Wikipedia:保薦好文

Chók-cê̤ṳ Wikipedia
跳至導覽 跳至搜尋

參考閩東語平話字其版本。/ Chăng-kō̤ Mìng-dĕ̤ng-ngṳ̄ Bàng-uâ-cê gì bāng-buōng.


着「保薦好文」租塊列出倛文章都寫無呆,會中汝去讀蜀讀。

今旦已經有6篇「保薦好文」。

  1. 曲蹄
  2. 朝鮮半島歷史
  3. 琉球國
  4. 平話字
  5. 閩劇
  6. 國際象棋
P writing.svg

保薦好文[Gāi nguòng-mā]

韓戰坦克

朝鮮半島舊底號𡅏「高麗」「朝鮮」,是東亞其蜀隻半島。這半島懸頂有2隻國家:朝鮮民主主義人民共和國(一般號𡅏朝鮮或者北韓)共大韓民國(一般號𡅏韓國或者南韓),主要其民族都是朝鮮族,講朝鮮語(也號𡅏韓國語)。這國家其歷史眞長。今旦考古學家其研究發現,幾十萬年以前就有儂着夫塊住了。按朝鮮神話裡勢其講法,天神桓雄其諸娘囝結婚,生下檀君,這檀君就是今旦朝鮮民族其始祖。遘尾了檀君建立古朝鮮,嚽是朝鮮其開國。敆今旦北韓其平壤有檀君其墓,號𡅏「檀君陵」。不過嚽是伓是檀君真其墓,現在儂固講𣍐清楚,因為北韓政府伓讓考古人員行裡去調查。由1世紀開始,韓半島懸頂有高句麗百濟新羅三芘國家。茲隻時代乞韓國史學界號𡅏「三國時代」。三國臺中高句麗最強大,隋煬帝共唐太宗自家帶幾十萬其部隊去拍,都乞伊拍輸去。不過高句麗也元氣大傷,着668年乞新羅滅囇,統一新羅王朝就總款產生了。 (世落讀...)

琉球國

琉球國是舊底蜀隻國家,敆現在日本沖繩縣鹿兒島縣奄美群島。琉球著台灣共日本之間,地理位置野重要。根據琉球官方寫其歷史書《中山世鑑》、《中山世譜》共《球陽記事》裏勢其講法,琉球群島是由女神阿摩美久創造其。遘尾了阿摩美久其大囝變成琉球最早其國王,號𡅏天孫氏。天孫氏傳15隻國王,乞儂篡位,全國大亂。1187年,由浦添其按司舜天統一琉球。1469年,國王尚德乞大臣尚圓篡位。15遘16世紀是琉球其黃金時期,許辰候其琉球野富,共中國朝鮮泰國等等國家都有做生意。1609年,日本其薩摩藩侵略琉球,強迫琉球也向伊朝貢。1879年,琉球乞日本滅唻,改名號𡅏沖繩縣。琉球共福州其關係野深,今旦台江固有琉球館,舊底是掏𡅏住琉球儂其。 (世落讀...)

1910年福州閩江懸頂其曲蹄

曲蹄,也號𡅏曲蹄囝連家船民或者福州蜑民,是生活著閩江上共福州海墘其蜀隻民系,屬蜑民其蜀種。「曲蹄」者詞是陸地懸頂其漢儂對伊各儂其蔑稱。按傳統來講,曲蹄蜀世儂臺中大部份其時間都住著船懸頂,陸地上其漢儂看𣍐起伊各儂。不過今旦,曲蹄基本已經上岸定居了。除去福州其曲蹄,蜑民敆中國別塊也有分佈,像閩南廣東許蜀帶都有。舊底曲蹄可能固有閩越儂身體其特徵,不過現在已經共漢儂無什乇區別了。古代書裏勢將曲蹄號𡅏游艇子,者名字著《北史》共《三山志》裏勢都有出現過,是對中國東南海墘生活其蜑民統稱。唐朝宋朝其辰候一般告伊各儂號𡅏白水郎、白水仙或者白水人,茲幾隻名字著《三山志》裏勢都有講遘。但茲字是指南方其夷人,者稱呼著隋朝其辰候開始出現,遘南宋以後乍開始普遍挈嚽來告茲蜀陣著海墘生活其儂。 (世落讀...)

