九案泰山
 | 兹篇文章有平話字版本。 參考伊其平話字版本。 Chăng-kō̤ ĭ gì Bàng-uâ-cê bēng-buōng. |
九案泰山是福州臺江區附近其蜀隻村廟信仰聯合體。供九案泰山其廟都領有十三隻堂，統稱「九案十三堂」。九案泰山透底無「總堂」其概念。但是按政府規定，太平山堂以「九案泰山府」其名字註冊成這信仰其總堂，這太平山堂着臺江區太平二弄邊兜。
九案泰山供東嶽大帝其部下溫都統共康都統，伊兩隻乞信徒號𡅏溫泰山、康泰山。正正「泰山」是指泰山爺「東嶽大帝」，溫、康兩隻將軍着告「都統」，將伊兩隻告做「泰山」儷是因為尊重。溫將軍共康將軍乞告做「九千歲」，就是共泰山爺這「萬歲」區別開來。師公對兩隻將軍的講法也是「九案泰山」，使「九案」來限定「泰山」，共正宗其泰山爺區別開來。
九案泰山敆南臺十三鄉有自家其分堂，分堂裏勢坐其是兩隻都統其部下。每蜀年其九月初一遘十四，十三堂分成九組參加迎神活動，號𡅏「迎泰山」。這九組乞當地儂號𡅏「九案」，「九案泰山」其名字就是總款來其。十二問杯，決定下年暝兩隻都統着坐底隻堂𡅏。十三堂有其蜀鄉蜀案，有其兩、三鄉蜀案，都領有九案。
信仰區域
[Siŭ-gāi | Gāi nguòng-mā]
九案泰山信仰其區域號𡅏九案十三鄉，也號𡅏南臺十三鄉。這十三鄉包括太平山、山仔裏、涵頭、教場坂、浦東、浦西、西洋、斗池、西營、洋柄、雙浦頭、河上、河下茲十三隻村。這地方有3420平方許罔大，相當今旦臺江西北共鼓樓西南，東遘八一七路共洋中路，西遘二環路共長汀路，北遘烏山路共黎明路，南遘寧化路共邊兜其江墘社巷、浦西境巷，一直遘大廟山。下底講囇十三鄉其具體方位。
太平村敆太平山，太平山是吉祥山西南其蜀隻嫩嫩其山包。2014年拆遷，地敆今旦太平二弄東邊其融信雙杭別院小區。
山仔裏村敆太平山對面。2014年拆遷，地敆今旦山仔裏北邊其庭芳苑。
浦東村，文革其辰候改名號𡅏紅旗村。九幾年末期原拆原遷，地敆浦東新村。
浦西村，1992年火燒厝，蜀部份柴欄厝乞燒平八，茲蜀陣儂1994年搬去新起其浦西境新村住。剩下來其厝着2021年全部拆遷，地敆寧化路共浦西路交叉墿口邊兜。
斗池村，起着斗池山東南勢。1990年原拆原遷，地敆今旦斗池新居、斗池新村。
涵頭村着2000年拆遷，地敆今旦西洋路共白馬中路交叉墿口邊兜其白馬花園。
西洋村着1991年趁柴欄厝改成今旦其西洋新村，地敆西洋路邊兜。
西營村敆教場坂西南勢，2002年拆蜀部份，2007年全部拆唻，地敆今旦加洋新村附近。
教場坂村着2000年拆蜀部份，2014年全部拆唻，地敆今旦烏山九巷小區附近。
河上復號𡅏上河上，2001年拆遷，地敆今旦上河裏共仁德路附近，仱屬福建醫科大學附屬第一醫院其地。
河下復號𡅏下河上，是趁河上分出來其村。2001年拆唻蜀部份。這村今旦固敆𡅏，着福建醫科大學附屬第一醫院骿後其下河裏。
洋柄復號𡅏洋坪，敆河下西南勢。1996年拆遷，地敆福建醫科大學附近。
雙浦頭復號𡅏石步頭，八幾年，雙浦頭村趁柴欄厝改成今旦其雙浦頭新村，敆工業路墿邊其雙浦頭弄。
除去茲十三隻村，附近其大王、燕後、菏澤、長汀、寧化、江墘、義洲也信九案泰山：
大王村（地名雅化寫作大鳳村），着大王山東南勢其山骹，地敆今旦斗池路邊兜其大鳳巷、鳳凰北新村附近。
燕後（地名雅化寫作院後），地敆今旦祥坂路共望龍路交叉墿口附近。
菏澤，地敆今旦西二環中路邊兜其荷澤新村附近。
長汀，地敆今旦西二環中路邊兜其長汀裏花園附近。
寧化，地敆今旦寧化路共寧化支路交叉墿口西北勢，差不多就是2025年拆遷其寧化新村其地。
