朝鮮半島歷史

"朝鮮半島歷史" 是蜀篇漢字其文章，卜覷平話字版本"Dièu-siēng Buáng-dō̤ lĭk-sṳ̄"，篤嚽塊。

朝鮮半島舊底號𡅏「高麗」「朝鮮」，是東亞其蜀隻半島。這半島懸頂有2隻國家：朝鮮民主主義人民共和國（一般號𡅏朝鮮或者北韓）共大韓民國（一般號𡅏韓國或者南韓），主要其民族都是朝鮮族，講朝鮮語（也號𡅏韓國語）。這國家其歷史眞長。

史前時代

今旦考古學家其研究發現，幾十萬年以前就有儂着夫塊住了。按朝鮮神話裡勢其講法，天神桓雄共熊其諸娘囝結婚，生下檀君，這檀君就是今旦朝鮮民族其始祖。遘尾了檀君建立古朝鮮，嚽是朝鮮其開國。敆今旦北韓其平壤有檀君其墓，號𡅏「檀君陵」。不過嚽是伓是檀君真其墓，現在儂固講𣍐清楚，因為北韓政府伓讓考古人員行裡去調查。

中國其《史記》裡勢有蜀種共朝鮮神話完全𣍐蜀樣其講法。伊裡勢講中國商朝其箕子着滅國其辰候走去朝鮮，建立朝鮮國。不過着今旦其朝鮮半島透底都無許辰候中國文化其甚乇考古發現，唯一可能會證明其「箕子陵」，也敆1959年乞北韓政府拆囇了，拆其辰候發現裡勢夫乇都無。

古代

由1世紀開始，韓半島懸頂有高句麗、百濟、新羅三芘國家。茲隻時代乞韓國史學界號𡅏「三國時代」。三國臺中高句麗最強大，隋煬帝共唐太宗自家帶幾十萬其部隊去拍，都乞伊拍輸去。不過高句麗也元氣大傷，着668年乞新羅滅囇，統一新羅王朝就總款產生了。有其高句麗儂走去滿洲，共夫塊其儂齊建立渤海國。

統一新羅着10世紀中期大亂，蜀隻號𡅏王建其將軍最終重新統一國家，建立高麗王朝。由1170年開始，高麗國王完全無權力，是武臣其傀儡。1270年，國王借蒙古兵其手將茲蜀陣武臣都掏滅囇，不過此刻復變成蒙古皇帝其傀儡。這以後幾乎每蜀代其高麗國王都是蒙古皇帝其伲婿。

遘尾了朱元璋將蒙古儂逐去漠北，高麗國王固是共蒙古儂徛着蜀堆，敆1388年派將軍李成桂去拍明朝。李成桂共嘢価儂都見覺這政策是綻其，最終着1392年篡位，建立朝鮮王朝。朝鮮王朝是韓國歷史懸頂相當重要其蜀隻王朝，科學共文學都嘢發達。朝鮮世宗大王在位其辰候，告學者發明「訓民正音」，規定朝鮮語着獲嚽來寫。這「訓民正音」也號𡅏「大字」，就是今旦其諺文。

近代遘現代

1897年10月12號，朝鮮高宗宣佈將國名改成「大韓帝國」。日本共俄羅斯發生戰爭其辰候，韓國𣍐想受影響，着1904年1月21號宣佈「中立」。但是日本乞伊做怒去，敆2月出兵侵略韓國，逼韓國政府共日本政府簽「韓日議定書」，將韓國變做自家其保護國。

1907年7月20號，日本儂逼大韓帝國其高宗皇帝退位。1910年8月22號，許辰候其內閣大臣李完用共日本統監（共總督差不多）簽訂協議「韓日合併條約」，將大韓皇帝其權力「完全讓乞大日本帝國皇帝」。當月29號，向世界宣佈這條約。韓半島就總款變成日本其殖民地了。

韓國乞日本滅囇以後，伊其國民都盡去不滿。1919年3月1號，朝鮮全國其儂發動反對日本其「三一運動」，乞日本殖民政府鎮壓，刣死嘢価儂。李承晚茲蜀陣獨立運動家走去中國，着上海成立「大韓民國臨時政府」，繼續反抗日本其統治。這「大韓民國臨時政府」着1938年跟蔣介石走重慶去，敆中國抗日戰爭其辰候，派儂去對手中華民國國民政府。固有其朝鮮儂走去滿洲，共夫塊其儂組成「東北抗日聯軍」。

