare-Bidaki, Mohammad; Arababadi, Mohammad Kazemi; Kennedy, Derek. Is the CCR5 Δ 32 Mutation Associated with Immune System-Related Diseases?. Inflammation. 2013-06, 36 (3): 633–42 [2018-11-27]. PMID 23250822. doi:10.1007/s10753-012-9585-8(原始內容存檔着2018-06-17) (英文). 
  23. Ascierto, PA; Stroncek, DF; Wang, E. Developments in T Cell Based Cancer Immunotherapies. Humana Press. 2015. 117. ISBN 978-3-319-21167-1. 
  24. Rezaei, Nima. Cancer Immunology: A Translational Medicine Context. Springer. 2015. 135. ISBN 978-3-662-44006-3. 
  25. 邸利会、陈晓雪、程莉. 七位专家点评:如何看待贺建奎在人类基因组峰会的报告?. 知识分子. 2018-11-29 [2018-11-29]. 
  26. 叶水送、邸利会. 贺建奎终于出场:遭炮轰仍不悔改|附全程文字. 知识分子. 赛先生. 2018-11-29 [2018-11-29]. 
  27. 中国诞生世界首例基因编辑婴儿 引发愤慨. FT中文网. 2018-11-27 [2018-11-29](原始內容存檔着2018-11-28). 
  28. 中国临床试验注册中心 - 世界卫生组织国际临床试验注册平台一级注册机构. 中国临床试验注册中心. [2018-11-26](原始內容存檔着2018-11-26). 
  29. 科学技术部、卫生部关于印发《人胚胎干细胞研究伦理指导原则》的通知. 中华人民共和国科学技术部. [2018-11-26](原始內容存檔着2015-05-30). 
  30. 首例免疫艾滋病基因编辑婴儿 并未经医学伦理报备. 新浪科技. [2018-11-26]. 
  31. 和美伦理委员会前成员:基因编辑婴儿申请书签名伪造. 新浪科技. [2018-11-26]. 
  32. 中国临床试验注册中心 - 世界卫生组织国际临床试验注册平台一级注册机构. 中国临床试验注册中心. [2018-11-27](原始內容存檔着2018-11-26). 
  33. 贺建奎母校莱斯大学:已对贺建奎导师展开调查. 新浪科技. 2018-11-27 [2018-11-28](原始內容存檔着2018-11-27). 
  34. Rice professor under investigation for role in 'world's first gene-edited babies'. CNN. 2018-11-27 [2018-11-28](原始內容存檔着2018-11-28). 
  35. Chinese researcher claims first gene-edited babies 模板:Wayback. ABC news. 2018-11-26. [2018-11-26].
  36. 'Pandora’s box has been opened’: Scientist's baby gene-editing claim fuels backlash. The Canberra Times. 2018-11-26. [2018-11-26].

外斗鏈接[Siŭ-gāi | Gāi nguòng-mā]