推廣普通話

Chók-cê̤ṳ Wikipedia

參考閩東語平話字其版本。/ Chăng-kō̤ Mìng-dĕ̤ng-ngṳ̄ Bàng-uâ-cê gì bēng-buōng.


上海蜀隻幼稚園掛其標語,懸頂寫:「起動各儂講普通話,規範語言文字」

推廣普通話中華人民共和國中國大陸使各種手段推廣普通話其事計。[1]中國其憲法將普通話定做是最主要其官方語言,其他其各種漢語族語言,雖然講乞國際懸頂大部分學者共語言學機構認定是共普通話𣍐蜀樣其語言,中國固是當茲幾種語言是「漢語方言」。

現在中國各地其廣播電視臺敆大部分時間着挈普通話來講。全國儷廣東有使「方言」其特權,嚽固是因為着向間壁其香港做政治宣傳其原因。[2]電視劇電影也是𣍐肯使「漢語方言」來講話,儷無審查𣍐通過。敆野価學校裡勢,先生𣍐肯學生講半句其「方言」,儷無會乞拿𡅏大批評。[3]

中國做嚽「推廣普通話」其目的是讓各地其儂都會會意對方講什乇。不過者運動做幾十年,將南方野価儂做𣍐仈講自家其「方言」了,另外蜀方面,着逼其地方推廣做野呆,固有差不多蜀半以上連聽都聽𣍐來。[4]總款以後,政府推廣力度罔變罔大,南方野価城市其儂都盡去反對推廣普通話。

經過國務院批准,每蜀年9月份其第3隻禮拜是「全國推廣普通話宣傳周」。政府野會出式,復評出全國推廣普通話先進城市,[5]復讓全國儂齊來提出宣傳口號,講其好其有獎品掏。像街中野稠看見其就有「講普通話,寫規範字」,「講普通話,做文明儂」(普通話:讲普通话,做文明人),幼稚園小學野稠看見其是「講普通話趁伲囝拿起」(普通話:讲普通话从娃娃抓起),「伓講方言,伓講罵儂話,做蜀隻合格其小市民」(普通話:不讲方言,不讲脏话,做个合格小公民)[6]其中,有儂見覺者「講普通話,做文明儂」有罵講「方言」其儂「𣍐文明」或者「野蠻」其意思。政府固將講普通話強制共什乇「愛國主義」掛鉤,也讓講「方言」其野価儂𣍐爽快。[7]

聯合國其《公民權利共政治權利國際公約》裡勢規定,「少數儂也有使自家語言其權利。」不過,遘今旦中國固未批准者公約。[8][9]

參考資料[Siŭ-gāi | Gāi nguòng-mā]