曲蹄

參考閩東語平話字其版本。/ Chăng-kō̤ Mìng-dĕ̤ng-ngṳ̄ Bàng-uâ-cê gì bēng-buōng.

---

1910年福州閩江懸頂其曲蹄

曲蹄（ kuóh-dà̤），也號𡅏曲蹄囝、連家船民或者福州蜑民，是生活著閩江上共福州海墘其蜀隻民系，屬蜑民其蜀種。「曲蹄」者詞是陸地懸頂其漢儂對伊各儂其蔑稱。

按傳統來講，曲蹄蜀世儂臺中大部份其時間都住著船懸頂，陸地上其漢儂看𣍐起伊各儂。不過今旦，曲蹄基本已經上岸定居了。

除去福州其曲蹄，蜑民敆中國別塊也有分佈，像閩南、廣東許蜀帶都有。

名稱

曲蹄也號𡅏曲蹄囝，有其辰候也會寫作科題，是福州漢儂對茲蜀陣儂其稱呼。茲蜀陣儂日日著船裏勢生活，骹腿會做彎彎式拔𣍐直，故此號𡅏者名字。女其曲蹄也乞福州儂號𡅏江妹囝或者曲蹄婆。

古代書裏勢將曲蹄號𡅏游艇子，者名字著《北史》共《三山志》裏勢都有出現過，是對中國東南海墘生活其蜑民統稱。唐朝共宋朝其辰候一般告伊各儂號𡅏白水郎、白水仙或者白水人，茲幾隻名字著《三山志》裏勢都有講遘。但茲字是指南方其夷人，者稱呼著隋朝其辰候開始出現，遘南宋以後乍開始普遍挈嚽來告茲蜀陣著海墘生活其儂。

起源

福州內河裏勢其連家船

曲蹄其起源，著曲蹄自家其傳說臺中就有野価種講法，其中有茲幾種比較出名：

1. 見覺自家是由天懸頂逿下來其掃帚，逿地兜變成漢儂，逿水𡅏變成曲蹄。
2. 講自家其祖宗是閩越儂，閩越乞漢武帝滅唻其辰候走水𡅏去。
3. 講自家其組織是東晉辰候農民軍頭頭盧循其部下。盧循造反失敗以後走水𡅏去。
4. 講自家其祖宗是福建其原住民。王審知拍遘福建以後將伊各儂其塍奪去，逐去海𡅏。
5. 講自家其祖宗是蒙古儂。元朝滅亡以後會驚漢儂報復走水𡅏去。
6. 固有其曲蹄講自家祖宗是陳友諒其部下。

部份曲蹄其族譜講是趁山西搬過來其。古代其書都認為曲蹄屬「蛇種」，是閩越儂其後代。講曲蹄是色目儂（元朝辰候趁中亞來其番囝）其後代都無什乇根據。

現代學術界主要其觀點是：曲蹄是舊底百越儂其後代，共今旦其畬族起源差不多，儷是講差別其話，曲蹄住著水其邊兜。曲蹄共其他地方其蜑民有蜀隻組織，有其曲蹄是趁浙江海墘夫塊搬過來其，有其曲蹄趁福州搬去浙江共江蘇，遘尾了復趁夫塊搬轉來。

曲蹄原來有自家其語言，遘尾了因為共陸地懸頂其漢儂經過長期其接觸，遘明朝其辰候已經漢化，改成使閩東語。滿清雍正7年（1729年）其辰候，雍正皇帝命令：「無能耐起厝其蜑民，讓伊住著船𡅏，伓使強迫伊各儂上岸；有能力起厝其，會使著水邊兜起自家其村來住，共漢儂蜀樣著上戶口，方便調查，痞囝𣍐使去欺負伊各儂。告做官其去勸蜑民開荒地、做塍，共其他儂蜀樣。」雍正允許蜑民上岸買厝、買塍、做生意共讀書，趁茲辰候開始，有少部份其蜑民上岸定居，茲蜀陣儂乞儂號𡅏「歇家」。中華民國成立以後，政府禁止漢儂看𣍐起蜑民，上岸定居其儂開始變価。中華人民共和國成立以後，政府安排野価蜑民上岸，今旦基本無儂像舊底夫款住著水𡅏了。

中華人民共和國乍成立其辰候，最早將蜑民當蜀隻少數民族來看。遘尾了著1955年民族識別調查其辰候，共產黨見覺蜑民已經乞漢族同化，無自家民族特徵共意識，故此將伊各儂當漢族其蜀部份。