裴仙宫前闽剧.JPG

閩劇,也號𡅏福州戲,是福州特色其蜀種劇種,使福州話唱,福州話念白。敆唐朝其辰候,福州就有「歌舞百戲」其演出去了。南宋辰候南戲臺中其《張協狀元》,就是獲福州百姓其「福州歌」共「福清歌」來做曲牌其。明朝萬曆37年(1609年),福州出身其官員曹學佺乞皇帝逐轉厝。伊着洪塘祖厝組織戲班,請儒士去夫塊聽劇。伊精通音律,創作出來蜀種適合使福州話唱其腔,別儂都見覺者腔𣍐呆,告嚽號𡅏「儒林班」。滿清入關以後,曹學佺自殺,者腔就慢慢無儂唱去了。同時復有江西弋陽腔傳遘福州來。者戲班蜀七處躃躃動去演出,故此號𡅏「江湖班」。者「江湖班」唱戲全使「土官話」(官話其字使福州話其音來讀),前臺唱,後臺幫腔,鑼鼓窾窾叫,聽𡅏野鬧熱,百姓都盡去喜歡。但是者「土官話」着百姓臺中無箬壞儂聽會會意,有儂就掏𡅏「平話」(福州話)來唱白,「平話戲」就總款產生去了。 (世落讀...)

國際象棋其棋

國際象棋也號𡅏西洋棋,是蜀種類遊戲,着今旦國際懸頂客佻其儂嘢価。國際象棋由兩隻儂行,蜀隻儂拈其子,蜀隻儂拈其,其中拈白其着先行。每蜀方其棋臺中都有1粒國王、1粒王后、2粒象(也號𡅏教士)、2頭馬(也號𡅏騎士)、2粒車(也號𡅏城堡)共8粒兵。去拍國王號𡅏將軍,僅是國王乞儂將軍以後無塊走就號𡅏殺棋,乞儂殺棋其許蜀方就輸了。僅是夫儂都無辦法將對方其國王刣囇,就號𡅏和棋。國際象棋其棋盤是蜀組8*8其方格,每蜀隻格格都塗上烏或者白其顏色,共間壁其格格區別開來。國際象棋其祖宗是印度恰圖蘭卡。恰圖蘭卡也是蜀種棋類遊戲,共今旦國際象棋其棋盤共棋子都盡去像。恰圖蘭卡差不多着薩珊帝國國王霍斯勞一世在位其辰候傳遘波斯。這國王對文學哲學感興趣,由印度夫塊掏嘢価其書遘波斯。印度儂也將恰圖蘭卡帶遘這國王夫塊,伊見覺嘢有味,將這其改造成沙特蘭茲掏來客佻。 (世落讀...)

使平話字寫其文章

平話字是專門掏𡅏寫福州話其蜀種羅馬字。伊都領有17芘字母,複合字母共特殊字母僅加底去固有23芘。平話字另外固有5芘符號掏𡅏標注聲調,1芘連字符號掏𡅏連接音節。其實遘現在時,固𣍐曉福州話其茲套羅馬字到底號𡅏什乇名字。中國其學術界都是告伊「教會羅馬字」,因為伊基本都是着教會裏勢使其。平話字茲隻名字是業餘研究福州話其兩隻後生囝敆2005年天熱其辰候起其。嚽是伊各儂學閩南語其羅馬字名字「白話字」起其,因為閩南語其「白話」共福州話其「平話」是蜀樣其意思。現在儂固未討齊有關平話字創作其具體材料,儂家僅中趁零星其材料懸頂得遘仂囝創作其消息。鴉片戰爭以後,趁歐洲美國來其基督教傳教士為了固好其向中國儂傳教,就去學中國其語言。伊各儂敆學其辰候,按自家其理解,使羅馬字記下來學其內容。之後復有儂去整理茲芘羅馬字,統一字母其寫法。拼寫中國地方語言其各種羅馬字就總款問世去了。趁現有其材料裏勢儂家發現,特早使羅馬字來記福州話其儂是耶魯大學其教授懷德M. C. White)。伊當時是寫蜀種號𡅏「威廉·瓊斯音標」(System of Sir William Jones)其記音系統來記福州話。(世落讀...)