貽順哥燭蒂

《貽順哥燭蒂》是閩劇裏勢野出名其蜀題喜劇，盡価福州儂都會仈。這戲是閩劇劇作家鄧超塵着1952年其辰候根據民間其蜀隻同名其故事寫其，講蜀隻名字號𡅏貽順哥其奸狡利生理儂討老媽，失去老媽，最終儷得遘蜀粒燭蒂其故事。

演貽順哥最出名其儂有林務夏、朱善根等等閩劇藝術家。2015年，由這故事改編其《貽順哥三羊開泰》搬上中央臺戲曲春節晚會其舞臺，嚽也是閩劇頭回上春晚。

故事

這故事其主人公名字號𡅏馬貽順，別儂告伊貽順哥，差不多是滿清乾隆遘嘉慶許辰候其儂。伊着南臺石獅兜（今旦福州臺江區延平路南端）夫塊開蜀間絲線店，這儂盡去奸狡利，通過做生意共放貸趁遘野価其錢。不過，伊儂遘中年了固是單身哥蜀隻。

行船其陳春生替伊郎罷陳友德去出海，半墿中dáe̤k着風颱，船翻去，儂便無塊討去。貽順哥聽講這陳春生其老媽林春香生野俊，儂復輪活，就挈放貸其方式卜想逼伊做自家其老媽。陳友德故㑚漢貽順哥對自家厝野好，逼伊新婦嫁乞貽順哥。林春香無能耐，提出三隻條件：一，貽順哥着負責養陳友德，死囉固着乞伊送葬；二，結婚以後儷是養囝，着掏蜀隻乞陳春生做囝；三，儷是陳春生轉來，貽順哥着馬上將伊dèng乞陳春生。貽順哥全部同意，將伊討轉做老媽。遘尾兩隻儂養兩隻囝，貽順哥將大囝掏做陳春生其囝。陳友德死囉以後，伊也按約定將老陳埋唻。

無想遘十年以後，嘻陳春生生目蜀時出現，來討春香，要求貽順哥按之前其約定將春香dèng乞伊。貽順哥伓肯，兩隻儂告遘海防廳其王紹蘭老爺夫塊。林春香要求按之前其約定來辦，貽順哥講透底都無世乇約定。王紹蘭𣍐仈着蔣做，就去請教自家其老媽白恭人。按白恭人其建議，王紹蘭讓春香行遘衙門廳其骿後去。無箬恒，騙陳春生共貽順哥兩隻儂講春香已經自殺，問伊各儂底儂想將伊屍體領轉去埋；復講伓肯挃其許隻會另外得遘蜀隻紅包。陳春生馬上講着領；貽順哥講會使將屍體讓乞陳春生。王紹蘭就將林春香判乞陳春生；復將蜀隻紅包掏乞貽順哥。貽順哥故㑚漢是錢，野歡喜；遘厝翻起來覷，發現裏勢儷有蜀粒燭蒂。

對福州文化其影響

《貽順哥燭蒂》共《鄭唐傳》、《紅裙記》、《揀茶記》齊號𡅏「福州四大民間故事」，對福州文化有盡大其影響。敆福州話裏勢，挈「貽順哥燭蒂」來罵儂奸狡利，「貽順」來講儂性格奸狡利。

根據學者其研究，歷史裏勢真其有馬貽順這儂。今旦福州第四中學學校裏勢有蜀陣「石獅臺前社」其石碑，裏勢講：道光6年11月，臺前社28隻儂捐款修墿，起這碑着大廟山八角井邊兜紀念。其中也有馬貽順其名字。伊捐款7塊大洋，捐其錢着裏勢排名第四。故此學者見覺歷史裏勢其貽順哥伓是真其奸狡利，伊對自家奸狡利，對鄉里捐款做事計盡大框。

這戲裏勢其俗語話

《貽順哥燭蒂》留下野価俗語話，像講：

• 道士叔外罩衫褪起去——都是符（胡）
• 蜀把米抾壁𡅏——無蜀粒敆粒
• 甕𡅏摒橄欖
• 算盤拍遘十五檻——汝算有夠精

等等。