996工作制

參考閩東語平話字其版本。/ Chăng-kō̤ Mìng-dĕ̤ng-ngṳ̄ Bàng-uâ-cê gì bēng-buōng.

---

996工作制，是指蜀種「早起頭9點上班，暝晡9點落班，每禮拜工作6日」其工作制度，有時也廮𡅏指各種老闆要求工人加班但是無加班工資其工作制度。最早因為網络共軟件行業其工人其交流，產生者詞。

內容

茲種工作制度鼓勵或者強制工人加班。996者三芘數字分別代表每日早頭9點上班，暝晡9點落班，每禮拜工作6日。《中華人民共和國勞動法》規定，工人每日工作時間無年呆超過八小時，平均每禮拜工作時間無年呆超過卌四小時，但是996工作制每禮拜最少著工作72小時，超過茲芘工時標準，故此996工作制度違反中國勞動法。

雖然有監管部門行來調查部分相關事計，但是趁2016年9月58同城乞儂爆料實行者制度開始，者制度就有很価互聯網公司實行够現在。主要是程序員群體嘢価回發聲抗議茲蜀類制度，譬如講2019年3月，源代碼托管平臺GitHub懸頂出現名字叫做996.ICU其項项目，目的是讓大家儂關心茲種制度其非法存在，固加想辦法去改變茲種現象。

背景

加班其風氣敆中國大陸其公司，特別是科技創業公司臺中已經做嘢𣆯了。

英國廣播公司見覺，成本共技術其競爭，介加上領導共工人臺中其𣍐信任造成其加班，造致茲芘現象其出現。有其互聯網公司為𡅏鼓勵工人加班，有加班費、車費共夜宵報銷等等制度。嚽是外部環境對工人其影響。

固有，有觀點認為講工人其生活壓力，公司業務調整需要其裁員，共國家法律制定不明確等等也造成加班現象。

相關法律

維基圖書館有相關原始文獻

中華人民共和國勞動法

1994年第八屆全國人大常委會通過共2018年第十三屆全國人大常委會修正其《中華人民共和國勞動法》規定：

第三十六條　國家實行勞動者每日工作時間無超過八小時、平均每禮拜工作時間無超過卌四小時其工時制度。

第四十一條　使儂單位因為生產經營需要，經與工會共勞動者協商以後可以延長工作時間，一般每日無年呆超過蜀小時；因為特殊原因需要延長工作時間其，敆保障勞動者身體健康其條件下底延長工作時間每日無年呆超過三小時，但是每月無年呆超過三十六小時。

第四十四條　有下底情形之一其，使儂單位應該當著按下底標準支付高過勞動者正常工作時間工資其工資報酬：

（一）安排勞動者延長工作時間其，支付無低過工資其百分一百五其工資報酬； （二）休息日安排勞動者工作但是是無辦法安排補休其，支付無低過工資其百分二百其工資報酬； （三）法定休假日安排勞動者工作其，支付無低過工資其百分三百其工資報酬。

第九十條　使儂單位違反本法規定，延長勞動者工作時間其，由勞動行政部門给予警告，責令改正，固加可以處以罰款。

第九十一條　使儂單位有下底侵害勞動者合法權益情形之一其，由勞動行政部門責令支付勞動者其工資報酬、經濟補償，固加可以責令支付賠償金：

（二）拒伓支付勞動者延長工作時間工資報酬其；

涉及公司

阿里巴巴

2014年4月3號暝晡，新浪微博網民「少年判官大人」爆料講，有蜀隻敆阿里巴巴集團工作6年其工人4月2號半暝三更固𡅏為請孕假做交接工作，第二工4點鐘就因為子宫大出血死去。茲隻網民固講，死者敆今年（2014年）乞查出宫外孕以後，因為𣍐想敆四月份發年終獎辰候，考覈無過，故此就無去檢查身體。死者家屬也認為造成伊死亡其主要原因是超負荷工作引發其過勞死。4，阿里巴巴回應講2號暝晡8點鐘茲隻工人已經敆厝了。事發以後公司已經成立事故應急處理小組，協助茲隻工人厝𡅏侬辦好後置手續共賠償手續。另外，網民「少年判官大人」透露，阿里巴巴集團嘢価工人也面臨身體乞透支其情況，伊講臺中其「元兇」是𣍐合理其制度設計共績效考覈。

2019年4月12號，马雲敆阿里巴巴內部交流活動發表言論，伊表示996工作制是蜀種「巨大其福氣」。茲句話造成嘢価網民大嚗。14號，马雲敆新浪微博介講遘996，講996伓是單單加班，關鍵是「熱愛共奮鬥」。

58同城

2016年9月，提供生活服务其互聯網公司58同城實行996其加班制度其消息敆社交平臺懸頂傳播、發酵，嘢価網民敆公司CEO姚勁波其新浪微博下底大嚗茲種制度。也有可能是者公司其工人評論講盡稠加班遘暝晡十點幾，甚至固𡅏遲，但是都無相應其加班費，甚至講「其實是996就好了」。

58同城官方後頭出回應，因為每年九、十月是遲高峰，有相應其常規性動員活動。動員伓是強制其，工作時間也會使彈性變動，伓是要求每蜀隻儂都著按996其強制規定來安排工作。