體質特徵

舊底曲蹄可能固有閩越儂身體其特徵，不過現在已經共漢儂無什乇區別了。舊底曲蹄最明顯其特徵，皮膚顏色比較深，骹腿比較短會做彎彎式，福州儂告伊各儂號𡅏「曲蹄」，可能就是趁嚽塊來其。總款其外形，共伊各儂野稠著復暗復矮其船裏勢骹屈頭彎𡅏去睏、骹腿盤𡅏坐著地兜、叉開來拿魚有直接其關係。

人口共語言

曲蹄其分佈

各時期對曲蹄人口統計其數據都差野遠。民國辰候其學者陳文濤見覺福州市區其曲蹄差不多會達遘10萬，者數據可能比較接近當時其情況。共產黨乍上臺辰候做過統計：閩江入海口其曲蹄都領有3731厝、17235儂，其中男其8760儂、女其8475儂，男女比例1:0.967；著閩江長樂、永泰、南平附近剃了搬來搬去其有4219厝、10369儂。總款講閩江共福州曲蹄有27604儂，嚽固無算海墘羅源、連江夫塊其曲蹄。固有資料講，遘1950年左右，閩江裏勢有曲蹄3萬幾隻。

曲蹄最早住著福州其三縣洲、幫洲、義洲、鴨姆洲、泛船浦、上渡、中洲、蒼霞共水部夫塊。遘尾了復搬遘南嶼、洪塘、馬江、亭江、琯頭、劉岐，固有閩侯、長樂、永泰、閩清、羅源、連江總款其江墘共海墘。復有曲蹄趁閩江剃了向上游行，搬遘閩北其南平、邵武、順昌、建甌、將樂夫塊去。也有其搬去海墘其寧德、霞浦夫所。

今旦其曲蹄都使閩東語其福州話做自家其母語。搬去閩北其曲蹄也是講福州話。有其地方其曲蹄固有自家特殊其詞。曲蹄著歷史懸頂有自家其語言，不過遘尾了開始換去使漢儂其福州話。遘明朝其辰候，大部份其曲蹄已經會講福州話了，不過固有保留野価自家語言其語法共單詞。共產黨上臺以後大做推廣普通話，故此今旦野価曲蹄也會講普通話。

姓

曲蹄其姓有十幾種，野価都是明朝共滿清漢化其辰候起其。儂比較価其姓可能都共水或者拍魚有干過。比較典型其像江、唐、翁、歐、潘、卞、池、浦等等。其中，「翁」其意思可能是「漁翁」（拍魚其）；「潘」意思是「水懸頂其番囝」；「歐」可能指「海鷗」；池、浦、江、海總款其姓，都是伊各儂生活其地方。另外有其姓陳其曲蹄講自家是陳友諒其後代。長樂籌東村其姓盧其曲蹄講伊各儂是盧循其後代。

福州市區其曲蹄野価姓唐、姓賴、姓江、姓翁或者姓詹；閩侯其野価姓歐、卞、池、江共郭；長樂其姓陳、江、翁共倪其比較価；羅源海墘其主要姓林、歐、江、鄭、連、陳、翁、劉、卞或者唐。

文化

1927年閩江萬壽橋（今旦解放大橋）下底其連家船

著歷史懸頂，曲蹄乞陸地懸頂其漢儂看𣍐起，伓讓伊各儂上岸，蜀世儂住著船懸頂。曲蹄經濟來源主要是著海墘或者河𡅏拿魚，或者使船來下乇。大部份儂厝野逼，復加𡅏生活野容易受遘風颱其影響。中華民國成立以前，曲蹄大部份都無什乇文化。共產黨上臺以後，大部份其曲蹄上岸定居，野価傳統其風俗共生活方式開始變無，有失傳其危險。

頌

滿清遘民國其辰候，曲蹄一般頌挈麻布做其衣裳褲，染成藍、烏或者茶色。夫款其褲野寬野大，乞儂號𡅏「曲蹄褲」。女界手腕懸頂愛䋎上蜀層蜀寸寬其烏烏式邊邊。著上岸定居以前，大部份其曲蹄愛褪跣骹，伓戴帽。女界伓纏骹，頭髮梳尖尖式，尾尾蹺天，者髮型號𡅏「尖螺髻」；老姆會將頭髮盤起來，使蜀種樣式像蛇其、有五尺許罔長其簪簪插頭髮𡅏。嚽乞有其學者當做曲蹄是閩越儂後代其證據，因為閩越儂真迷信老蛇。

