楊梅

參考閩東語平話字其版本。/ Chăng-kō̤ Mìng-dĕ̤ng-ngṳ̄ Bàng-uâ-cê gì bēng-buōng.

---

?楊梅
楊梅
生物分類
界： 植物界 Plantae 門： 被子植物門 Magnoliophyta 綱： 雙子葉植物綱 Magnoliopsida 目： 殼斗目 Fagales  科： 楊梅科 Myricaceae 屬： 楊梅屬 Myrica 種： 楊梅 M. rubra
學名
Myrica rubra Siebold & Zucc.

楊梅，復號𡅏搓紅，是蜀種水果。

羅源告刺任（/ts‘ie²¹ ing²¹²/）。

栽

所在

楊梅主要敆亞熱帶栽，比如中國西南、浙江、福建、臺灣、日本、朝鲜、韓國、菲律賓等等地方。

㑚是講天恰凊，會遘零下8℃遘9℃，楊梅就會乞凍呆去。故此敆福建共浙江等等位處，海拔800米其山懸頂都會使栽。地無夠肥也無敆涉，楊梅𣗬耐貧瘠，病蟲害比較少。

產期

一般4月中下旬，會共無乇使其椏椏共菓子鉸唻。小滿左右當季，五日節之後過季。臺灣其產期是5月尾遘6月。

楊梅每蜀年都是由南邊先開始熟，嚽共地域、氣溫無偌夥大關係。比如敆中國大陸，就是昆明楊梅先熟，接下是福建楊梅，之後是浙江楊梅。

種類

福建其楊梅品種主要是「東魁」。漳州龍海等地固有栽部分「海安變」。長樂、閩侯等等地方栽「八賢道」。福鼎栽「大粒紫」。「東魁」杨梅生野大，蜀粒菓子直徑一般有人民幣蜀塊其鏰囝許蠻大，有其甚至有乒乓球許蠻大，蜀粒大部分重30克，愛「受傷」。「八賢道」比較嫩，蜀粒重十幾克，比較耐儲存。

臺灣原生種，有銳葉楊梅（Myrica rubra (Lour.) S. et Zucc.）共固有種恆春楊梅（Myrica adenophora Hance）。

歷史

最早西漢其辰候，就有人工栽培其楊梅了。李白其詩野価回寫遘楊梅。

樣式

楊梅𣗬是常綠喬木。𣗬皮是灰色其。葉革質，倒披針形或倒卵狀橢圓形，全緣或先端稍有鈍鋸齒。雌雄異株，雄花序圓柱形，紅黃色葇荑花序，雌花序卵狀長橢圓形，穗狀花序。2月開花結菓子，5月就熟去了。果實球形核果狀，密生多數囊狀體。菓子有紅、白、紫三色，根據不同品種有不同種類其上品楊梅，一般鮮紅色其會有仂囝復酸復甜，紫紅色其第一熟。

常綠喬木 常綠喬木  𣗬皮灰色 𣗬皮灰色  葉革質，倒披针形或倒卵状椭圆形 葉革質，倒披针形或倒卵状椭圆形  穗狀花序 穗狀花序  結出菓子 結出菓子  菓子球形核果狀，密生多數囊狀體 菓子球形核果狀，密生多數囊狀體

食

營養

楊梅其𣗬箬、根根，固有𣗬身懸頂其皮，單寧野豐富，有能耐提煉黃酮類共香精油。

果仁含維生素B17，有高蛋白、高油脂。

菓子含有維生素C、有機酸。

藥用

《本草綱目》總款記：「鹽藏食，去痰止嘔噦，消食下酒。乾作屑，臨飲酒時服方寸匕，止吐酒。止渴，和五臟，能滌腸胃，除煩憒惡氣。燒灰服，斷下痢，甚驗。鹽者常含一枚，咽汁，利五臟下氣。」

㑚是講食楊梅上熱去，楊梅其核核是無辦法壓下火氣其。福建中醫藥大學國醫堂其專家講，楊梅其核核硬確確，吞裏去也無辦法消化。仂囝哥食道共支氣管復窄復嫩，吞下會乞核核哽去。如果有胃潰瘍、消化道疾病、腸道炎症，噲伊腸道一般比較窄，硬卜吞核核，就愛積去。

做酒

主條目：楊梅酒

頭先，着準備新鮮其楊梅、白酒、冰糖。先将楊梅其梗共箬除唻。梗、箬乞酒泡，酒口感會變。之後楊梅掏去沖水，共伊沖澈去。第一好介使淡鹽水泡仂𣆯，撈出來澤囇，曝澈。介将杨梅放裏玻璃罐罐裏勢，撒仂囝冰糖，加裏白酒，密封，放陰涼其所在保存就會使了。

蟲蟻

有時候楊梅乞鹽水泡完，會有白色其果蠅幼蟲爬出來。福建農林大學園藝學院其陳發興講，只種蟲蟲愛䟛遘各種已經熟去了其菓子裏勢，但是第一中意其固是楊梅。這蟲蟲㑚敆菓子裏勢活動，故此無帶對儂𣍐好其細菌，儂食去也無敆涉。㑚是講這蟲盡少，固會使直接食。如果𣍐想食遘蟲，除𡅏泡鹽水，固可以挈濃度5%、10%其酒泡囇，介沖水。