但是根據媒體對58同城工作經驗其儂其採訪共報道996其工作動員敆公司內部盡去普遍，加班時間由部门內部制定、口頭傳達、無加班工資、固有罰款項目。

京东

58同城推行996制度其消息曝光以後，網𡅏有郵件截圖表示以电商起家其京東，伊其項目京東雲其管理層受遘京东副總裁何剛要求實行996工作制度，來「建設京東雲創業精神」。輿論認為講嚽是京東為搶奪雲計算市場作出其決定2019年3月15號，有疑似京東工人透露，者公司小部分部門推行996工作制，其他部門推行995工作制，茲種作法部分網民見覺是變相裁員。後頭京東公關發聲，講「𣍐強制要求工人加班，但是鼓勵大家全情投入，高效產出」。

有贊

2019年1月9號，職場社交平臺脈脈懸頂自稱有贊公司工人講敆伊其公司年會上管理層公然宣佈實行996制度，固加宣揚一切囇為工作其價值觀。有贊CEO兼創始人白鴉敆朋友圈回應講，「幾年以後回頭看，茲回絶對是好事」，但是未對者制度做細化解釋。部分媒體對批評茲種現象。1月30號下晝，者公司所在地杭州市西湖區勞動監察大隊回應，已經對伊開展調查。

其他公司

華為、網易遊戲、螞蟻金服、蘇寧、小米、字節跳動、拼多多、大疆、海爾集團等等卌幾家公司，都實行996或者更更嚴重其加班制度。

維權

996.ICU項目

2019年3月20號，V2EX網民@nulun註冊域名號𡅏996.icu其網站，口號是「工作996，生病ICU」。

3月26號，蜀隻名叫996icu其新註冊用戶敆GitHub創建名字叫做996.ICU其倉庫。茲芘倉庫其Readme文件講，茲芘項目名字其含義是「工作996，生病ICU」，固加使“Developers' lives matter”來做口號。

茲芘倉庫敆創建之后兩工（3月28號）就得遘5萬幾芘星標（Star），3月30號日頭出之前超過10萬芘星標，固加因為快速得遘大量星標飛遘GitHub其週度共月度趨勢榜第一。遘北京時間4月9號，茲芘倉庫已經得遘超過廿萬星標，星標數達遘GitHub第二。因為伊敆GitHub懸頂其火爆程度，茲芘項目其倉庫事務版（issue）乞儂亂做來發佈廣告，結果乞項目發起儂關去。茲件事計也敆中國大陸其知乎、新浪微博、微信等等社交平臺懸頂引發討論。事件其影響也敆外國慢慢出名。敆Hacker News共Reddit等等外國論壇底裡，996也變成熱門話題。嘢価媒體譬如講The Verge、金融時報、《連線》、Techmeme等等也跟底報道，也有嘢価名儂關注茲芘項目，Python語言作者吉多·范罗苏姆敆Twitter懸頂表示996是𣍐人道其制度，之后復敆Python官方論壇發帖询問遘「儂家著蔣蔣才有年呆對手中國其996程序員？蔣蔣做才有年呆引起西方媒體共政府其關注？」。但是很価輿論都認為講，茲芘項目其熱度卜想變成實際其行動，固著剃頭努力。

項目其最初目標是列出已經開始實行996工作制其公司，隨後項目社區復開始討論反996許可證其具體細節，固加茲芘項目產生嘢価衍生項目，譬如講相關其法律知識彙总，另外蜀芘有關實行正常工作時長其互聯網公司列表其倉庫955.WLB，固有周邊文化產品等等。

2019年4月3號開始，中國大陸其有其瀏覽器（譬如講QQ瀏覽器、微信瀏覽器、UC瀏覽器其360安全瀏覽器等等）將996.icu網站共伊其項目倉庫標記成「危險網站」、「違法網站」，阻止用戶訪問相關網頁。甚至連Twitter都有蜀段時間屏蔽996.icu。

微軟工人支持996.ICU運動

2019年4月18號，微軟公司共GitHub工人創建蜀茲GitHub倉庫，名字號𡅏叫support.996.ICU，固加微軟共GitHub懸頂百幾隻工人聯名上書公開批來支持996.ICU運動。

觀點

支持

• 马雲：马雲敆阿里內部會議表示，996是「修來其福報」。後頭發文講無年呆強制996。
• 劉強東：混日子其儂伓是我兄弟！

反對

• 吉多·范罗苏姆：996是𣍐人道其制度。
• 北京日報：马雲共劉強東是敆𡅏「鼓吹」996工作制，伊各儂其目的是變相降薪或者裁員。人民日報轉載茲篇文章。
• 中國新聞網：無必要掏拿來換錢。人民日报轉載茲篇文章。
• 新華社《學習進行時》評論組“辛識平”：996工作制違反勞動法。嚽是敆𡅏透支健康、透支未來，是對奮鬥者其傷害，也是對奮鬥精神其誤讀。
• 人民日報：崇尚奮鬥，絶對伓是強强制996。
• 半月談：有其企業家漠視法律，將996共奮鬥聯繫起去。嚽是毒雞湯。996伓是奮鬥，是法律共利益層面其問題。

外斗鏈接

• 996.icu
• GitHub懸顶其996ICU
• GitHub懸顶其955.WLB
• 新浪財經專題：“996”工作制介引熱議 商業大佬各抒己見
• 新浪科技專題：企業家蔣蔣看996 马雲:成功需超越別儂其付出