曼絨古田會館

參考閩東語平話字其版本。/ Chăng-kō̤ Mìng-dĕ̤ng-ngṳ̄ Bàng-uâ-cê gì bēng-buōng.

---

曼絨古田會館敆馬來西亞霹靂州曼絨縣七條路。

歷史

曼絨古田會館其歷史，有能涯溯源遘培民小學。由1903年開始，野価十邑儂搬遘十字路，做塍討生活。後首復有儂搬遘縣裡勢別其位處，像二條路、三條路、五條路、七條路、莫珍歪、昔加里等等。其中搬厝第一価其，就是去七條路其坵塍儂。1920年，坵塍儂起了培民小學，讓自家其囝伲有書讀，後首故有了9英畝地做𣗬奶園。者學校其董事部，也就是七條路坵塍儂其頭頭隻有系統其組織了。

1928年，全世界經濟都儥好，𣗬奶無塊賣，小學也伓好做。正好七條路下南儂做其醒民學校共興化儂做其育德小學合併，變成民德中小學。佪正好敆民德隔壁其三英畝𣗬奶園，就題捐乞民德了。長下六英畝，做七條路坵塍儂所共有其產業，由李培春、林家橫、李森興等等儂一直託管遘1950年代。

1950年代起頭，坵塍儂拍算賣唻長下其六英畝地，買了雙溪萬宜其五英畝地做義山。爲𡅏向政府申請改囇土地用途，只堆儂發起「愛大華古田會館」，掏會館其名字去申請。遐辰候，㑚有七條路其坵塍儂，乍有能涯加裡會館。第一開始其會所也儥大，卜做活動，都着去寶昌酒家其2層樓。

1956年初，會館向七條路其坵塍儂募款，得遘錢買下愛大華大街125號做會所。11月30號，開會員大會，都講着擴大會館，就將名字改做「天定古田會館」。原底其會所也敆1958年12月賣唻。1960年11月30號，做理事會議，講着起蜀隻新其會所。拿督林心漢題捐自家其地。4年後厝起好，共總有3層樓，敆愛大華大街220遘222號。

1973年4月30號，理事會開會其時候，決定起蜀隻大禮堂。1983年，天定縣改名爲曼絨縣。許蜀日其4月21號，會館也改名，號「曼絨古田會館」。1993年，禮堂起好。古田會館也由許蜀日其7月1號搬裡。2016年12月17號，舊底其3層樓會所改做七條路文物館共古田樂齡聯絡所。

外斗鏈接

• 曼絨古田會館