浦西福壽宮

浦西福壽宮門口

浦西境福壽宮、簡稱號福壽宮、浦西福壽宮、也號𡅏福州福壽宮、是福州市臺江區倛蜀隻廟、位着義洲街道浦西路6號、敆浦西村裏勢。這廟有供明教・道教共佛教倛神明。伊也是道教九案泰山倛13隻堂之一、迎神共問杯倛辰候屬浦西案。

2008年、伊乞認定是福州唯一蜀座明教建築、號𡅏明教文佛祖殿、有「明教文化活化石」倛名號。伊仱乞臺江區政府定做「臺江區不可移動文物點」。

歷史

內殿

兹蜀落廟最早是宋朝倛前後起倛、經過野価回修理共搬遷以後、乍遘今旦日倛地方。萬曆年間修倛《福寧州志》裏勢講、北宋嘉祐年間、明教祖師林瞪着閩縣求雨、故此當地人起這廟供伊。不過、中國歷史大部份時間禁止明教、明朝時期特別嚴重。當地姓蕭倛家族信明教、但是表面上改信道教、將道教、民間信仰倛神明也請𡅏來租塊供、總款就會保護摩尼倛神位。摩尼共林瞪都掏換名字、號𡅏明教文佛・度師真君、坐主殿𡅏供、邊兜齊供倛都是道教倛神。時間𣆯去以後、無儂會仈主殿臺中坐倛兩隻到底是什乇神。之後、附近倛村發展起來九案泰山溫・康兩隻元帥倛信仰。浦西村倛儂將伊兩隻倛部下也請入來。浦西加入九案泰山倛信仰以後、也會參加九案泰山倛迎神共問杯。明教文佛共度師真君倛節日、浦西村也會請附近倛村民來參加。

1985年、因為卜起味素廠、這廟乞拆唻搬遘浦西村現在倛地方重新起。原來倛廟是坐東朝西、乍起倛是坐北朝南、樣式基本無變。當時講𣍐清楚這廟到底屬底隻宗教倛、為得遘合法倛宗教身份、故此着1998年按有關部門倛規定改名「福壽宮」、屬道教倛部門管。雖然講許辰候乞政府當做道觀、㑚是講證據無夠、到底是屬什乇教倛廟學者故敆𡅏爭。仱遘2008年發現霞浦文書以後、乍有能耐確定這廟其實是明教倛廟、也是現刻時保存最好倛明教倛廟。

明教文佛祖殿敆福州市閩侯縣上街鎮石沙自然村固有蜀隻明教倛分殿、那蜀落廟是當地信明教倛儂敆兩百幾年前趁祖殿分爐出倛、裏勢倛神主共祖殿蜀樣。

供倛神明

浦西福壽宮主殿正臺中供明教文佛・度師真人、邊兜復供𡅏張聖真君・玄天上帝。偏殿也有供臨水奶・觀音・華光大王、故𡅏有九案泰山倛溫大世子・溫義世子・鄺總鎮共各大主管。搬新廟以後、也將三十六天君乞請入來、敆主殿左右徛兩排、兹三十六天君包括溫將軍・康將軍兩隻。懸高矮八倛塔骨廮嚽塊、伊兩隻是溫・康兩隻都統駕前二班按察司兼理血池主事。兹兩隻塔骨有差不多百幾年倛歷史、是九案泰山迎神最古老倛塔骨。

溫將軍・康將軍儷是三十六天君臺中倛兩隻、官無主殿供倛幾隻神大。故此儷是浦西乞定做九案泰山倛新案、兩隻將軍是𣍐使坐主殿倛。解決倛方式平常是利用外斗倛厝臨時搭蜀隻宮、請兩隻將軍坐入去。