住

中洲島南墘其連家船，邊斗都是曲蹄起其破厝。（1907年攝其像）

古代大部份其曲蹄蜀世儂都是住著船𡅏。「連家船」者名字是對曲蹄比較中性其稱呼，者詞也對曲蹄無什乇看𣍐起其意思。

閩江懸頂其連家船一般有5遘6米許滿長，有3米許滿寬。頭尾尖尖式翹天，臺中復平復闊，固有挈竹蓬做其船堵。蜀架總款其船是曲蹄工作共生活其地方，拍魚著船頭其甲板，船堵就是就是厝共倉庫，船尾是廁所。曲蹄一般挈蜀種粗粗式竹筒趁褲骹邊下底禿入去接尿排出來，有其曲蹄固會著船尾養雞共鴨茲蜀類其頭牲。比較早辰候上岸定居其曲蹄會著江墘或者灘塗𡅏起厝。伊各儂先著地兜𡅏拍挈柴做其砧，再將原來自家其船廮著懸頂當厝來使，或者伓挈船來做，敆砧懸頂鋪柴板來起厝。夫款其厝野嫩，乞儂號𡅏「四骹樓」或者「提骹房」。

紅白大事

閩江南墘其泛船浦天主堂。舊底野価信天主教其曲蹄遘嚽所來祈禱。

按傳統其風俗，曲蹄其結婚一般由爸奶做主，也有告儂做媒其。一般程序是送禮、做出動、請奶（請臨水奶）共過關。

諸娘囝18歲出嫁，結婚以後去唐餔厝𡅏住，許蜀晡有啼嫁、罵嫁其風俗。江妹囝會嫁上岸，曲蹄囝無討陸地其女界做老媽。結婚許蜀日，水面其船儷是看見去接新婦其船，無管會認識𣍐，都會使行過去討米酒來啜。米酒是女方陪嫁其乇，號𡅏「新婦尿」。江妹囝著唐餔死去以後一般會改嫁蜀隻，結婚以前儷是有共別隻男界𠚺，別儂也𣍐去講伊，嚽都無漢儂許罔講究。厝富其男界固會去討細婆。

曲蹄死儂辰候其風俗共陸地懸頂其漢儂有仂囝差別。譬如講，曲蹄厝逼，無能耐請和尚道士來做七。海墘其曲蹄無墓，一般掏草蓆卷囇，埋著比較僻其灘塗裏勢，嚽𣍐使乞別儂看見。最早信天主教其曲蹄埋著福州城西北其奉教山。者山就是今旦其馬鞍山，舊底福州儂告伊曲蹄山。

做節

福州儂祭灶有「官三民四曲蹄五」其講法。就是講，做官其著十二月廿三祭灶，百姓著廿四祭灶，曲蹄著廿五祭。三十暝晡其辰候，曲蹄會將船開遘閩江臺中去，免𡅏債主來討錢，嚽號𡅏「遷篙」。正月初二遘初四，女界共伲囝會上岸討粿，去漢儂住其地方，家家厝厝唱詩百年，講吉利其話來討粿。曲蹄出名其《討粿詩》有：「姑嫂雙雙賀新年，紅紅傘燈掛廳前；好糕好粿送奴去，金字牌板豎門前」「舊年過了又新年，生意興隆賺大錢；恭喜發財平安過，送奴糖粿過門前」等等。做節其辰候，曲蹄有唱漁歌其傳統，不過嚽敆今旦有失傳其危險。

禁忌

曲蹄野驚趁船先斗經過，伊各儂見覺嚽是水馬（意思是浸死其女界）其象徵。不過儷是dé̤ṳk著水馬都著撈懸來，避免鬼來討麻煩。曲蹄看見逿水𡅏儂𣍐使直接就上來，有三沉三浮再救其習慣。因為野稠行船，曲蹄驚「退」、「橫」茲蜀類其字。曲蹄見覺看見擺冷覆其乇都𣍐吉利，鼎咯盆盆咯都𣍐使擺冷覆，食魚也𣍐使翻蜀面。曲蹄見覺魚其目睭𣍐食其，伊各儂著船頭會雕魚其目睭，見覺嚽會保佑船𣍐碰。

漁歌

主條目：曲蹄曲

曲蹄其漁歌是曲蹄民間其蜀種傳統音樂，主要有盤歌共唱新年歌兩種，都是挈福州話來唱。盤歌是蜀男蜀女對唱，歌詞是現場發揮其；賀年歌是著過年其辰候向陸地懸頂其漢儂討粿辰候唱其歌。曲蹄漁歌有閩劇其曲調，也對福州其他其民謠曲藝有一定其影響，不過今旦有失傳其危險，現在已經乞政府加遘福州市共福建省其非物質文化遺產其名單裏勢去了。

