曲蹄曲

參考閩東語平話字其版本。/ Chăng-kō̤ Mìng-dĕ̤ng-ngṳ̄ Bàng-uâ-cê gì bēng-buōng.

---

曲蹄曲，是連家船民其傳統民歌，使平話唱。形式主要分「盤詩」共「唱賀年歌」兩種。

來源

曲蹄曲是連家船民唱其歌。連家船民其祖先，可能是古早其辰候住着福州其閩越儂。連家船民世代住着閩江或且海墘其連家船懸頂。船民平常都搦受治，漢儂看儥起伊各儂，也儥讓伊儂上岸住。曲蹄曲可能敆宋朝——甚至故早其辰候——就已經有去。絕大部份其連家船民都儥仈字。伊各儂㑚是將自家其水上生活唱出來，遘尾蜀代傳蜀代。曲蹄曲其曲調，有自家編其，也有閩劇其。明清時期，船民也講平話了，曲蹄曲就使平話唱。

形式

1850年左右，閩江懸頂連家船著蜀堆其樣式

曲蹄曲主要分「盤詩」共「唱賀年歌」兩種。故有別其形式，包括「端午採蓮歌」等等。

盤詩

做節其時候，閩江江墘連家船會敆蜀堆，蜀男蜀女對唱。嚽就是盤詩，或且告盤歌、盤答。曲調大多數是舊底留下其，曲蹄自家編其。但是唱詞是罔問罔答其時候現場想其，無固定。唱其一般都是男女求愛、互相刺溪、互祝平安等等。開場其引歌一般是：

蜀條竹囝軟絲絲，
撩汝對面來盤詩。
共汝上段盤下段，
莫盤呆詩盤好詩。

接下就正式開始對唱，蜀問蜀答。

有總款唱其：

儂是水上討漁婆，
母女二人下江河，
天晴是儂好日子，
拍風逷雨無奈何。
儂今使力來拔篷，
一篷能轉八面風，
篷轉風順船駛進，
看着前面好地方。
妹汝駛船莫大意，
好好送客回家鄉。
江上漁歌唱不盡，
魚香米香水也香。

唱賀年歌

著做年其前後，也就是農曆正月初二遘初四，連家船民會向陸地懸頂其漢儂唱歌討粿。這前後唱其歌，就是賀年歌。賀年歌一般內容都野吉祥。曲調有曲蹄傳統其曲調，也有閩劇清唱小調。像《十把白扇》《十二月果》只種曲，會有十句或且十二句許滿長。唱其時候，右邊稠稠掛𡅏竹編其嫩嫩其鼓籃，左邊脢𡅏尺上長、裏勢半筒水其嫩嫩其竹筒去敲拍伴奏。每遘正月十五、二月初二、三月初三，也會唱總款其歌。

有總款唱其：

一官大娘高廳坐，
二子攜孫來拜年。
三女有婿人品好，
四盞紅燈掛營前。
五色龍鳳雙飛舞，
六張靠椅擺兩邊。
七世同堂好名聲，
八仙月桌圓又圓。
九落大厝好像樣，
十全如意福連連。
新春賀年歌來唱，
送儂𥺪粿迎新年。

端午採蓮歌

手拍鑼鼓響連天，
端午採蓮在街邊；
一枝蒲艾門前插，
竹箬裹粽四角尖。

影響

曲蹄曲第一開始雖然是曲蹄唱其曲，遘尾也野有可能影響了十邑儂其民歌民謠野価。盤詩由連家船懸頂傳邊閩江兩岸，故傳遘囫圇隻福州府。《一枝花》《撐船歌》《月光光》《賣洋桃》《蜀粒橄欖》等等福州其傳統民歌，都有曲蹄曲其影響。