1945年8月15號日本投降，蘇聯共美國按當初簽訂其條約，派部隊佔領韓半島。兩國部隊按北緯38度做界線，北邊是蘇聯，南邊是美國。

1946年2月，蘇聯卜想將韓半島變做伊其衛星國，讓敆蘇聯其金日成轉去，着北邊另立「北朝鮮臨時人民委員會」，伓接受美國提出其「囫圇半島統一選舉」其要求。1948年8月15號，南方成立大韓民國。按選舉其結果，李承晚當選總統。差不多半個月日以後，金日成敆北方成立朝鮮民主主義人民共和國。韓半島就總款分裂成兩隻國家了，遘今旦固未統一。

韓戰（朝鮮戰爭）

1950年6月25號，北韓污蔑南韓派兵侵略，生目蜀時發兵侵略韓國，韓戰就總款開始了。

蘇聯使武器去對手北韓，復加𡅏南韓其部隊仂囝準備都無，北韓嘢快就拍下南韓其首都漢城（今旦其首爾）了，無仂恒拍下南韓大部分其地方，南韓僅剩釜山附近。27號，美國派兵支援韓國。大部分其國家對北韓這做法嘢不滿。7月7號，聯合國通過決議，16隻國家組成聯合國軍，出兵支援南韓。道格拉斯·麥克亞瑟指揮聯合國軍着仁川登陸，蜀墿向北。北韓領導人金日成走去中國邊界夫塊，剃了求毛澤東出兵。10月25號，中國最終派「志願軍」去對手北韓，蘇聯也派飛行員混着中國部隊裡勢去對手伊。美國固僅喊中國飛機蜀晡之間生目蜀時變茲滿霸，都𣍐仈快勢總款；遘尾了蘇聯解體以後，乍由俄羅斯夫塊會仈當時是約瑟夫·史達林敆𡅏做呆。雙方夫儂都拍𣍐過對方，最終敆1953年7月26號，雙方代表着板門店簽訂《停戰協議》。

韓戰以後

南韓

1960年5月16號，韓國其軍官朴正熙政變上臺，開始伊其17年軍事獨裁時代。這17年臺中，韓國經濟發展盡去快，共香港、新加坡、臺灣（中華民國）齊號𡅏「亞洲四小龍」。

1980年，朴正熙乞儂暗殺，無箬恒，軍官全斗煥上臺。這儂也是做獨裁其，不過共朴正熙𣍐蜀樣，百姓都對伊印象𣍐好。1980年，光州有儂抗議，伊派部隊去鎮壓，刣死嘢価儂，嚽就是光州民主運動。不過嚽事件發生以後，韓國其民主運動有眞大其發展。1987年，復發生抗議，最尾，全斗煥敆1988年允許自由選舉總統。總款，韓國就完全變成蜀隻民主其國家了。

北韓

最早，北韓受遘蘇聯共中華人民共和國其幫助，經濟比南韓好。嘢価着日本其朝鮮儂都轉去北韓。北韓政府將茲蜀陣「資本家」其財產奪去，將伊各儂關着集中營裡勢。遘尾了蘇聯解體，中國對北韓其支援也罔變罔少，北韓其經濟也罔變罔差。復加𡅏北韓嘢稠做災，人民生活盡去喫虧，餓死嘢価儂。

北韓儂將金日成當神來拜，國際懸頂都批評伊做個人崇拜，伊固焦打辯講嚽是「英雄崇拜」。北韓其第2代最高領導人金正日共第3代其金正恩，蜀隻是伊其囝，蜀隻是伊其孫。

北韓僅承認「主體思想」共「先軍政策」，𣍐允許儂懷疑這思想，也𣍐使自家提出政治思想。伊𣍐允許儂批評政府，𣍐允許儂有宗教信仰，騙伊其國民講美國共南韓總款其資本主義國家都嘢逼，全世界僅有北韓其儂生活最好。伊𣍐承認南韓政府，告伊「南朝鮮傀儡政權」。伊𣍐允許儂聽邊兜國家其廣播，𣍐允許儂看邊兜國家其電視頻道，互聯網（網際網絡）也是無共世界懸頂連蜀堆其。去這國家其外國儂都會受遘伊其特工其監視。大部分其國際媒體都認為北韓是蜀隻嘢𣍐自由其國家。