白話字

參考閩東語平話字其版本。/ Chăng-kō̤ Mìng-dĕ̤ng-ngṳ̄ Bàng-uâ-cê gì bēng-buōng.

---

白話字（白話字：Pe̍h-ōe-jī，縮寫：POJ，台羅拼音：Pe̍h-uē-jī，閩南拼音：Bēhwè zzî）是蜀種使拉丁字母寫其閩南語正字方法。白話字原底是19世紀時由基督教長老教會敆福建廈門創造介推行其，故此以後乞外界號𡅏閩南語教會羅馬字。但是白話字經過發展，使其人伓啻包括了福建共臺灣其閩南語人士，也有人使伊來寫客家話共臺灣原住民其語言，故此，白話字已經無限敆教會共閩南語了。歹歹是歷史懸頂第一悠久、第一普遍乞儂使用其臺灣話羅馬拼音系統，故此近年來乞儂號𡅏臺語羅馬字。

敆中國大陸，茲蜀套方案主要來廮學界廮𡅏共閩南方言拼音方案作對比。茲蜀萆時候，白話字真稠乞儂號𡅏甘爲霖方案或者《廈門音新字典》方案。

敆臺灣，1970年代國民政府全面禁止白話字。同時候，閩南民間其白話字也因爲國語運動慢慢罔來罔少人使。但是敆茲以前，白話字就已經有百年以上其實際使用歷史，也曾經敆閩南共臺灣其教會臺中相當普遍其乞使用過。比例講臺灣頭蜀份大眾媒體——1885年創刊其《台灣府城教會報》（Tâi-oân-hú-siâⁿ Kàu-hōe-pò），就是使用白話字當作文字媒介其。

白話字本身是標音系統，但是拼寫上妥協各地其腔共語音其變動，故此𣍐完全反映語音。比例講「蚵」，台北腔[o]、台南腔[ɤ]，但是敆白話字𡅏都是使「o」表示。復比例講「電」寫作「tiān」，但是今旦日野価人都乞懶音影響發音「tēn」。