林旭

參考閩東語平話字其版本。/ Chăng-kō̤ Mìng-dĕ̤ng-ngṳ̄ Bàng-uâ-cê gì bēng-buōng.

---

林旭

林旭（1875年–1898年），字暾谷，福建侯官（現在其福州）儂。滿清尾維新派其儂。出身舉人。是康有為其弟子，戊戌六君子。梁啟超敆《戊戌政變記》臺中講「其於詩詞、散文皆天授，文如漢魏人；詩如宋人，波瀾老成，瑰奧深秾，流行京師，名動一時」。有留下作品《晚翠軒集》。

生平

光绪十九年（1893年）癸巳恩科福建鄉試解元。光緒廿一年（1895年）仈曾有做內閣中書。廿四年（1898年）3月，提倡建立閩學會，共粵、蜀、浙、陜各學會相呼應，推動維新變法。復是保國會倡始董事。同年9月5號，百日維新尾尾其時候，授四品卿銜軍機章京。之後十幾日，稠稠上書言事，野価上諭都是伊寫其。

戊戌變法失敗，林旭乞搦起去，敆菜市口乞刣去，之後共譚嗣同等等齊號𡅏戊戌六君子。伊老媽是沈葆楨其孫女沈鵲應，野會寫詩詞，林旭死後，服毒自盡（也有儂講伊鬱心𡅏，遘尾死去）。

著作

林旭有留下作品《晚翠軒集》。伊敆監獄裡勢有寫絕命詩，感懷身世如下：

“

青蒲飲泣知何報？慷慨難酬國事恩；我為君歌千里草，本初健者莫輕言！

”

林旭墓

林旭死後，義僕朱德貴將伊遺體送轉福州，停厝金雞山地藏寺。光緒二十六年（1900年），林旭其老媽沈鵲應也死去。第二年沈瑜慶轉遘福州起生壙，也就是在生其墓，固敆墓左邊埋林旭老公媽。林旭墓聯：「千秋晚翠孤忠草；一卷崦樓絕命詞。」

1965年，吳家瓊寫批報告，敆北門外貓頭山懸頂發現林旭墓，王鐵藩固去伊厝看囇到底是傒勢。