閩劇

Chók-cê̤ṳ Wikipedia
跳至導覽 跳至搜尋

"閩劇" 是一篇漢字文章,卜覷平話字版本"Mìng-kiŏk",篤嚽所
敆福州裴仙宫唱倛閩劇

閩劇,也號𡅏福州戲,是福州特色其蜀種劇種,使福州話唱,福州話念白。

歷史[Siŭ-gāi | Gāi nguòng-mā]

舊底其閩劇海報

唐朝其辰候,福州就有「歌舞百戲」其演出去了。南宋辰候南戲臺中其《張協狀元》,就是獲福州百姓其「福州歌」共「福清歌」來做曲牌其。

明朝萬曆37年(1609年),福州出身其官員曹學佺乞皇帝逐轉厝。伊着洪塘祖厝組織戲班,請儒士去夫塊聽劇。伊精通音律,創作出來蜀種適合使福州話唱其腔,別儂都見覺者腔𣍐呆,告嚽號𡅏「儒林班」。滿清入關以後,曹學佺自殺,者腔就慢慢無儂唱去了。

同時復有江西弋陽腔傳遘福州來。者戲班蜀七處躃躃動去演出,故此號𡅏「江湖班」。者「江湖班」唱戲全使「土官話」(官話其字使福州話其音來讀),前臺唱,後臺幫腔,鑼鼓窾窾叫,聽𡅏野鬧熱,百姓都盡去喜歡。但是者「土官話」着百姓臺中無箬壞儂聽會會意,有儂就掏𡅏「平話」(福州話)來唱白,「平話戲」就總款產生去了。滿清咸豐年,洪塘其老儂懷念舊底其「儒林班」,借做半段唱戲其機會,組織頭隻使鄉其名字起其戲班,號𡅏「洪塘儒士班」。由茲辰候起,「儒林戲」復開始有儂唱去了,並且唱其儂罔變罔多,戲派罔變罔価。由鄉下傳遘城裡,復由福州傳遘長樂福清永泰古田閩清等等其地方,敆各塊也是野受歡迎。最尾「儒林戲」、「江湖戲」共「平話戲」會變合蜀堆去了,百姓告伊「三合響」,嚽就是今旦其閩劇了。

中華民國成立以後,閩劇其發展罔變罔成熟。舊賽樂,新賽樂,三賽樂,善傳奇,賽天然,慶樂然是許辰候有特色其戲班,敆福州儂臺中有「三樂一旗兩頭羊」其講法。許滿価其名家臺中,固是算鄭奕奏最出名。伊着短短幾年時間臺中,塑造出來《新茶花》裡勢其「新茶花」,《百蝶香柴扇》裡勢其「林英姐」,《黛玉葬花》裡勢其「林黛玉」等等形象,乞儂號𡅏「閩劇泰斗」。

中國共產黨乍上臺其辰候,鼓勵閩劇其創作。遘尾了文化大革命開始,唱閩劇其都乞毛澤東逐去「上山下鄉」。雖然講現在政府開始保護閩劇,無年呆會聽福州話其後生囝罔變罔少,愛聽閩劇其大部分是老儂,故此講閩劇有失傳其危險。

特色[Siŭ-gāi | Gāi nguòng-mā]

唱腔共樂器[Siŭ-gāi | Gāi nguòng-mā]

閩劇使其樂器

閩劇其唱腔分「江湖調」,「洋歌調」,「逗腔」共「小調」茲幾種。

「江湖調」聲調高昂,字価腔少,一泄而盡。《江湖疊》,《柴牌調》,《陰調》都是者調比較稠使其曲牌名。

「洋歌調」主要其曲牌會中分「大介大牌」,「中介大牌」,「大介盤答」等等擊中。蜀隻儂唱號𡅏「大牌」,兩三隻儂唱號𡅏「盤答」。「大介」,「中介」共「小介」其區別着「起介」(開頭其鑼鼓)夫塊。

「逗腔」有15種板調,臺中其轉折共結尾有野価其「唉」,「伊」茲蜀類虛腔。主要其曲牌有《自掏嶺》,《寬板》,《急板》等等。

「小調」都是閩劇其樂曲,是平常講其福州話來唱,《西湖亭》,《琵琶怨》共《新茶花》都是茲蜀類其閩劇。

閩劇其曲牌大部分是由弋陽腔四平腔徽劇崑曲發展來其。「一唱衆和」其幫腔共「夾滾」,就是由弋陽腔裡勢學來其。

閩劇其介頭(拍鑼鼓)由「江湖調」,「平講戲」,「逗腔」共「十番」其鑼鼓介頭發展來其。武場吸收去野価京劇其鑼鼓經,不過有仂囝𣍐蜀樣。

閩劇其樂器有啲咑二胡椰胡茲蜀類管絃樂器,共茲蜀類拍擊樂器。

角色行當[Siŭ-gāi | Gāi nguòng-mā]

傳統其閩劇裡勢一般僅有7隻儂,號𡅏「七條椅」。

最早閩劇僅有生,旦,丑3種角色,號𡅏「三小戲」。遘尾了慢慢增加,最尾加遘今旦其「十二角色」:老生,小生,武生,青衣,花旦,老旦,大花,二花,三花,貼,末,雜。

劇本[Siŭ-gāi | Gāi nguòng-mā]

閩劇其大部分劇本是使漢字來寫其,僅是觸着無塊討其或者𣍐仈着蔣寫其漢字,就獲近音其字來替。

閩劇共福州文化[Siŭ-gāi | Gāi nguòng-mā]

閩劇吸收野価童謠歌俗語、諺語、典故,對福州其語言共文化影響野大。像閩劇《貽順哥燭蒂》,就是根據福州商儂馬貽順其故事編其。現在福州儂使「貽順」者詞來罵儂奸狡利,就是受者閩劇其影響其。

外斗連接[Siŭ-gāi | Gāi nguòng-mā]