Hók-ăng-uâ

Chăng-kō̤ Mìng-dĕ̤ng-ngṳ̄ Háng-cê gì bēng-buōng. / 參考閩東語漢字其版本。

---

Hók-ăng-uâ (福安話) sê Mìng-dĕ̤ng-ngṳ̄ báe̤k buô gì siŏh cṳ̄ng dâi-biēu huŏng-ngiòng, sāi gì nè̤ng ciō-iéu diŏh Hók-gióng-sēng Mìng-dĕ̤ng gì Nìng-dáik dê-kṳ̆. Hók-ăng-kiŏng sê Hók-ăng-uâ gì dâi-biēu kiŏng, gó-chṳ̄ hô̤ ciā miàng-cê.

Hók-ăng gô-dā̤ sê Nìng-dáik dê-kṳ̆ gì ùng-huá dṳ̆ng-sĭng. Chĭng-dièu muăk-nièng, chók-hiêng siŏh buōng ciŏng-muòng gái-siêu Hók-ăng-uâ ĭng-ông gì ông-cṳ̆, miàng-cê hô̤ lō̤ «Ăng-kiŏng Báik-ĭng» (安腔八音).

Gâe̤ng Hók-ciŭ-uâ gì kṳ̆-biék

Siŏng-dó̤i Hók-ciŭ-uâ lì gōng, Hók-ăng-uâ diē-sié bō̤-liù siŏng-dŏng sâ̤ gì gū-dâi Mìng-dĕ̤ng-ngṳ̄ gì dĕk-sáik. Hók-ăng-uâ iâ sêu báe̤k buô Ngù-ngṳ̄ gì īng-hiōng, huák-sĕng siŏh-buô-hông gì biéng-huá.

• Hók-ăng-uâ bī Hók-ciŭ-uâ dŏ̤ 2 bĭk siăng-mō̤: [j] gâe̤ng [w]. Găk «Ăng-kiŏng Báik-ĭng» diē-sié, cī lâng bĭk siăng-mō̤ ké̤ṳk chĭng có̤ "Ṳ̀-mō̤" (如母) gâe̤ng "Ù-mō̤" (無母).
• Hók-ciŭ-uâ gì [s] găk Hók-ăng-uâ diē-sié dŭ sê tĕ̤k [θ].