江墘，地敆今旦江墘社巷，華僑中學骿後。大部份乞拆唻變成華僑中學其地，儷剩幾落厝。
義洲，地敆今旦浦西境新村、錦標園附近。
歷史
[Siŭ-gāi | Gāi nguòng-mā]信九案泰山其地區着舊底福州城外斗西南方位其郊區，租塊舊底蜀七處都是堘，溪囝池囝成堆三，福州儂將租塊附近號𡅏十八洋。生總款其地方野容易發蟲囝，舊底野稠發生傳染病。故此，租塊其百姓會供瘟神來保佑自家𣍐得傳染病。
九案泰山其信仰有四五百年其歷史，供溫都統共康都統。溫都統名瓊，官封「東岱嶽宗御前忠靖王」；康都統名席，官封「東岱嶽宗御前英烈王」；伊兩隻將軍都是因為治好盡価百姓其瘟病乞玉皇上帝封官，屬東嶽大帝管，都是東嶽十太保之一。最早儷着太平山村有供兩隻將軍，太平山其香火是趁福州城北其東嶽廟請來其。大概着唐朝末期遘宋朝初期其辰候，南臺發生瘟病，盡価儂感染，儷有供兩隻將軍其太平山村受災最輕，故此附近其村都聯合起來供兩隻將軍，以求保佑，都領13村。最早十三鄉盡逼，無能耐起專門其廟，菩薩共叠骨都是供着大厝人家其廳中，或者廮大王爺其廟𡅏。差不多明朝、清朝其辰候，各隻鄉乍陸陸續續開始起專門其廟來供兩隻將軍下底其骹囝。
九案泰山其信仰敆福建比較特殊：十三隻村共同供蜀樣其菩薩，信仰聯合體比較大；每蜀隻村都有自家其村廟，但是供其主神是按問杯其結果輪𡅏坐十三隻堂𡅏，伓是長期坐蜀隻廟𡅏；另外，迎神是以接送主神其方式開始，嚽也是比較特別。
最早，東門其東嶽廟迎神活動是最大最隆重其。文革以後，迎神活動乞禁止，仱夫塊其迎神無了。九案泰山其迎神許辰候也停唻，但是遘九幾年，九案泰山其迎神活動復恢復了，固有盡価青年哥加入來。雖然講十三村都拆遷差不多了，九案泰山其迎神固留𡅏，固做𡅏盡鬧熱，年年暝參加其儂少有幾百人，多有千幾人，是今旦福州城區最大其迎神活動。
2016年3月，臺江區政府將「九案泰山信俗」列入臺江區第二批非物質文化遺產名錄。[1]2017年10月31號遘11月2號，頭屆「海峽兩岸（福州）九案十三鄉泰山文化節」舉辦，請台灣其宜蘭東嶽廟其儂來參加。[2][3]2018年，十三鄉也派儂去參加宜蘭東嶽廟其「宜蘭大拜拜」迎神活動，這迎神迎其是東嶽大帝。[4]2021年10月17號，「閩台青年泰山信俗非遺文化線上交流活動」敆西洋積善堂共宜蘭東嶽廟同時舉辦。[5]2024年10月15號遘17號，香港東華三院派儂來福州看九案泰山迎神。[6]
迎神
[Siŭ-gāi | Gāi nguòng-mā]每蜀年九月初一其午時是溫、康兩隻將軍開堂辦公其時間，最近幾年因為時間趕，經常提早遘八月三十暝晡就開堂了。開堂之前，供着西營裏長生堂其兩隻「泰山護駕大將軍」大伯、二伯出發去舊案溫、康兩隻將軍夫塊護駕。十三堂做簡單其儀式，將廟裏勢其溫、康兩隻將軍換上新其衣裳，換衣裳由山仔裏堂負責。儀式結束以後，將五營罐其封條扯唻，蓋蓋翻開，寓意將五營兵馬司其兵囝放出去巡，為迎神做準備。舊底開案以後固有問案、罪人戴枷其流程，經過文革破壞以後，今旦已經無去了。
接下來其初二遘初八就是十三堂自家其迎神活動。其他十二隻堂供其神遘舊案，向康將軍拜壽。初九是康將軍其生日（溫將軍生日是五月初五），按傳統着做儀式、擺供品、放炮仗、聚餐等等。十一暝晡遊馬爐，派儂扛𡅏馬爐巡十三鄉。馬爐是有馬頭其香爐，懸頂插𡅏兩隻將軍其令旗，扛馬爐其儂號𡅏馬夫。舊底十三鄉有其墿盡窄，轎無能耐入去，馬爐遘其地方就相當溫、康兩隻將軍行過蜀樣。
