戚繼光
參考閩東語平話字其版本。/ Chăng-kō̤ Mìng-dĕ̤ng-ngṳ̄ Bàng-uâ-cê gì bēng-buōng.
戚繼光（1528年11月12號—1588年1月5號）字元敬，號南塘，是明朝其蜀隻將軍。
伊着山東濟寧出生，祖籍安徽定遠。伊郎爸號𡅏戚景通，是登州其指揮僉事。做細郎爸對伊野嚴，戚繼光做事計有綻都會乞伊郎爸拿𡅏大批評。伊郎爸敆1544年生去，根據許時候其制度，伊做去伊郎爸其官。1549年，參加武舉其鄉試，中舉。第二年伊去北京參加殿試，正正好碰着蒙古侵略，伊負責防禦北京城九門。
1555年，戚繼光調去浙江都指揮使司做參將，負責寧波、紹興、台州其防禦。當時倭寇猖獗，官軍拍無過。戚繼光遘浙江以後，敆義烏組織「戚家軍」，共胡宗憲、俞大猷各儂敆蜀堆抗擊倭寇，由浙江拍遘福建，倭寇都野驚伊。因為戰功，陞去做福建總兵。伊拍下倭寇着莆田其窩，解除倭患，安定蜀方，沿海百姓野感謝伊，乞伊起野価祠堂，福州于山其戚公祠就是起乞伊其。
1567年調去北京，第二年調去北方防禦蒙古，修補長城，訓練部隊，大大加強北方邊關其防禦能力。
1574年陞左都督，1579年加太子太保，當權其大學士高拱共張居正都野看重伊。但是野価儂妒忌伊，1582年張居正死去以後，有儂敆萬曆皇帝夫塊講伊呆話，皇帝就將伊調去廣東，無仂𣆯復將伊免官。最終伊復逼復病，着自家厝𡅏死去。
對後世其影響
[Siŭ-gāi | Gāi nguòng-mā]相傳福州其光餅就是戚繼光發明其。伊着福州其辰候，發現「戚家軍」都聽𣍐會意福州話，就告儂編蜀本福州話其韻書。茲本號《戚參將八音字義便覽》其書是福州話其頭部韻書，敆滿清其辰候乞儂整理成《戚林八音》掏去出版。