宗教

最早，曲蹄信福建本土特色其野価道教神，其中包括無諸、蛇神、蛙神、龍神，固有媽祖、拿公、白馬尊王、開閩尊王（王審知）、威武尊王（王審潮）、五福王爺、臨水奶、陳尚書（陳文龍）、七星奶、田螺姑娘共各種地頭神。曲蹄真稠行船，故此著伊各儂臺中盡去信媽祖，固將媽祖其信仰傳遘閩北其內陸地區去。曲蹄固將白馬尊王其信仰傳遘馬祖島，拿公其信仰傳去琉球。也有蜀部份其曲蹄信佛教。

17世紀其辰候，番囝傳教士遘福州來活動，成立教區，開始有曲蹄信天主教。趁19世紀中期起，茲蜀陣傳教士將曲蹄當做重要傳教對象，固因為嚽特零意去學福州話。天主教教會對手奉教其曲蹄上岸定居，避免伊各儂受遘漢儂其欺負，復開學校教育曲蹄，故此奉教其曲蹄罔變罔価。遘今旦，大部份其曲蹄都信天主教了。曲蹄共曲蹄其後代佔福州天主教教徒其人口野大。

對曲蹄其歧視

1910年其萬壽橋，橋懸頂行其是漢儂，下底都是曲蹄其船。

趁宋朝開始，曲蹄乞陸地懸頂其漢儂當做「賤民」看𣍐起。舊底有蜀種講法，福州其男界儷無錢討老媽，伓是討江妹囝，就是去討兩個聲（指外地來其儂）。曲蹄其生產共生活都受遘野大其限制，𣍐使上岸定居，𣍐使頌絲綢其衣裳，𣍐使共漢儂結婚，上岸𣍐使遮傘共頌鞋，有好事𣍐使張燈結綵，行墿中著彎腰低頭沿邊兜行，𣍐使頌漢儂其衣裳，褲管蜀面懸蜀面低。女界梳半爿髻，𣍐使學漢儂女界夫款梳。有其地方固禁止曲蹄上岸來，當地有「曲蹄莫上岸，上岸拍死無賠命」其講法。上岸定居其曲蹄也𣍐使起挈瓦做頂其厝，學漢儂起有火墻包其厝更更是𣍐使其。有其厝富其曲蹄挈野価錢去賄賂蜀姓其漢儂，挈漢儂其民籍去讀書考書。滿清末期福州有蜀隻名號𡅏郭柏蒼其讀書儂，著伊寫其《竹間十日話》裏勢，有講蜀隻順治年間名字號𡅏金鏡其進士因為厝逼共江妹囝結婚，社會地位變野低其故事：

“

金鏡字肅明，作秀才貧甚，與賣漁人通譜。福州所稱賣漁嫂即曲蹄婆，以其生長船中，兩足俱曲故名。沒為賤種，子孫不得應試。例不登岸，作半片髻，以別田婆；有梳髻帶中簪者，田婆輒毆之。近三十年始溷矣。州邊田中灣里所稱曲蹄婆乃妓女，托為賣魚嫂，故涉訟。則穿紈絝稱漁婆。人為之語曰「月照池塘，漁人錯認金鏡」。按鏡居玉尺山以仕耿逆流口外，鬻為何提督傅筆。

”

——《竹間十日話》，卷5

茲蜀段文言文翻譯成閩東語意思就是：

“

金鏡，字肅明，做秀才其辰候厝野逼，共賣魚其結婚。福州儂告其賣漁嫂就是曲蹄婆，生活著船裏勢，兩隻骹腿都會做彎彎式，故此號者名字。遘尾了地位變盡去低，囝弟𣍐使去考書。按習慣𣍐使上岸，梳半片髻，共塍婆（漢儂做塍其女界）區別開來；儷是敢梳髻戴中簪其儂，都會乞塍婆拿𡅏拍。三十幾年以後乍開始（共漢儂）混蜀堆去。鄉下儂講其曲蹄婆是賣笑其，騙儂自家是賣漁嫂，故此會乞儂告狀。有儂因為嚽講：「月dàng池塘𡅏，拍魚其認綻金鏡。」按：者金鏡住著玉尺山，遘尾了對手耿精忠造反，流放遘山海關外斗去，賣乞何提督做傅筆。

”

——《竹間十日話》，卷5

趁滿清開始，政府共曲蹄都卜想取消者歧視其政策。18世紀雍正年間，政府允許曲蹄上岸定居，不過民間固有真価儂看𣍐起伊各儂。滿清末期做憲政，有儂向福州諮議局提出議案，要求立法保護曲蹄共漢儂待遇平等，但是政府講嚽是習慣，無接受嚽議案。中華民國成立以後，完全解除曲蹄𣍐上岸其禁令。共產黨上臺以後，政府安排野価曲蹄上岸。歧視其政策完全無了，不過有其漢儂固是看𣍐起曲蹄。