九月十二未時（差不多下晝蜀點遘三點）問杯，通過gĕ̤h杯其方式決定下年暝溫、康兩隻將軍坐底隻堂𡅏。問杯前蜀工一般會「試杯」一回，「試杯」其結果𣍐算數。問杯其先後順序也是固定其。問杯其辰候，各堂堂主跪兩隻將軍面前，師公將兩片杯向天𡅏gĕ̤h。兩片杯儷是蜀正蜀反號𡅏「聖杯」，代表將軍贊同。每回問杯結束，按傳統都有「奪馬牌」其儀式。馬牌是蜀隻柴牌，得遘馬牌其案就代表下年暝將軍坐嘻案其堂𡅏。儷是得遘坐案資格其案是幾隻堂合蜀堆其，就按許隻案內部其規定，決定兩隻將軍到底着坐底隻堂𡅏。太平山案其具體約定是：按太平山、山仔裏、雙浦頭這順序輪𡅏坐。河上案其約定是：河上輪兩回、河下輪蜀回。斗池案其約定是：斗池輪兩回、涵頭輪蜀回。聽講自家其堂得遘「蜀聖」（蜀隻聖杯），贏其許堂其青年哥此刻kĕk最快速度將馬牌奪去，罔躃罔聼自家其堂有無得遘「兩聖」（兩隻聖杯）。儷是無，就將馬牌還轉去，由下蜀案其青年哥接上。就總款連𡅏gĕ̤h，儷是都是蜀正蜀反號𡅏「三聖」（三隻聖杯），三聖定案，決定明年坐其堂。儷是gĕ̤h蜀輪下來九隻案都未中，就按固定順序再gĕ̤h蜀輪，gĕ̤h遘有案是「三聖」為止。明年暝坐其固是今年其案號𡅏「復案」。
十三許日敆舊案迎神，之後將神請遘行台暫時歇骹，按習慣行台一般設着西洋積善堂。十三暝晡會使敆西洋附近迎神。十四暝晡八點趁行台出發，巡過十三鄉。兹工也是最隆重其蜀工，每隻鄉都會做儀式，菩薩經過其地方儂都着擺供桌接神，號𡅏擺暝。迎神其辰候，溫將軍行前，康將軍行後。有蜀種講法是溫將軍嚴厲，康將軍仁慈。儷是做呆事乞溫將軍看見直接搦起來，行骿後其康將軍會將犯錯誤其儂教育囇放唻去。溫、康兩隻將軍每經過蜀隻堂，許隻堂都着將伊廮供桌𡅏供，做蜀隻名號𡅏「食宴」其儀式，堂𡅏也會煮粉乾、甜粥、鹹粥請參加其儂食。最後遘下年暝其新案設香案安厝，號𡅏轉宮。舊底最後蜀工是蜀晡做遘十五天光，過案以後，請師公做安位其儀式，等天光以後各儂過來燒香參拜。現在儀式簡化了，一般也着做遘半暝囝三四點乍會結束。之後，新案選蜀工去請師公過來收起五營兵馬，念經念囇，將五營罐封起來，這儀式乍算全部結束。
做半段
[Siŭ-gāi | Gāi nguòng-mā]除去年年暝蜀回其迎神，九案泰山每蜀隻子年做半段蜀回，就是講這儀式每十二年會做蜀回。兩隻將軍坐案其大堂做大道場，一般會請師公念經七日晡，也會請儂來做戲。其他其堂號𡅏小堂，也會請師公來做小道場。
做半段其最後是「出海」其儀式。出海就是搭蜀隻挈柴板、布、紙做其船囝，懸頂廮蜀隻桶桶號𡅏「福桶」，裏勢貯豬血、鷄毛等等垃渣乇，暝晡將這船囝送閩江𡅏燒唻。福桶順閩江流去海𡅏，寓意瘟病也乞逐海𡅏去，故此號𡅏「出海」。福州其迎五帝也有總款其出海儀式。
現狀
[Siŭ-gāi | Gāi nguòng-mā]現在十三鄉其大部份村都拆遷了，有其村是原拆原遷，鄉里固住這廟附近，總款情況鄉里對信仰比較積極。固有其村拆遷安置是散遘別塊去，儷生夫款信嚽其儂慢慢就少了。並且十三鄉現在是着市區裏勢，𣍐像舊底敆鄉下。每蜀回迎神其辰候都會放炮仗、燒棋盤，鑼鼓哐哐哐，做𡅏野鬧熱，乞蜀部份市民認為是「噪音擾民」、「污染環境」。迎神也會發生塞車，有其市民也是意見野大。特別是烏山骹附近有機關幹部其宿舍，茲蜀陣儂受無神論其影響，一般都看𣍐起迎神，見覺嚽是「封建迷信」。往年暝每蜀年迎神都會乞儂搦𡅏投訴，有關部門一般𣍐去去察，都是hĭ糊囇。2016年「九案泰山信俗」乞列入臺江區非物質文化遺產以後，大家儂其觀點開始慢慢改變，投訴其儂變少了。九案泰山府裏勢設蜀隻中華人民共和國祿位，來求國泰民安。2021年7月，九案泰山府舉辦「慶祝中國共產黨成立一百週年」其活動，希望利用總款其活動得遘政府其支持。
