王延鈞

Chók-cê̤ṳ Wikipedia
跳至導覽 跳至搜尋

參考閩東語平話字其版本。/ Chăng-kō̤ Mìng-dĕ̤ng-ngṳ̄ Bàng-uâ-cê gì bēng-buōng.


王鏻(?—935年),原來名字號𡅏王延鈞,是五代十國其辰候閩國其第3代皇帝。926年遘935年在位。

伊是王審知其第2隻囝。最早是泉州刺史。926年,王延鈞共建州刺史王延稟合兵拍福州,將閩王王延翰刣死。後唐封伊做威武軍節度使、琅琊王、閩王。931年,王延稟聽講王延鈞病野狠,就帶兵拍福州。王延鈞派王仁達對抗,將王延稟拿𡅏刣唻。

王延鈞者儂野迷信。伊信道教,敆福州起野価宮殿。伊信道士陳守元其話,卜想做皇帝,敆932年要求後唐封伊做中書令。後唐無察伊,伊就共後唐斷絕一切關係。第二年自稱皇帝,國號大閩,年號龍啓。復建立五廟來祭自家其祖宗,封高蓋山做西嶽。

王延鈞其老媽是南漢清遠公主,不過野早就死了。遘尾了復討金氏做老媽,不過共伊無感情。王延鈞最中意自家其細婆陳金鳳,敆今旦西湖下底專門起蜀隻宮殿乞伊,日日共伊其坐龍船敆西湖裡勢客佻。福州儂都野怒茲隻陳金鳳。

935年,王延鈞病野狠,立陳金鳳做皇后。王延鈞其囝王繼鵬聽講以後,發動政變,拍遘皇宮裡勢,將陳金鳳刣死。王延鈞囥着帳下底,乞儂發現,及幾刀行去。王延鈞疼卜死,宮女看𣍐下,將伊之刣死。廟號惠宗,諡號齊肅明孝皇帝。