煙臺山 (福州)

參考閩東語平話字其版本。/ Chăng-kō̤ Mìng-dĕ̤ng-ngṳ̄ Bàng-uâ-cê gì bēng-buōng. cdo:Iĕng-dài-săng (Hók-ciŭ)

---

敆閩江上覷煙臺山（敆者圖大邊）

煙臺山，復號𡅏藤山、倉前山共天寧山，位置敆中國福建省福州市倉山區南臺島北勢，着閩江南江濱，海拔大概是41.6米。

煙臺山舊底號𡅏藤山，因為元朝末年其辰候福州府敆山頂設烽火臺，故此號𡅏煙臺山。

清末鴉片戰爭以後，福州乞做通商口岸，嘢価國家敆煙臺山懸頂設領事館，固起教堂、辦學校、開醫院等等。故此，煙臺山懸頂有嘢価歴史建築。

1964年，煙臺山公園敆煙臺山敆山頂建成，開放共大家儂客佻。

2010年代，煙臺山懸頂有嘢価歷史建築開始修繕，煙臺山變成福州熱門景區共打卡點。

2021年，煙臺山正式批為國家3A級旅遊景區。

歷史

煙臺山古底叫做瓜藤山或者藤山，根據王應山其《閩都記》記錄：「藤山　其脈一起一伏，如瓜引藤，亙五六里，故名。山多梅花，開時，郡人載酒出遊。有明真庵在梅塢中。」 舊底，煙臺山其山底有嘢価梅花，香飄十里。故此，南臺島就有「瓊花玉島」其講法，介加上煙臺山其山底也號𡅏「梅塢」。

北宋年間，煙臺山懸頂開始建天寧寺，故此煙臺山也號𡅏「天寧山」。

元末時，福州府加強江防，因為煙臺山地勢重要，故此敆煙臺山山頂設烽火臺，就是「煙墩」，廮𡅏報警，固加共中洲島炮垒呼應。民間共者煙墩叫做「煙臺」，煙臺山其名字就是總款來其。茲芘烽火臺現在已经作廢了。

明洪武年間，煙臺山北邊開始設鹽倉，故此茲芘地方叫「鹽倉前」，簡稱「倉前」，故此煙臺山也叫做「倉前山」，簡稱倉山，倉山區其區名就是總款來其。

清末鴉片戰爭以後，清政府共英國簽訂《南京條約》，開放五口通商，福州變成通商口岸，允許番囝來茲所起厝。之後嘢価番囝來福州，但是因為本地儂其抵制，番囝㑚剩去煙臺山起厝。番囝敆煙臺山起洋行、工廠、領事館、教堂、學校、跑馬場等等。煙臺山變成番囝其地方去。現在，煙臺山懸頂固有嘢価近代歷史建築。