九案泰山其信仰跟𡅏時代發展。原來演奏其儷有十番伬，現在也有挈音響放現代音樂了。九案泰山共台灣其宜蘭東嶽廟文化交流，受遘當地政府其支持。台灣其「電音三太子」等等新其乇也敆茲辰候傳入福州，對福州迎神產生影響。青年哥加入迎神以後，開始敆傳統儀式裏勢加入現代元素，像「合興社」總款其青年哥社團，設計卡通神像，利用互聯網宣傳。固有青年哥通過抖音等等短視頻平臺直播迎神，讓固価儂瞭解九案泰山這信仰。有其青年哥有頭腦，伊各儂卜想將傳統信仰做成文化創意產業。但是有其儂見覺加入恰価商業化元素，本身就是偏離傳統信仰其初心。
九案十三鄉其堂
[Siŭ-gāi | Gāi nguòng-mā]
歷年問杯結果
[Siŭ-gāi | Gāi nguòng-mā]文革以前其資料參考《河上王氏族譜》。九幾年以後其資料由九案泰山各隻管委會統計。
| 公曆年份 | 干支年份 | 坐案其堂 | 備註 |
|---|---|---|---|
| 1944年 | 民國三十三年甲申 | 西洋積善堂 | 西洋做半段。 |
| 1945年 | 民國三十四年乙酉 | ||
| 1946年 | 民國三十五年丙戌 | 洋柄同心堂 | |
| 1947年 | 民國三十六年丁亥 | 河上救生堂 | |
| 1948年 | 民國三十七年戊子 | 涵頭大堂 | |
| 1949年 | 民國三十八年己丑 | 教場坂堂 | |
| 1950年 | 庚寅年 | 斗池社 | |
| 1951年 | 辛卯年 | 浦東大堂 | |
| 1952年 | 壬辰年 | 斗池社 | |
| 1953年 | 癸巳年 | 浦西福壽堂 | |
| 1954年 | 甲午年 | 太平山堂 | |
| 1955年 | 乙未年 | 河上救生堂 | |
| 1956年 | 丙申年 | 太平山堂 | |
| 1957年 | 丁酉年 | ||
| 1958年 | 戊戌年 | 斗池社 | |
| 1959年 | 己亥年 | ||
| 1960年 | 庚子年 | 浦西福壽堂 | |
| 1961年 | 辛丑年 | 河上救生堂 | |
| 1962年 | 壬寅年 | 太平山堂 | |
| 1963年遘1990年期間停止舉辦 | |||
| 1991年 | 辛未年 | 太平山堂 | 太平山做半段。無問杯。 |
| 1992年 | 壬申年 | 太平山堂 | 無問杯 |
| 1993年 | 癸酉年 | 洋柄同心堂 | 鐵嶺做半段。恢復以後頭回十三鄉聯合迎神、問杯。 |
| 1994年 | 甲戌年 | 河上救生堂 | |
| 1995年 | 乙亥年 | 河上救生堂 | 復案 |
| 1996年 | 丙子年 | 西營長生堂 | |
| 1997年 | 丁丑年 | 西洋積善堂 | |
| 1998年 | 戊寅年 | 浦東境大堂 | |
| 1999年 | 己卯年 | 河上救生堂 | |
| 2000年 | 庚辰年 | 西洋積善堂 | |
| 2001年 | 辛巳年 | 浦東境大堂 | |
| 2002年 | 壬午年 | 西洋積善堂 | |
| 2003年 | 癸未年 | 西營長生堂 | |
| 2004年 | 甲申年 | 浦西福壽堂 | |
| 2005年 | 乙酉年 | 浦東境大堂 | |
| 2006年 | 丙戌年 | 雙浦頭協心堂 | |
| 2007年 | 丁亥年 | 河上救生堂 | |
| 2008年 | 戊子年 | 西洋積善堂 | 西洋做半段。十三鄉聯合迎神。 |
| 2009年 | 己丑年 | 下河上大堂 | |
| 2010年 | 庚寅年 | 教場坂堂 | |
| 2011年 | 辛卯年 | 斗池社 | |
| 2012年 | 壬辰年 | 雙浦頭協心堂 | |