文化形象

福州民間其文化形象

福州民間文化裏勢看𣍐起曲蹄，見覺伊各儂奸狡利。著福州話臺中有野価看𣍐起曲蹄其俗語。像「曲蹄瘟」，「一粒橄欖丟過坑，曲蹄也想做先生；手拈筆仔抖抖戰，賣寫三字竇燕山」，「曲蹄會做官，中原變北番」茲蜀類，固有「曲蹄莫上岸，上岸乞拍死無賠命」總款威脅其話。滿清政府允許曲蹄買官，固有「搖船搖船啦，曲蹄做老爹。少爺擔糞桶，小姐去踏車。廳中儂客喊恭喜。房裡奶奶脫跣骹」總款笑曲蹄其俗語。《閩都別記》裏勢有野価貶低曲蹄其文字，不過有其曲蹄著者裏勢是以正面形象出現其。福州有野価其地名共曲蹄有干過。福州市區西北有馬鞍山，舊底號𡅏曲蹄山，夫塊舊底有野価曲蹄埋著嚽所。馬祖其南竿島也有曲蹄澳。

番囝筆下底其閩江共曲蹄

1847年福州開埠以後，野価基督教傳教士來福州傳教。茲蜀陣儂其筆記記下來野価曲蹄其生活，乞番囝留下野深其印象：

“

…總款彎彎式開差不多有30英里，儂家其船開遘蜀片邊兜都是山其野俊其地方。嚽所蜀七處都是破碎式無規則其山脈，福州城就是著者山脈其保護臺中。卜遘福州其墿中，我看見江其兩邊蜀滿世都是船——成百成千隻嫩嫩式板船，固有大其船永久其停著夫塊，噲是船其主人住其地方。水懸頂其厝是中國儂生活最明顯其蜀種特色，著茲隻帝國蜀七處都會看見茲種風俗。福州水懸頂居民其人口肯定超過幾千，茲蜀陣儂著嚽所出世，著嚽所茁大，蜀世儂都著者船𡅏生活。河懸頂也都是各種各色其平底帆船，有復大復重其山東船，有野俊野輕其烏烏式其寧波船，夫乇款其船都有…

”

——懷禮，《福州其教會公墓》，1858

“

曲蹄是蜀隻復大復有味其社會階級。江兩邊其淺灘，固有橋面共橋墩，都是野好其停船其地方，停𡅏各種各色其野価船。大仂囝其船掏來下貨，著城裡城外開來開去，或者掏來下來福州港其鹽船共米船懸頂搬下來其貨；嫩仂囝其船掏來下儂或者拍魚。出海其板船停著橋下，野稠蜀江面都是者船…

”

——麥利和，《生活著中國儂臺中》，1861

閩江倉前山遘中洲島之間其連家船。

電影文化臺中其曲蹄

美國導演Julien Bryan著1947年攝過蜀部名字號𡅏《板船之家》（Sampan Family）其電影，講其是閩江入海口夫塊蜀厝姓林其曲蹄蜀日其生活。

2009年，導演巫向華根據曲蹄其文化生活攝成蜀部電影《天主其漁夫》，者電影裏勢大部份內容是挈福州話講其。

現狀

羅源上岸曲蹄其厝

趁20世紀50年代開始，中國政府安排曲蹄上岸定居，接受教育。今旦閩江江墘共海墘有野価曲蹄其村，都是許辰候起其。曲蹄大部份固是做共水有干過其工作，像倉山區閩江南岸其曲蹄就乞安排遘倉山區水上漁業大隊裏勢去，1979年，政府固撥款起蜀座漁民新村。趁1990年代起，野価厝都自家挈磚頭或者柴來起厝。羅源縣政府固乞海墘其曲蹄起海上村（著松山鎮）、先鋒村（著碧里鄉）、乘風村（著松山鎮）三隻村。1990年開始，福州市政府將剩下來其曲蹄都安排上岸定居。

今旦其曲蹄生活共教育水平都有野大其提供。大部份其曲蹄都做共拍魚、水上運輸、挖沙總款其職業，並且得遘政府其一定經濟支持。野価曲蹄將船改成大木帆船，有其固使會下幾百噸其鋼船。有其曲蹄乞政府請去做內河其衛生。

另外蜀方面，曲蹄其傳統文化有失傳其危險，曲蹄其漁歌，現在已經乞政府加遘福州市共福建省其非物質文化遺產其名單裏勢去了。

參考資料

維基共享裡勢有共Category:Fuzhou Tanka有干過其內容。