Nā-gŭng

Nā-gŭng (拏公, 拿公), iâ hô̤ lā̤ Nā-uòng-iè (拿王爺), sáng Bók (卜), miàng Hók (福), sê Hók-ciŭ mìng-găng gì siŏh ciáh cūi-sìng gâe̤ng cāng-sìng, dĕk-biék sê kuóh-dà̤ có̤i sáng ĭ. «Mìng-dŭ Biék Gé» diē-sié ô iā sâ̤ ĭ gì gô-sê̤ṳ.

Nā-gŭng buōng-dā̤ sê Siêu-ū giàng-sùng gì sĕng-lī-nè̤ng. Siŏh gĕ̤ng tiăng gōng áuk-gūi ciŏng dŭk-iŏ̤h gĕ̤h cāng lā̤ buóh siōng hâi nè̤ng, ké̤ṳk ĭ huák-hiêng. Ĭ ciŏng dŭk-iŏ̤h chiōng giâ lì siăh lâi, sĕng--kó̤. Ĭ lâi-mā Nā-bò̤ huák-hiêng, bô̤ ĭ sī-sĭ duâi tiè, iâ ké̤ṳk dŭk-ké hṳ̆ng sī. Nā-gŭng lâu-gŭng-mā géu lāu gó̤-lòng siàng gì nè̤ng, gó-chṳ̄ Hók-ciŭ nè̤ng kī miêu gé̤ṳng ĭ-lâng-ciáh.

Ciŏ Nguòng-ciŏng puái Tŏng Huò (湯和) téng hāi lā̤ páh Hók-ciŭ, gáu Ngū-hū-muòng (五虎門) páh mâ̤ diē, găng-huōi-duâi-cĕ̤ng, huák-buó bēng-ùng gōng nâ sê páh diē Hók-ciŭ "bók liù ék ìng" (不留一人, "siŏh ciáh nè̤ng dŭ mò̤ làu giâ lì"). Nā-gŭng tiăng gōng, kuóng siàng Tŏng Huò, ciŏng bēng-ùng gāi siàng "bók sák ék ìng" (不殺一人, "siŏh ciáh nè̤ng dŭ mò̤ tài"). Cuòi cêu sê Nā-gŭng bō̤-hô Hók-ciŭ nè̤ng gì "Nā-gŭng ék cê géu uâng-mìng" (拿公一字救萬民) gì diòng-siók. Tŏng Huò diōng kó̤, ciŏng cī giông dâi-gié bó̤-gó Ciŭ Nguòng-ciŏng, Ciŭ Nguòng-ciŏng cêu hŭng Nā-gŭng có̤ "Hô̤-guók-gŭng Tiĕng-hâ Bĭng-mā-sṳ̆ Dŭ-nguòng-só̤i" (護國公天下兵馬司都元帥), kī miêu gé̤ṳng ĭ.

Mìng-gĕ̤ng gĕ̤ng gièng dê-kṳ̆, dĕk-biék sê Mìng-gĕ̤ng diē-hāi-kāu gì dê-kṳ̆ ô kī Nā-gŭng-miêu lì gé̤ṳng ĭ. Tàu ciáh Nā-gŭng-miêu găk Dài-gĕ̤ng gì Dâi-miêu-săng (大廟山), hô̤ lā̤ Bók-gŭng-sṳ̀ (卜公祠), dāng cháik-chiĕng buăng gáu Ò̤-â-gă̤ (河下街) lāu. Muāng-chĭng gì sèng-âu, kó̤ Liù-giù gì cháik-hŭng-sṳ̄ (冊封使) dŭ â̤ kó̤ hŭ-uái chiāng Nā-gŭng gáu sùng lā̤, giù dáik bìng-ăng.