| 2013年 | 癸巳年 | 浦東境大堂 | |
| 2014年 | 甲午年 | 教場坂堂 | |
| 2015年 | 乙未年 | 斗池社 | |
| 2016年 | 丙申年 | 洋柄同心堂 | |
| 2017年 | 丁酉年 | 太平山堂 | 邀請臺灣宜蘭東嶽廟聯合迎神。 |
| 2018年 | 戊戌年 | 西洋積善堂 | |
| 2019年 | 己亥年 | 山仔裏陰陽專案堂 | |
| 2020年 | 庚子年 | 西洋積善堂 | |
| 2021年 | 辛丑年 | 洋柄同心堂 | |
| 2022年 | 壬寅年 | 浦東境大堂 | 試杯：西營長生堂 |
| 2023年 | 癸卯年 | 教場坂堂 | 試杯：山仔裏陰陽專案堂 |
| 2024年 | 甲辰年 | 教場坂堂 | 復案。試杯：西洋積善堂 |
| 2025年 | 乙巳年 | 太平山堂 | 試杯：浦西福壽堂 |
尾註
[Siŭ-gāi | Gāi nguòng-mā]
- ↑ 福州市台江区人民政府关于公布第二批区级非物质文化遗产名录、代表性传承人的通知. 福州市台江区人民政府.[失效鏈接]
- ↑ 两岸共祭东岳大典 首届海峡九案泰山文化节成功举办. 2017-10-31.
- ↑ 2017首屆海峽兩岸（福州）九案十三鄉泰山文化節.
- ↑ 宜蘭大拜拜／復興傳統火炬 東嶽仁聖大帝暗訪紀錄. 今日新聞. 2018-05-15.
- ↑ 閩台舉辦泰山信俗交流活動 傳承非遺文化. 香港文匯網. 2021-10-17.
- ↑ 東華三院派員參訪福州九案泰山遊神活動. 東華三院. 2024-10-28.
- 1 2 3 福建省已换证宗教活动场所一览表(道教). 福建省民族与宗教事务厅. 2012-12-31.
參考資料
[Siŭ-gāi | Gāi nguòng-mā]- 调查与研究︱闽都游神：迷恋“塔骨”的年轻人
- 春节新年俗：福州九案泰山温康二都统的新春团拜
- 郑衡泌. 调适与重建：城市化进程中民间信仰庙宇的道教化与规范化——以福州九案十三堂为例. 世界宗教文化. 2014, (6). doi:10.3969/j.issn.1007-6255.2014.06.016. （原始內容存檔着2025-02-12）.
- 蒋驰. 福州九案泰山信仰及其祭祀空间研究. （原始內容存檔着2025-02-16）.
- 张帆. 福州九案泰山信仰与城市“大傩”. 贵州大学学报·艺术版. 2020, 34 (5). doi:10.15958/j.cnki.gdxbysb.2020.05.006. （原始內容存檔着2025-11-12）.
- 耿灏. 城市化进程中的小区域民间信仰研究——以福州九案泰山信仰为例. 福建社会主义学院学报. 2013, (6). doi:10.3969/j.issn.1008-8563.2013.06.013. （原始內容存檔着2025-11-12）.
- 甘满堂. 自主灰色重建与政府集约安置：城镇化背景下传统信俗文化空间续存路径. 湖南师范大学社会科学学报. 2022, 51 (3). doi:10.19503/j.cnki.1000-2529.2022.03.011. （原始內容存檔着2025-11-12）.
- 甘满堂. 拆迁与重组：都市化进程中的村庙生存现状——福州市区九案泰山十三堂调查. “中华文化的当代社会影响”学术研讨会. 2012.
- 陈支平; 李玉柱 (編). 闽台文化的多元诠释（二）. 厦门大学出版社. 2013. 116-139. ISBN 978-7-5615-4663-5.